ಮಾರುಕಟ್ಟೆ ರಸ್ತೆ ಅತಿಕ್ರಮಣ: ಪಾಲಿಕೆ ಮೌನ

Team Udayavani, Jun 14, 2017, 5:06 PM IST

ಹುಬ್ಬಳ್ಳಿ: ರಸ್ತೆ ಹಾಗೂ ಪಾದಚಾರಿ ಮಾರ್ಗಗಳ ಅತಿಕ್ರಮಣದ ವಿರುದ್ಧ ಕಾರ್ಯಾಚರಣೆ ವಿಚಾರದಲ್ಲಿ ಮಹಾನಗರ ಪಾಲಿಕೆ ಮತ್ತೂಮ್ಮೆ ಆರಂಭಶೂರತ್ವ ಪ್ರದರ್ಶಿಸಿ, ಮತ್ತೆ ಮೌನಕ್ಕೆ ಜಾರಿದೆ. ರಸ್ತೆ ಮೇಲೆ ಮೊದಲಿನಂತೆಯೇ ಅಂಗಡಿ-ಮುಂಗಟ್ಟು ಹಚ್ಚಿ ವಹಿವಾಟು ನಡೆದಿದೆ. 

ನಗರದ ಪ್ರಮುಖ ಮಾರುಕಟ್ಟೆಗಳಲ್ಲಿ ಒಂದಾಗಿರುವ ಎಂ.ಜಿ. ಮಾರ್ಕೆಟ್‌ ಪ್ರದೇಶಗಳಲ್ಲಿ ಎರಡು ತಿಂಗಳ ಹಿಂದೆ ರಸ್ತೆ ಅತಿಕ್ರಮಿಸಿ ನಿರ್ಮಿಸಿದ್ದ ಅನಧಿಕೃತ ಅಂಗಡಿಗಳನ್ನು ಪಾಲಿಕೆ ತೆರವುಗೊಳಿಸಿ ರಸ್ತೆಗಳನ್ನು ಮುಕ್ತಗೊಳಿಸಿತ್ತು. ಆದರೆ, ಪಾಲಿಕೆ ಕಾರ್ಯಾಚರಣೆಗೇ ಸವಾಲು ಹಾಕುವಂತೆ ಮತ್ತೆ ರಸ್ತೆ ಮೇಲೆ ಅಂಗಡಿಗಳು ಬಂದು ಕೂತಿವೆ. ಅಧಿಕಾರಿಗಳ ಆರಂಭಶೂರತ್ವವನ್ನೇ ಅಣಕಿಸುವಂತಹ ಸ್ಥಿತಿ ಗೋಚರಿಸುತ್ತಿದೆ. 

ದೂರು ನೀಡಿದರೂ ಕ್ರಮವಿಲ್ಲ: ಬಹುತೇಕ ಅಂಗಡಿಕಾರರು, ಮಾರಾಟಗಾರರು ಮತ್ತೆ ರಸ್ತೆ ಮೇಲೇ ತಮ್ಮ ವ್ಯಾಪಾರ-ವಹಿವಾಟನ್ನು ಮುಂದುವರಿಸಿದ್ದಾರೆ. ಪಾಲಿಕೆ ಅಧಿಕಾರಿಗಳ ನೇತೃತ್ವದಲ್ಲಿ ಏ.10ರಂದು ಎಂ.ಜಿ. ಮಾರ್ಕೆಟ್‌ ನಲ್ಲಿ ಅತಿಕ್ರಮಣ ಮಾಡಿಕೊಂಡಿದ್ದ ರಸ್ತೆಯನ್ನು ತೆರವುಗೊಳಿಸಿ, ಮತ್ತೆ ಅತಿಕ್ರಮಣಕ್ಕೆ ಮುಂದಾಗದಂತೆ ಎಚ್ಚರಿಕೆ ನೀಡಲಾಗಿತ್ತು. ಆದರೆ ಇದಾಗಿ ಹತ್ತೇ ದಿನಗಳಲ್ಲಿ ಅದೇ ಸ್ಥಳದಲ್ಲಿ ಮತ್ತೆ ವ್ಯಾಪಾರ ಶುರುವಾಗಿದೆ.

