ತಂತ್ರಜ್ಞಾನ ಬಳಕೆಯಿಂದ ಸೃಜನಶೀಲತೆ ಕಡಿಮೆ

Team Udayavani, Jun 14, 2017, 5:05 PM IST

ಧಾರವಾಡ: ಹೆಚ್ಚು ಜ್ಞಾನವಂತರಾಗುವ ಪ್ರಕ್ರಿಯೆಯಲ್ಲಿ ಓದುವುದು ಹಾಗೂ ಬರೆಯುವುದು ತುಂಬಾ ಮಹತ್ವದ ಪಾತ್ರ ವಹಿಸುತ್ತದೆ ಎಂದು ಕವಿವಿ ಸಮಾಜ ವಿಜ್ಞಾನ ನಿಕಾಯದ ಡೀನ್‌ ಪ್ರೊ|ವಿಜಯಲಕ್ಷ್ಮೀ ಅಮ್ಮಿನಭಾವಿ ಅಭಿಪ್ರಾಯಪಟ್ಟರು. ಕರ್ನಾಟಕ ವಿಶ್ವವಿದ್ಯಾಲಯದಲ್ಲಿ ಸಂಶೋಧನಾ ವಿದ್ಯಾರ್ಥಿಗಳಿಗಾಗಿ ಅಕಾಡೆಮಿಕ್‌ ರೀಡಿಂಗ್‌ ಮತ್ತು ರೈಟಿಂಗ್‌ ಕುರಿತು ಹಮ್ಮಿಕೊಂಡ ಏಳು ದಿನಗಳ ಕಾರ್ಯಾಗಾರ ಉದ್ಘಾಟಿಸಿ ಅವರು ಮಾತನಾಡಿದರು.

ತಂತ್ರಜ್ಞಾನ ಬಳಕೆಯಿಂದ ದಿನದಿಂದ ದಿನಕ್ಕೆ ಸೃಜನಶೀಲತೆ ಕಡಿಮೆಯಾಗುತ್ತಿದೆ. ಪ್ರಸ್ತುತ ಎಲ್ಲ  ಹಂತಗಳಲ್ಲಿ ಮಕ್ಕಳಲ್ಲಿ ಓದುವ ಹವ್ಯಾಸ ಕಡಿಮೆಯಾಗುತ್ತಿದ್ದು, ಪತ್ರಿಕೆಗಳನ್ನು ಓದುವುದನ್ನು ಹೆಚ್ಚು ರೂಢಿಸಿಕೊಳ್ಳಬೇಕು  ಎಂದರು. ದೆಹಲಿ ವಿಶ್ವವಿದ್ಯಾಲಯದ ಸಮಾಜಶಾಸ್ತ್ರ ಪ್ರಾಧ್ಯಾಪಕ ಸತೀಶ ದೇಶಪಾಂಡೆ ಮಾತನಾಡಿ, ಭಾರತದಲ್ಲಿ ಇಂದು ಬಹುತೇಕ ಎಲ್ಲ ವಿಶ್ವವಿದ್ಯಾಲಯಗಳಲ್ಲಿ ಪ್ರವೇಶ  ಪಡೆಯುವವರಲ್ಲಿ ಅರೆಜ್ಞಾನವುಳ್ಳ ವಿದ್ಯಾರ್ಥಿಗಳ ಸಂಖ್ಯೆ ಹೆಚ್ಚಾಗಿದೆ. 

ಉನ್ನತ ಶಿಕ್ಷಣಕ್ಕೆ ಪರಿಪೂರ್ಣ ವಿದ್ಯಾರ್ಥಿಗಳನ್ನು ತಯಾರಿಸುವಲ್ಲಿ ಮೂಲಭೂತವಾಗಿ ಓದು ಮತ್ತು ಬರಹದ  ತಂತ್ರಗಳನ್ನು ಕಲಿಯುವುದು ತುಂಬಾ ಅಗತ್ಯ ಎಂದರು. ಕವಿವಿ ಮಾನವ ಸಂಪನ್ಮೂಲ ಅಭಿವೃದ್ಧಿ ಕೇಂದ್ರದ ನಿರ್ದೇಶಕ ಪ್ರೊ|ಹರೀಶ ರಾಮಸ್ವಾಮಿ  ಮಾತನಾಡಿ, ಓದಿನ  ಕೊರತೆಯಿಂದ ಇಂದು ಸಂಶೋಧನೆ ಕ್ಷೇತ್ರ ಬಡವಾಗುತ್ತಿದ್ದು, ವಿವಿಗಳಲ್ಲಿ ಈ ತರಹದ ಪ್ರಾಯೋಗಿಕ ಓದು ಬರಹದ ತಂತ್ರಗಳನ್ನು ತಿಳಿಸಿಕೊಡುವ ಕಾರ್ಯಾಗಾರ ಬಹಳ ಮಹತ್ವದ್ದಾಗಿದೆ. 

ವಿದ್ಯಾರ್ಥಿಗಳು ಇದರ ಪ್ರಯೋಜನ ಪಡೆಯಬೇಕು ಎಂದರು. ಸಮಾಜಶಾಸ್ತ್ರ ವಿಭಾಗದ ಮುಖ್ಯಸ್ಥ ಪ್ರೊ|ಸೋಮಶೇಖರಪ್ಪ ಅಧ್ಯಕ್ಷತೆ ವಹಿಸಿದ್ದರು. ಪ್ರೊ| ದೃವಾ ಜ್ಯೋತಿ, ಡಾ|ಹನಮಗೌಡ ಸಿ, ಡಾ|ಶಿವಕುಮಾರ ಕೆ,ಡಾ|ಜೆ.ಎಂ.ಚಂದುನವರ, ಡಾ| ಸುರೇಶ್‌ ಆರ್‌, ಸಮಾಜ ಕಾರ್ಯ ವಿಭಾಗದ ಮುಖ್ಯಸ್ಥ ಡಾ|ಎಸ್‌. ವೈ.ಸ್ವಾ , ರವೀಂದ್ರ, ಡಾ|ಎಸ್‌. ಬಿ.ಸುಗಂ  ಇದ್ದರು. ಡಾ|ತ್ರಿವೇಣಿ ಎಸ್‌ ಸ್ವಾಗತಿಸಿದರು.ಪ್ರೊ|ಶೌಕತ್‌ ಅಜೀಮ ಪರಿಚಯಿಸಿದರು. ಪ್ರೊ|ಜಯಶ್ರೀ ವಂದಿಸಿದರು. ಮೌನೇಶ ಬಡಿಗೇರ ನಿರೂಪಿಸಿದರು.