ಶೈಕ್ಷಣಿಕ ಏಳ್ಗೆಗೆ ಶ್ರಮಿಸಿದ ಮಹಾನ್‌ ವ್ಯಕ್ತಿ ಸಿದ್ದಪ್ಪ ಕಂಬಳಿ

Team Udayavani, Sep 12, 2017, 12:36 PM IST

ಧಾರವಾಡ: ಕಷ್ಟದ ಜೀವನದಲ್ಲಿ ಶಿಕ್ಷಣ ಪಡೆದು, ತಾವು ಪಟ್ಟ ಕಷ್ಟಗಳು ಉತ್ತರ ಕರ್ನಾಟಕದ ವಿದ್ಯಾರ್ಥಿಗಳಿಗೆ ಬರಬಾರದೆಂದು ಈ ಭಾಗದ ಶೈಕ್ಷಣಿಕ ಏಳ್ಗೆಗೆ ಶ್ರಮಿಸಿದವರು ಸರ್‌ ಸಿದ್ದಪ್ಪ ಕಂಬಳಿ ಅವರು ಎಂದು ಜಿಲ್ಲಾ ಉಸ್ತುವಾರಿ ಸಚಿವ ವಿನಯ ಕುಲಕರ್ಣಿ ಹೇಳಿದರು. 

ನಗರದ ಸೃಜನಾ ರಂಗಮಂದಿರದಲ್ಲಿ ಸೋಮವಾರ ನಡೆದ ಸರ್‌ ಸಿದ್ದಪ್ಪ ಕಂಬಳಿಯವರ 136ನೇ ಜಯಂತ್ಯುತ್ಸವ ಸಮಾರಂಭದಲ್ಲಿ ಅವರು ಮಾತನಾಡಿದರು. ಅಂದು ಕಾರಣಾಂತರಗಳಿಂದ ಬ್ರಿಟಿಷರು ಪುಣೆಯ ಡೆಕ್ಕನ್‌ ಕಾಲೇಜನ್ನು ಬಂದ್‌ ಮಾಡಿದರು. ಆಗ ಉನ್ನತ ಶಿಕ್ಷಣ ಕಾಲೇಜನ್ನು ಧಾರವಾಡದಲ್ಲಿ ಸ್ಥಾಪಿಸಬೇಕೆಂಬ ಮಹತ್ವಾಕಾಂಕ್ಷೆ ಹೊಂದಿದ್ದ ಕಂಬಳಿಯವರು ಅದನ್ನು ಸಾಕಾರಗೊಳಿಸುವಲ್ಲಿ ಯಶಸ್ವಿಯಾದರು.

ಉನ್ನತ ಶಿಕ್ಷಣಕ್ಕೆ ಪುಣೆ ಮತ್ತು ಮುಂಬೈಗೆ ಹೋಗಬೇಕಿದ್ದ ಅಂದಿನ ಅನಿವಾರ್ಯತೆಯನ್ನು ಮನಗಂಡು ಧಾರವಾಡದಲ್ಲಿ ಕರ್ನಾಟಕ ಮಹಾವಿದ್ಯಾಲಯ ಸ್ಥಾಪನೆಗೆ ಶ್ರಮಿಸಿದವರಲ್ಲಿ ಸರ್‌ ಸಿದ್ದಪ್ಪ ಕಂಬಳಿ ಪ್ರಮುಖರು ಎಂದರು. ಸರ್‌ ಕಂಬಳಿಯವರು ಧಾರವಾಡದ ಮುರುಘಾಮಠಕ್ಕೆ 74 ಎಕರೆ ಜಮೀನನ್ನು ದಾನವಾಗಿ ನೀಡಿ ಆ ಭೂಮಿಯಿಂದ ಬರುವ ಉತ್ಪನ್ನವನ್ನು ವಿದ್ಯಾರ್ಥಿಗಳಿಗೆ ಅನ್ನ ಸಂತರ್ಪಣೆ ಮಾಡುವಂತೆ ತಿಳಿಸಿದ್ದನ್ನು ನಾವು ಸ್ಮರಿಸಬಹುದು. 

