ರೈತರಿಗೆ ಶೀಘ್ರದಲ್ಲೇ ಹೊಸ ಕೃಷಿ ಸಾಲ: ಪಾಟೀಲ ಭರವಸೆ

Team Udayavani, Sep 19, 2017, 1:01 PM IST

ಧಾರವಾಡ: ರೈತರಿಗೆ ಶೀಘ್ರದಲ್ಲಿಯೇ ಹೊಸ ಕೃಷಿ ಸಾಲ ನೀಡಲಾಗುವುದು ಎಂದು ಕೆಸಿಸಿ ಬ್ಯಾಂಕ್‌ ಅಧ್ಯಕ್ಷ ಐ.ಎಸ್‌. ಪಾಟೀಲ ಹೇಳಿದರು. ಸಪ್ತಾಪುರ ಬಾವಿ ಹತ್ತಿರದ ಭಗವಾನ ಸತ್ಯಸಾಯಿ ಶಿಕ್ಷಣ ಸಂಸ್ಥೆಯ ಮಹಾವಿದ್ಯಾಲಯದ ಸಭಾಂಗಣದಲ್ಲಿ ಜರುಗಿದ ಬ್ಯಾಂಕ್‌ನ 101ನೇ ವಾರ್ಷಿಕ ಸಭೆಯ ಅಧ್ಯಕ್ಷತೆ ವಹಿಸಿ ಅವರು ಮಾತನಾಡಿದರು. 

ಬ್ಯಾಂಕ್‌ನ ಆರ್ಥಿಕ ಕ್ಷಮತೆ ಆಧರಿಸಿ ಹೊಸ ಕೃಷಿ ಸಾಲ ನೀಡಲು ಆಡಳಿತ ಮಂಡಳಿ ತೀರ್ಮಾನಿಸಿದೆ. ಶೀಘ್ರದಲ್ಲಿಯೇ ಸಾಲ ವಿತರಣೆ ನಡೆಯಲಿದೆ ಎಂದು ತಿಳಿಸಿದರು. ಸರ್ಕಾರದ ಬಡ್ಡಿ ಮನ್ನಾ, ಸಾಲಮನ್ನಾ ಯೋಜನೆಗಳ ನೆರವನ್ನು ಬ್ಯಾಂಕ್‌ನ ಮೂಲಕವೇ ರೈತರಿಗೆ ಕಲ್ಪಿಸಲಾಗುತ್ತಿದೆ.

ಈ ಬಾರಿಯ ಸಾಲ ಮನ್ನಾ ಯೋಜನೆಯಲ್ಲಿ ಬ್ಯಾಂಕ್‌ನ 82459 ಸದಸ್ಯರ 27358.29 ಲಕ್ಷ ರೂ. ಸಾಲ ಮನ್ನಾ ಆಗಿದೆ. ಬ್ಯಾಂಕ್‌ ಈ ವರ್ಷ ಶತಮಾನೋತ್ಸವ ಸಂಭ್ರಮದಲ್ಲಿದ್ದು, ಡಿಸೆಂಬರ್‌ ಅಂತ್ಯದೊಳಗೆ ಸಮಾರಂಭ ಆಯೋಜಿಸಲಾಗುವುದು ಎಂದು ಘೋಷಿಸಿದರು. 

ಬ್ಯಾಂಕ್‌ ಉಪಾಧ್ಯಕ್ಷ ಎಸ್‌.ವೈ. ಪಾಟೀಲ, ಮುಖ್ಯ ಕಾರ್ಯನಿರ್ವಾಕ ಅಧಿಕಾರಿ ಎಂ.ಪಿ. ಶೆಲ್ಲಿಕೇರಿ, ಸಹಕಾರ ಸಂಘಗಳ ಉಪನಿಬಂಧಕರಾದ ಸಾವಿತ್ರಿ ಕಡಿ, ಪ್ರಧಾನ ವ್ಯವಸ್ಥಾಪಕ ವಿ.ಬಿ. ಪಾಟೀಲ ಮತ್ತು ಧಾರವಾಡ, ಗದಗ ಮತ್ತು ಹಾವೇರಿ ಜಿಲ್ಲೆಗಳ  ವಿವಿಧ ಸಹಕಾರ ಸಂಘ-ಸಂಸ್ಥೆಗಳ ಸದಸ್ಯ ಪ್ರತಿನಿ ಧಿಗಳು ಹಾಜರಿದ್ದರು. ಸಾಲ ವಿಭಾಗದ ವ್ಯವಸ್ಥಾಪಕ ಎಸ್‌.ವಿ. ಹೂಗಾರ ನಿರೂಪಿಸಿ, ವಂದಿಸಿದರು.

ಕೆಸಿಸಿ ಬ್ಯಾಂಕ್‌ ಕಳೆದ ಒಂದು ದಶಕದಿಂದಲೂ ಸತತ ಲಾಭದಲ್ಲಿ ಮುಂದುವರಿಯುವ ಮೂಲಕ ಆರ್ಥಿಕ ಸದೃಢತೆ ಸಾ ಧಿಸಿದೆ. ಕಳೆದ ಆರ್ಥಿಕ ವರ್ಷದಲ್ಲಿ 170.64 ಲಕ್ಷ ರೂ. ಲಾಭ ಗಳಿಸಿದೆ. ಬ್ಯಾಂಕ್‌ನ ಎಲ್ಲಾ 43 ಶಾಖೆಗಳನ್ನೂ ಸಿಬಿಎಸ್‌ ವ್ಯವಸ್ಥೆಯಡಿ ಗಣಕೀಕೃತಗೊಳಿಸಲಾಗಿದೆ. ಗ್ರಾಹಕರಿಗೆ ಆರ್‌ಟಿಜಿಎಸ್‌, ನೆಫ್ಟ್‌ ಮತ್ತು ಎಸ್‌ಎಂಎಸ್‌ ಬ್ಯಾಂಕಿಂಗ್‌ ಸೌಲಭ್ಯಗಳನ್ನು ಕಲ್ಪಿಸಲಾಗಿದೆ ನಡೆಯಲಿದೆ. 
-ಐ.ಎಸ್‌. ಪಾಟೀಲ, ಕೆಸಿಸಿ ಬ್ಯಾಂಕ್‌ ಅಧ್ಯಕ್ಷ