ದಾಖಲೆ ಪರಿಶೀಲಿಸಿದ ಸಿಐಡಿ ತಂಡ

Team Udayavani, Apr 29, 2017, 12:50 PM IST

ಕಲಘಟಗಿ: ಕೋಟ್ಯಂತರ ರೂ. ವಂಚನೆ ಮಾಡಿ ಪರಾರಿಯಾದ ಪ್ರಕರಣದ ತನಿಖೆ ನಡೆಸುತ್ತಿರುವ ಸಿಐಡಿ ತನಿಖಾ ತಂಡವು, ಶುಕ್ರವಾರ ಆರೋಪಿಗಳ ಮನೆ, ಕಚೇರಿಗಳಿಗೆ ಭೇಟಿ ನೀಡಿತು. ನಂತರ ಕಲಘಟಗಿ ವಿವಿಧೋದ್ದೇಶ ಸೌಹಾರ್ದ ಸಹಕಾರಿ ಬ್ಯಾಂಕ್‌ಗೆ ತೆರಳಿ ಕಡತ ಮತ್ತು ದಾಖಲಾತಿಗಳನ್ನು ಪರಿಶೀಲಿಸಿತು. 

ಈಗಾಗಲೇ ಸ್ಥಳೀಯ ಪೊಲೀಸರು ಸೀಜ್‌ ಮಾಡಿರುವ ಪಟ್ಟಣದ ಸೋಮಲಿಂಗೇಶ್ವರ ಮಠದ ಎದುರಿನ ಮಹಡಿ ಮನೆ, ಹಳೆಯ ನ್ಯಾಯಾಲಯದ ಕೆಳಗಡೆ ಇರುವ ಮನೆ ಮತ್ತು ಕಾರ್ಯಾಲಯ, ಯುವಶಕ್ತಿ ಸರ್ಕಲ್‌ ನಲ್ಲಿರುವ ಪಟ್ಟಣ ಪಂಚಾಯತ ವಾಣಿಜ್ಯ ಮಳಿಗೆಯಲ್ಲಿರುವ ಕಾರ್ಯಾಲಯದ ಕಟ್ಟಡಗಳನ್ನು ವೀಕ್ಷಿಸಿದರು.

ಹಣ ಹೂಡಿ ವಂಚನೆಗೊಳಗಾದ ಬಹುತೇಕರ ಹತ್ತಿರ  ಇರುವ ಸಹಕಾರಿ ಬ್ಯಾಂಕ್‌ನ ವಿತ್‌ಡ್ರಾವಲ್‌ ಸ್ಲಿಪ್‌ಗ್ಳನ್ನು ಕಂಡ ತನಿಖಾ ತಂಡ, ನೇರವಾಗಿ ಕಲಘಟಗಿ ವಿವಿಧೋದ್ದೇಶ  ಸೌಹಾರ್ದ ಸಹಕಾರಿ ಬ್ಯಾಂಕ್‌ಗೆ ತೆರಳಿ ಕಡತ ಮತ್ತು ದಾಖಲಾತಿಗಳನ್ನು ಪರಿಶೀಲಿಸಿತು. 

ಈ ಸಂದರ್ಭದಲ್ಲಿ ಮಾತನಾಡಿದ ಸಿಐಡಿ ಉಪ ಪೊಲೀಸ್‌ ವರಿಷ್ಠಾಧಿಕಾರಿ  ಸತ್ಯನಾರಾಯಣ ಕುದೂರ, ಹಣ ಕಳೆದುಕೊಂಡು ತೊಂದರೆಯಲ್ಲಿ ಸಿಲುಕಿರುವ ಸಾರ್ವಜನಿಕರಿಗೆ ಯಾವುದೇ ತೊಂದರೆಯಾಗದಂತೆ ತನಿಖೆ ನಡೆಸಲಾಗುವುದು.  ಹೂಡಿಕೆದಾರರು ಮಾಹಿತಿ ನೀಡಲು ಹಿಂಜರಿಯಬಾರದು. 

ಎಲ್ಲ ಮಾಹಿತಿಗಳನ್ನೂ ನೀಡುವುದರಿಂದ ತನಿಖೆಗೆ ಸಹಕಾರಿಯಾಗಲಿದೆ. ಈ ವಂಚನೆ ಪ್ರಕರಣದಲ್ಲಿ ಖಾಸನೀಸ್‌  ಸಹೋದರರಿಗೆ ಸಹಕರಿಸಿದ ಎಲ್ಲರಿಂದಲೂ ಮಾಹಿತಿ ಸಂಗ್ರಹಿಸಿ ಕ್ರಮ ಜರುಗಿಸಲಾಗುವುದು ಎಂದರು. ಶೀಘ್ರದಲ್ಲಿ ಆರೋಪಿಗಳನ್ನು ಬಂಧಿಸಲಾಗುವುದು. ಇದರಲ್ಲಿ ಸಂಶಯ ಬೇಡ ಎಂದರು.