ಇದರ ಕುರಿತು ಮಾರುಕಟ್ಟೆಯ ವ್ಯಾಪಾರಸ್ಥರು ಏಪ್ರಿಲ್‌ 24ರಂದು ದೂರು (ನಂ. 6106) ಸಲ್ಲಿಸಿದ್ದಾರೆ. ದೂರು ಸಲ್ಲಿಸಿ ತಿಂಗಳು ಉರುಳಿದರೂ ಪಾಲಿಕೆಯಿಂದ ಯಾವುದೇ ಸ್ಪಂದನೆ ಇಲ್ಲ. ಇದರ ಕುರಿತು ಸಂಸದರಿಗೆ, ಶಾಸಕರಿಗೆ, ಮಹಾಪೌರರಿಗೆ ಹಾಗೂ ಪಾಲಿಕೆ ಆಯುಕ್ತರಿಗೆ ಮನವಿ ಸಲ್ಲಿಸಿದರೂ ಯಾರೂ ಧ್ವನಿಯೆತ್ತಿಲ್ಲ ಎಂದು ಮಾರುಕಟ್ಟೆಯ ವ್ಯಾಪಾರಸ್ಥರು ಅಸಮಾಧಾನ ವ್ಯಕ್ತಪಡಿಸಿದ್ದಾರೆ. 

ಪಾಲಿಕೆ ಆಯುಕ್ತ ಸಿದ್ದಲಿಂಗಯ್ಯ ಹಿರೇಮಠ ಅವರ ನೇತೃತ್ವದಲ್ಲಿ ವಲಯ ನಂ.9ರಲ್ಲಿ ಸಹಾಯಕ ಆಯುಕ್ತ ಸುಭಾಸ ಕಾಂಬ್ಳಿ ನೇತೃತ್ವದಲ್ಲಿ ದುರ್ಗದ ಬಯಲು, ಎಂ.ಜಿ. ಮಾರ್ಕೆಟ್‌ ನಲ್ಲಿ ಕಾರ್ಯಾಚರಣೆ ನಡೆಸಿ 40ಕ್ಕೂ ಅಧಿಕ ಅಂಗಡಿಗಳನ್ನು ತೆರವುಗೊಳಿಸಲಾಗಿತ್ತು. ಆದರೆ ಇದೀಗ ಮತ್ತೆ ಎಲ್ಲ ಅಂಗಡಿಗಳು ವಹಿವಾಟು ಆರಂಭಿಸಿ, ಪಾಲಿಕೆ ವಿರುದ್ಧ ತೊಡೆ ತಟ್ಟಿವೆ ಎಂದರೆ ತಪ್ಪಾಗಲಿಕ್ಕಿಲ್ಲ. 

ಪಾಲಿಕೆ ಅಧಿಕಾರಿಗಳಿಂದ ನಿಗಾ: ಎರಡು ತಿಂಗಳ ಹಿಂದೆ ತೆರವು ಮಾಡಿರುವ ಪ್ರದೇಶಗಳಲ್ಲಿ ಪಾಲಿಕೆ ಅಧಿಕಾರಿಗಳು ಸದಾ ಕಣ್ಣಿಡಲಿದ್ದಾರೆ. ಯಾವುದೇ ಕಾರಣಕ್ಕೂ ರಸ್ತೆ ಅತಿಕ್ರಮಣ ಮಾಡಲು ಬಿಡುವುದಿಲ್ಲ ಎಂದು ಪಾಲಿಕೆ ಆಯುಕ್ತ ಸಿದ್ದಲಿಂಗಯ್ಯ ಹಿರೇಮಠ ಹೇಳಿದ್ದರು.