ಬಸವಣ್ಣನವರು ಸುಮಾರು 900 ವರ್ಷಗಳ ಹಿಂದೆ ಸಮಾನತೆಯ ಸಂದೇಶವನ್ನು ಎಲ್ಲೆಡೆ ಸಾರಿದ ಮೊದಲ ಮಹಾನ್‌ ವ್ಯಕ್ತಿಯಾಗಿದ್ದಾರೆ. ಅವರ ಸಮಾನತೆಯ ಅಂಶವನ್ನು ಡಾ| ಬಿ.ಆರ್‌. ಅಂಬೇಡ್ಕರ್‌ ಅವರು ಸಂವಿಧಾನದಲ್ಲಿ ಅಳವಡಿಸುವ ಮೂಲಕ ಅದನ್ನು ಅನುಷ್ಠಾನಕ್ಕೆ ತಂದಿದ್ದಾರೆ ಎಂದರು. 

ಅಧ್ಯಯನ ಪೀಠವಾಗಲಿ: ಅಧ್ಯಕ್ಷತೆ ವಹಿಸಿದ್ದ ಕರ್ನಾಟಕ ವಿಶ್ವವಿದ್ಯಾಲಯದ ಕುಲಸಚಿವ ಡಾ| ಮಲ್ಲಿಕಾರ್ಜುನ ಪಾಟೀಲ ಮಾತನಾಡಿ, ಸರ್‌ ಸಿದ್ಧಪ್ಪ ಕಂಬಳಿ ಹಾಗೂ ರೂದ್ದ ಶ್ರೀನಿವಾಸ ರಾಯರು ಹಾಗೂ ಕೆಸಿಡಿ ಕಾಲೇಜಿನ ಸಂಸ್ಥಾಪಕರಾದ ಅರಟಾಳ ರುದ್ರಗೌಡರು ಶಿಕ್ಷಣ ಕ್ಷೇತ್ರಕ್ಕೆ ಬಹಳಷ್ಟು ಹೋರಾಟ ಮಾಡಿದ್ದಾರೆ. 

ಈ ಮೂವರು ಮಹನೀಯರ ಹೆಸರಿನಲ್ಲಿ ಒಂದು ಪೀಠ ಸ್ಥಾಪನೆಯಾಗಬೇಕಿದೆ ಎಂದು ಅಭಿಪ್ರಾಯ ವ್ಯಕ್ತಪಡಿಸಿದರು. ಶಾಸಕ ಅರವಿಂದ ಬೆಲ್ಲದ ಸರ್‌ ಸಿದ್ದಪ್ಪ ಕಂಬಳಿ ಅವರ ಭಾವಚಿತ್ರಕ್ಕೆ ಪುಷ್ಪಾರ್ಪಣೆ ಮಾಡಿ ಕಾರ್ಯಕ್ರಮಕ್ಕೆ ಚಾಲನೆ ನೀಡಿದರು.

ಕರ್ನಾಟಕ ಕಲಾ ಮಹಾವಿದ್ಯಾಲಯದ ಪ್ರಾಚಾರ್ಯ ಡಾ| ರಾಜೇಶ್ವರಿ ಮಹೇಶ್ವರಯ್ಯ, ವಿಜ್ಞಾನ ವಿಭಾಗದ ಡಾ| ಮೂನಿಮನಿ, ಸಂಗೀತ ವಿಭಾಗದ ಪ್ರಾಚಾರ್ಯ ಡಾ| ಎಂ.ಎಸ್‌. ತರ್ಲಗಟ್ಟಿ ಸೇರಿದಂತೆ ಹಲವರು ಇದ್ದರು. ಖ್ಯಾತ ಸಂಗೀತ ಶಿಕ್ಷಕಿ ಡಾ| ಶಕ್ತಿ ಪಾಟೀಲ ಹಾಗೂ ತಂಡದವರಿಂದ ಗಾಯನ ಕಾರ್ಯಕ್ರಮ ನಡೆಯಿತು.