ಗ್ರಾಮೀಣ ಬಡ ವಿದ್ಯಾರ್ಥಿಗಳಿಗೆ ಬೇಕಿದೆ ಆಸರೆ 

Team Udayavani, Jun 9, 2018, 5:14 PM IST

ಜಮಖಂಡಿ: ಬಡತನ ಎಲ್ಲದಕ್ಕೂ ಅಡ್ಡಿಯಾಗಬಾರದೆಂಬ ಮಹದಾಸೆಯಲ್ಲಿ ಎಸ್‌ಎಸ್‌ಎಲ್‌ಸಿ ಪರೀಕ್ಷೆಯಲ್ಲಿ ಗ್ರಾಮೀಣ
ಭಾಗದ ಇಬ್ಬರು ವಿದ್ಯಾರ್ಥಿಗಳು ಆರ್ಥಿಕ ನೆರವು ಹಾಗೂ ಆಸರೆಯ ನಿರೀಕ್ಷೆಯಲ್ಲಿದ್ದಾರೆ. ಯಾವುದೇ ಮನೆಪಾಠಕ್ಕೆ ಹೋಗದೆ, ಶಾಲೆಯಲ್ಲಿ ಶಿಕ್ಷಕರು ಮಾಡಿದ ಪಾಠವನ್ನು ಶಿಸ್ತಿನಿಂದ ಕಲಿತ ಹಿನ್ನೆಲೆಯಲ್ಲಿ ಪರೀಕ್ಷೆಯಲ್ಲಿ ಅತಿ ಹೆಚ್ಚು ಅಂಕ ಪಡೆದು ಇತರರಿಗೆ ಮಾದರಿಯಾಗಿದ್ದಾರೆ.

ವಿಜಯಪುರ ಜಿಲ್ಲೆಯ ಬಬಲೇಶ್ವರ ತಾಲೂಕಿನ ಕುಮಟೆ ಗ್ರಾಮದ ಸರಕಾರಿ ಪ್ರೌಢ ಶಾಲೆ ವಿದ್ಯಾರ್ಥಿಗಳಾದ ಪ್ರೀತಿ ಬಸಯ್ಯ ಮಠಪತಿ 566 ಅಂಕ ಪಡೆದಿದ್ದಾರೆ. ಕನ್ನಡ ವಿಷಯಕ್ಕೆ 125, ಆಂಗ್ಲ ಭಾಷೆಗೆ 85, ಹಿಂದಿ 99, ಗಣಿತ 77, ವಿಜ್ಞಾನ 90, ಸಮಾಜ ವಿಜ್ಞಾನ 100 ಅಂಕಗಳನ್ನು ಪಡೆದುಕೊಂಡಿದ್ದಾಳೆ.

ಅದೇ ಶಾಲೆಯಲ್ಲಿ ಓದುತ್ತಿರುವ ಸಹೋದರ ವಿಜಯ ಬಸಯ್ಯ ಮಠಪತಿ 578 ಅಂಕ ಪಡೆದುಕೊಂಡಿದ್ದಾನೆ. ಕನ್ನಡ ವಿಷಯಕ್ಕೆ 125, ಆಂಗ್ಲ ಭಾಷೆಗೆ 81, ಹಿಂದಿ 99, ಗಣಿತ 93, ವಿಜ್ಞಾನ 90, ಸಮಾಜ ವಿಜ್ಞಾನ 90 ಅಂಕಗಳನ್ನು ಪಡೆದುಕೊಂಡಿದ್ದಾನೆ. ಬಡತನದ ಬವಣೆಯಲ್ಲಿ ಸಿಲುಕುವ ಕುಟುಂಬ ಗುಡಿಸಲಲ್ಲಿ ವಾಸವಾಗಿದ್ದಾರೆ. ಸಹೋದರ ವಿಜಯ ಹಾಗೂ ಸಹೋದರಿ ಪ್ರೀತಿ ಅವರ ತಂದೆ ತೀರಿಕೊಂಡಿದ್ದಾರೆ. ತಾಯಿ ಕೂಲಿ ಮಾಡಿ ಜೀವನ ನಿರ್ವಹಿಸುತ್ತಿದ್ದಾರೆ. ಇಬ್ಬರು ಮಕ್ಕಳ ವಿದ್ಯಾಭ್ಯಾಸಕ್ಕೆ ಆರ್ಥಿಕ ತೊಂದರೆ ಎದುರಾಗಿದೆ. ಪಿಯುಸಿ ವಿಜ್ಞಾನ ವಿಭಾಗದಲ್ಲಿ ಆಸಕ್ತಿ ಹೊಂದಿರುವ ಇಬ್ಬರಿಗೂ ಕಲಿಯಲಿಕ್ಕೆ ಹಣದ ನೆರವು ಬೇಕಾಗಿದೆ. 

ಓದಿನಲ್ಲಿ ಹೆಚ್ಚಿನ ಆಸಕ್ತಿ ಹೊಂದಿರುವ ಇರ್ವರಿಗೂ ವಿದ್ಯಾಭ್ಯಾಸ ಮುಂದುವರಿಸಲು ಆರ್ಥಿಕ ಸಹಾಯಕ್ಕೆ ಹಂಬಲಿ ಸುತ್ತಿದ್ದಾರೆ. ನಗರದ ತುಂಗಳ ವಿಜ್ಞಾನ ಮಹಾವಿದ್ಯಾಲಯದಲ್ಲಿ ಪ್ರವೇಶ ಪಡೆದಿದ್ದು, ಶಾಲಾ ವೆಚ್ಚ ಭರಿಸಬೇಕಾಗಿದೆ. ಸದ್ಯದ ಪರಿಸ್ಥಿತಿಯಲ್ಲಿ ಚಿಕ್ಕಪ್ಪ ರಾಚಯ್ಯ ಅವರು ಪ್ರೋತ್ಸಾಹ ನೀಡಿದ್ದು, ಅವರೂ ಕೂಡ ಅಷ್ಟೊಂದು ಆರ್ಥಿಕವಾಗಿ ಸದೃಢರಲ್ಲದ ಕಾರಣ ಆರ್ಥಿಕ ಶಕ್ತಿ ತುಂಬವವರ
ಅವಶ್ಯಕತೆ ಅಗತ್ಯವಾಗಿದೆ. ಶಿಕ್ಷಣ ಪ್ರೇಮಿಗಳು, ಆಸಕ್ತರು ಹೆಚ್ಚಿನ ಮಾಹಿತಿಗಾಗಿ 7760838107 ಸಂರ್ಪಕಿಸಬಹುದು. ಇಬ್ಬರು ವಿದ್ಯಾರ್ಥಿಗಳು ಭಾರತೀಯ ಸ್ಟೇಟ್‌ ಬ್ಯಾಂಕ್‌ದಲ್ಲಿ ಉಳಿತಾಯ ಖಾತೆ ಹೊಂದಿದ್ದು, ಎಸ್‌.ಬಿ ಖಾತೆ ನಂ. 64053287836 ಜಮಾ ಮಾಡಬಹುದು.