ಆದರೆ ಎರಡು ತಿಂಗಳು ಗತಿಸುವುದರಲ್ಲಿಯೇ ರಸ್ತೆಗಳು ಮತ್ತೆ ಅತಿಕ್ರಮಣಕ್ಕೆ ಒಳಗಾದರೂ ಪಾಲಿಕೆ ಸಿಬ್ಬಂದಿ ಯಾವುದೇ ಕ್ರಮ ತೆಗೆದುಕೊಳ್ಳದೇ ಇರುವುದು ಸಾರ್ವಜನಿಕರಲ್ಲಿ ಸಂಶಯ ಮೂಡಿಸಿದೆ. ಏಪ್ರಿಲ್‌ 10ರಂದು ನಡೆದ ಕಾರ್ಯಾಚರಣೆಯಲ್ಲಿ ಗದಗ ರಸ್ತೆಯ ರೈಲ್ವೆ ಕೆಳ ಸೇತುವೆ, ರೈಲ್ವೆ ನಿಲ್ದಾಣ ರಸ್ತೆ, ಬಾಕಳೆ ಗಲ್ಲಿ ಕ್ರಾಸ್‌, ಸಿಬಿಟಿ, ಶಾ ಬಝಾರ, ಗವಳಿ ಗಲ್ಲಿ ಪ್ರದೇಶಗಳಲ್ಲಿ ರಸ್ತೆಯ ಎರಡು ಬದಿಯ ಜಾಗ ಹಾಗೂ ಪಾದಚಾರಿ ಮಾರ್ಗ ಅತಿಕ್ರಮಿಸಿ ನಿರ್ಮಿಸಲಾಗಿದ್ದ ಅನಧಿಕೃತ ಅಂಗಡಿಗಳನ್ನು ತೆರವುಗೊಳಿಸಲಾಗಿತ್ತು.

ಅಲ್ಲೂ ಯಥಾಸ್ಥಿತಿಗೆ ಮರಳಿದೆ. ಶಾಹಾ ಬಜಾರ ಪ್ರದೇಶದಲ್ಲಿ ಮೊದಲೇ ಜಾಗ ಸಾಕಷ್ಟು ಅತಿಕ್ರಮಣಕ್ಕೆ ಒಳಗಾಗಿದೆ. ಈಗ ರಂಜಾನ್‌ ಮಾರುಕಟ್ಟೆ ಹಿನ್ನೆಲೆಯಲ್ಲಿ ರಸ್ತೆ ಮೇಲೆ ನಡೆದಾಡಲೂ ಜಾಗವಿಲ್ಲದಂತಾಗಿದೆ. ಅಧಿಕಾರಿಗಳಿಗೆ ಇದು ಕಾಣುತ್ತಿಲ್ಲವೇ ಎಂದು ಸಾರ್ವಜನಿಕರು ಪ್ರಶ್ನಿಸುತ್ತಿದ್ದಾರೆ.

ಅತಿಕ್ರಮಣ ಜಾಗ ಬಾಡಿಗೆಗೆ?: ಮಾರುಕಟ್ಟೆಯ ಪ್ರದೇಶದಲ್ಲಿ ರಸ್ತೆ ಅತಿಕ್ರಮಣ ಮಾಡಿಕೊಂಡು ವ್ಯಾಪಾರಸ್ಥರು ತಾತ್ಕಾಲಿಕ ಮಳಿಗೆಗಳನ್ನು ಹಾಕಿಕೊಂಡಿದ್ದಾರೆ. ಕೆಲವೊಬ್ಬರು ತಾವು ಹಾಕಿರುವ ಮಳಿಗೆಗಳನ್ನು 2-3 ಸಾವಿರ ರೂ. ಗಳಿಗೆ ಬಾಡಿಗೆ ನೀಡಿದ್ದಾರೆ.

ಇಷ್ಟೇ ಅಲ್ಲದೆ, ಸ್ಥಳೀಯ ಕೆಲವರು ರಸ್ತೆಯ ಜಾಗವನ್ನೇ ಮಾರಾಟ ಮಾಡಿದ್ದಾರೆ ಎಂದು ಹೇಳಲಾಗುತ್ತಿದೆ. ಇದೆಲ್ಲದನ್ನು ನೋಡಿದರೆ ಮಾರುಕಟ್ಟೆಯ ಪ್ರದೇಶ ಅತಿಕ್ರಮಣ ಮಾಡುವುದಷ್ಟೇ ಅಲ್ಲದೆ, ಬಾಡಿಗೆ ಹಾಗೂ ಮಾರಾಟಕ್ಕೂ ನೀಡಬಹುದೇ ಎಂಬ ವಿಷಯ ಅನೇಕರ ಅಚ್ಚರಿಗೆ ಕಾರಣವಾಗಿದೆ. 

* ಬಸವರಾಜ ಹೂಗಾರ