ಜಿಎಸ್‌ಟಿ ವಿರೋಧಿಸಿ ಎಲ್‌ಐಸಿ ಪ್ರತಿನಿಧಿಗಳ ಪ್ರತಿಭಟನೆ

Team Udayavani, Jul 14, 2017, 12:14 PM IST

ಧಾರವಾಡ: ಕೇಂದ್ರ ಸರಕಾರದ ನೂತನ ತೆರಿಗೆ ಪದ್ಧತಿ (ಜಿಎಸ್‌ಟಿ) ವಿರೋಧಿಸಿ ಅಖೀಲ ಭಾರತ ಜೀವ ವಿಮಾ ಪ್ರತಿನಿಧಿಗಳ ಸಂಘಟನೆ ಕರೆಯ ಮೇರೆಗೆ ಎಲ್‌ಐಸಿ ಪ್ರತಿನಿಧಿಗಳ ಕ್ಷೇಮಾಭಿವೃದ್ಧಿ ಸಂಘದ ಧಾರವಾಡ ಮುಖ್ಯ ಶಾಖೆಯ ಪ್ರತಿನಿಧಿಗಳಿಂದ ನಗರದ ಎಲ್‌ಐಸಿ ಪ್ರಧಾನ ಕಚೇರಿ ಎದುರು ಗುರುವಾರ ಪ್ರತಿಭಟನೆ ನಡೆಸಲಾಯಿತು.

ವಿಮಾ ಪ್ರತಿನಿಧಿಗಳ ಎಲ್ಲ ನ್ಯಾಯಯುತ ಬೇಡಿಕೆಗಳ ಈಡೇರಿಕೆಗೆ ಆಗ್ರಹಿಸಿ ನವದೆಹಲಿಯಲ್ಲಿ ಆಗಸ್ಟ್‌ 2ರಂದು ಪಾರ್ಲಿಮೆಂಟ್‌ ಎದುರು ಧರಣಿ ಹಮ್ಮಿಕೊಂಡಿದ್ದು, ಈ ಹೋರಾಟದ ಪೂರ್ವಭಾವಿಯಾಗಿ ಗುರುವಾರ ಬೆಳಿಗ್ಗೆ 10:30ರಿಂದ ಮಧ್ಯಾಹ್ನ 1:00 ಗಂಟೆವರೆಗೆ ಪ್ರತಿಭಟನಾ ಧರಣಿ ಕೈಗೊಳ್ಳಲಾಯಿತು. 

ಎಲ್‌ಐಸಿ ಪಾಲಿಸಿಗಳ ಮೇಲೆ ಜಿಎಸ್‌ಟಿ ಮತ್ತು ಸೇವಾ ತೆರಿಗೆ ವಿಧಿಸಬಾರದು. ಜೀವ ವಿಮಾ ಪ್ರತಿನಿಧಿಗಳಿಗೆ ಉದ್ಯೋಗ ಭದ್ರತೆ ಒದಗಿಸಬೇಕು. ಕಲ್ಯಾಣ ನಿಧಿ, ಖಾತ್ರಿ ಪಿಂಚಣಿ ಮತ್ತು ಮೆಡಿಕ್ಲೇಮ್‌ ಎಲ್ಲ ಪ್ರತಿನಿಧಿಗಳಿಗೆ ಜಾರಿಗೆ ತರಬೇಕು. ಐಆರ್‌ ಡಿಎ ಜಾರಿಗೆ ತಂದ ಹೊಸ ಕಮೀಷನ್‌ ದರವನ್ನು ಎಲ್‌ಐಸಿ ಪ್ರತಿನಿಧಿಗಳಿಗೆ ಜಾರಿ ತರಬೇಕು.

ಕೇಂದ್ರ ಸರಕಾರ ಖಾಸಗಿಯಾಗಿ ಮಂಡಿಸಿದ ವಿಮಾ ಪ್ರತಿನಿಧಿಗಳ ಕಲ್ಯಾಣ ನಿಧಿ-ಉದ್ಯೋಗ ಭದ್ರತೆ ವಿಧೇಯಕ ಅನುಮೋದಿಸಬೇಕು ಎಂದು ಆಗ್ರಹಿಸಲಾಯಿತು. ಅಖೀಲ ಭಾರತ ಜೀವ ವಿಮಾ ಪ್ರತಿನಿಧಿಗಳ ಸಂಘಟನೆ ರಾಜ್ಯಾಧ್ಯಕ್ಷ ಎಸ್‌. ಎಫ್‌. ಸಿಂದಗಿ, ರಾಜ್ಯ ಉಪಾಧ್ಯಕ್ಷರೂ ಆಗಿರುವ ವಿಭಾಗ ಅಧ್ಯಕ್ಷ ಶಂಕರ ಕುಂಬಿ, ರಾಜ್ಯ ಉಪಾಧ್ಯಕ್ಷ ಆನಂದ ಅಮರಶೆಟ್ಟಿ, ಮುಖ್ಯ ಶಾಖೆ ಅಧ್ಯಕ್ಷ ಆರ್‌.ಎಸ್‌.ಫಟಪನದಿ, ಕೋಶಾಧ್ಯಕ್ಷ ಎಂ.ಎ.ಘಾಟವಾಲೆ ಇದ್ದರು.