ಮಂಟಪದಲ್ಲೇ ಗಣಪನ ವಿಸರ್ಜನೆ!

Team Udayavani, Sep 1, 2017, 12:36 PM IST

ಹುಬ್ಬಳ್ಳಿ: ಗಣೇಶ ಪ್ರತಿಷ್ಠಾಪನೆ ಮಾಡಿದ ಮಂಟಪದಲ್ಲಿಯೇ ಗಣೇಶ ವಿಸರ್ಜನೆ ಮಾಡುವ ಮೂಲಕ ನಗರದ ಬಮ್ಮಾಪುರ ಓಣಿಯ ಬಮ್ಮಾಪುರ ವಿಘ್ನೇಶ್ವರ ಉತ್ಸವ ಸಮಿತಿ ಮಾದರಿ ಕಾರ್ಯಕ್ಕೆ ಮುಂದಾಗಿದೆ. ಪರಿಸರ ಸ್ನೇಹಿ ಗಣೇಶ ಪ್ರತಿಷ್ಠಾಪನೆ ಮಾಡಲಾಗಿದ್ದು, ಪರಿಸರಕ್ಕೆ ಹಾನಿಯಾಗದಂತೆ ಗಣೇಶ ವಿಸರ್ಜನೆ ಹಾಗೂ ಧಾರ್ಮಿಕ ಆಚರಣೆಗಳಿಗೆ ಸಕಲ ವ್ಯವಸ್ಥೆ ಮಾಡಲಾಗಿದೆ. 

ಸುಮಾರು 70 ವರ್ಷದ ಹಿನ್ನೆಲೆ ಇರುವ ಬಮ್ಮಾಪುರ ವಿಘ್ನೇಶ್ವರ ಉತ್ಸವ ಸಮಿತಿ(ಗರಡಿ ಮನೆ) ಇಲ್ಲಿ ಕಳೆದ 70 ವರ್ಷಗಳಿಂದ ಗಣೇಶನ ಪ್ರತಿಷ್ಠಾಪನೆ ಮಾಡುತ್ತಿದೆ. ಹಿರಿಯರು ಹೇಳುವಂತೆ ಸಾರ್ವಜನಿಕ ಗಣೇಶ ಪ್ರತಿಷ್ಠಾಪನೆ ಮಾಡುತ್ತಿರುವ ಪಟ್ಟಿಯಲ್ಲಿ ಮೊದಲನೇ ಐದು ಸ್ಥಾನಗಳಲ್ಲಿ ಕಾಣುತ್ತದೆ.

ಈ ಹಿಂದೆ ವಿಭಿನ್ನ ಪ್ರದರ್ಶನ, ವಿವಿಧ ಆಚರಣೆ ಸೇರಿದಂತೆ ಎಲ್ಲವನ್ನು ಮಾಡಲಾಗುತ್ತಿತ್ತು. ಆದರೆ, ಇತ್ತೀಚಿನ ದಿನಗಳಲ್ಲಿ ಸ್ವಲ್ಪ ಕುಗ್ಗಿದ್ದರೂ ಈ ವರ್ಷದಿಂದ ಮತ್ತೆ ಮೊದಲಿನ ಸ್ಥಾನಕ್ಕೆ ಕೊಂಡೊಯ್ಯಲು ಯುವಕರು ಮುಂದಾಗಿದ್ದಾರೆ ಎಂದು ಓಣಿಯ ಹಿರಿಯರಾದ ಈರಣ್ಣ ಬಡ್ನಿ ಹೇಳುತ್ತಾರೆ. 

ಮಂಟಪದಲ್ಲೇ ವಿಸರ್ಜನೆ: 9 ದಿನಗಳ ವರೆಗೆ ಇಲ್ಲಿ ಗಣೇಶ ಪ್ರತಿಷ್ಠಾಪನೆಯಾಗುತ್ತಿದ್ದು, ಗಣಹೋಮ, ಅನ್ನಸಂತರ್ಪಣೆ ಹಾಗೂ ಪ್ರತಿದಿನ ಸಂಜೆ ವಿಶೇಷ ಪೂಜೆ ಹಾಗೂ ಪ್ರಸಾದ ವ್ಯವಸ್ಥೆ ಮಾಡಲಾಗುತ್ತಿದೆ. ಜೊತೆಗೆ ಈ ವರ್ಷದಿಂದ ಗಣೇಶ ಮಂಟಪದಲ್ಲಿಯೇ ವಿಸರ್ಜನಾ ಕಾರ್ಯ ನಡೆಯಲಿದೆ.

