ವಿಜೃಂಭಣೆಯ ಶಿವಾಜಿ-ಬಸವೇಶ್ವರ ಜಯಂತಿ

Team Udayavani, Apr 18, 2018, 4:46 PM IST

ಹುಬ್ಬಳ್ಳಿ: ಇಲ್ಲಿನ ಬಾನಿ ಓಣಿ ಶ್ರೀ ಶಕ್ತಿ ಯುವಕ ಮಂಡಳದಿಂದ ಮಂಗಳವಾರ ಶ್ರೀ ಛತ್ರಪತಿ ಶಿವಾಜಿ ಮಹಾರಾಜರ 391ನೇ
ಹಾಗೂ ಜಗಜ್ಯೋತಿ ಬಸವೇಶ್ವರರ 886ನೇ ಜಯಂತ್ಯುತ್ಸವ ಕಾರ್ಯಕ್ರಮ ನಿಮಿತ್ತ ಮೆರವಣಿಗೆ ನಡೆಸಲಾಯಿತು.

ಮಧ್ಯಾಹ್ನ 12 ಗಂಟೆ ಸುಮಾರಿಗೆ ಆರಂಭಗೊಂಡ ಮೆರವಣಿಗೆಗೆ ಆಕ್ಸ್‌ಫ‌ರ್ಡ್‌ ಕಾಲೇಜು ಅಧ್ಯಕ್ಷ ವಸಂತ
ಹೊರಟ್ಟಿ ಚಾಲನೆ ನೀಡಿದರು. ಛತ್ರಪತಿ ಶಿವಾಜಿ ಮಹಾರಾಜ, ಜಗಜ್ಯೋತಿ ಬಸವೇಶ್ವರ ಹಾಗೂ ಭಗೀರಥ ಮಹರ್ಷಿಗಳ
ಮೂರ್ತಿಗಳ ಮೆರವಣಿಗೆ ಕೈಗೊಳ್ಳಲಾಯಿತು. ಮೆರವಣಿಗೆ ಕೊಯಿನ್‌ ರಸ್ತೆ, ಸ್ಟೇಶನ್‌ ರಸ್ತೆ, ಮರಾಠಗಲ್ಲಿ, ತುಳಜಾಭವಾನಿ ವೃತ್ತ, ದಾಜೀಬಾನ ಪೇಟೆ, ಸಂಗೊಳ್ಳಿ ರಾಯಣ್ಣ ವೃತ್ತದ ಮೂಲಕ ತೆರಳಿತು. ಮೆರವಣಿಗೆಯಲ್ಲಿ ನೂರಾರು ಯುವಕರು ಸಂಗೀತಕ್ಕೆ ಹೆಜ್ಜೆ ಹಾಕಿದರು. ಹಳೇಹುಬ್ಬಳ್ಳಿ ದುರ್ಗದ ಬಯಲು, ಆನಂದ ನಗರ, ಗೋಪನಕೊಪ್ಪ ಸೇರಿದಂತೆ ನಗರದ ವಿವಿಧೆಡೆ ಛತ್ರಪತಿ ಶಿವಾಜಿ ಮಹಾರಾಜರ ಜಯಂತ್ಯುತ್ಸವ ಆಚರಿಸಲಾಯಿತು.

ಜೆಡಿಎಸ್‌: ಇಲ್ಲಿನ ಗೋಪನಕೊಪ್ಪದಲ್ಲಿ ಮಂಗಳವಾರ ಹು-ಧಾ ಕೇಂದ್ರ ವಿಧಾನಸಭಾ ಕ್ಷೇತ್ರದ ಜೆಡಿಎಸ್‌ ಅಭ್ಯರ್ಥಿ ರಾಜಣ್ಣಾ ಕೊರವಿ ಶಿವಾಜಿ ಭಾವಚಿತ್ರಕ್ಕೆ ಪುಷ್ಪ ಅರ್ಪಿಸಿ ಶಿವಾಜಿ ಜಯಂತಿ ಆಚರಿಸಿದರು. ಅಶೋಕ ಕಾಶನ್ನವರ, ನವೀನ ಮುನಿಯಪ್ಪನವರ, ದೀಪಕ ಚಿಕ್ಕೋಡಿ, ಸುಂದರ ನಾಯ್ಕ, ಅರ್ಜುನ ಬಂಕಾಪುರ ಇನ್ನಿತರರಿದ್ದರು.