ಧಾರವಾಡದ ಕಲಾವಿದ ಮಂಜುನಾಥ ಹಿರೇಮಠ ಎನ್ನುವವರು ಸುಮಾರು 35 ಕೆಜಿ ಮಣ್ಣಿನಿಂದ 5 ಎತ್ತರದ ಗಣೇಶನ ಮೂರ್ತಿ ನಿರ್ಮಿಸಿ ಕೊಟ್ಟಿದ್ದಾರೆ. ಮೂರ್ತಿ ಕೇವಲ ಅರ್ಧ ಗಂಟೆಯಲ್ಲಿ ನೀರಿನಲ್ಲಿ ಕರಗಲಿದೆ. ಇದಕ್ಕಾಗಿ 200 ಲೀಟರ್‌ ನೀರು ಬಳಸಲಾಗುತ್ತದೆ. 

ಸೆ. 2ರಂದು ಬೆಳಗ್ಗೆ 11:00 ಗಂಟೆಗೆ ಗಣೇಶನ ವಿಸರ್ಜನೆ ಕಾರ್ಯಕ್ರಮ ಆರಂಭವಾಗಲಿದ್ದು, ಘಂಟಿಕೇರಿ ಪೊಲೀಸ್‌ ಠಾಣೆ ಶೆಟ್ಟರ ವೃತ್ತದ ವರೆಗೆ ಮೆರವಣಿಗೆ ಮೂಲಕ ತೆರಳಿ ಮರಳಿ ಮಂಟಪಕ್ಕೆ ಗಣೇಶನ ಮೂರ್ತಿ ತರಲಾಗುತ್ತದೆ. ನಂತರ ಗಣೇಶ ಮೂರ್ತಿಯನ್ನು ದೊಡ್ಡದಾದ ಕೊಪ್ಪರಿಗೆಯಲ್ಲಿ ತಂದು ಇಡಲಾಗುತ್ತದೆ. ಗಣೇಶನ ಮೂರ್ತಿಗೆ ಓಣಿಯ ಹಿರಿಯರಿಂದ ಪಂಚಾಮೃತ ಅಭಿಷೇಕ, ಮಹಾಮಂಗಳಾರತಿ ಸೇರಿದಂತೆ ವಿವಿಧ ಧಾರ್ಮಿಕ ಕಾರ್ಯಕ್ರಮ ನಡೆಯಲಿದೆ. 

ತುಳಸಿ ಸಸಿ ವಿತರಣೆ: ಗಣೇಶ ವಿಸರ್ಜನೆ ನಂತರ ಅದರ ಮಣ್ಣನ್ನು ಓಣಿಯ ಭಕ್ತರಿಗೆ, ದಾನಿಗಳಿಗೆ ತುಳಸಿ ಸಸಿ ಮೂಲಕ ವಿತರಣೆ ಮಾಡುವ ಯೋಜನೆ ರೂಪಿಸಿದ್ದಾರೆ. ಇದಕ್ಕಾಗಿ ಸಂಘದ ಸದಸ್ಯರಾದ ವಿನಾಯಕ ಹೊಸಕೇರಿ, ಸಂತೋಷ ಶೆಟ್ಟರ, ರವಿ μರೋಜಿ, ಸಂತೋಷ ಕೊಂಡಾ, ಸುನೀಲ ಮಿರ್ಜಿ, ರಮೇಶ ಸವಣೂರ, ರವಿ ಹೊಸಕೇರಿ, ನಾಗೇಶ, ಸಂದೀಪ ವಕ್ಕುಂದ, ಮನು ಜಾಧವ, ನವೀನ ಭದ್ರಾಪುರಮಠ, ಜಗದೀಶ ಧಾರವಾಡ, ಚಂದ್ರ ಧಾರವಾಡ ಸೇರಿದಂತೆ ಓಣಿಯ ಎಲ್ಲರೂ ಸಿದ್ಧತೆ ನಡೆಸಿದ್ದಾರೆ.  

* ಬಸವರಾಜ ಹೂಗಾರ