ಸ್ಮಾರ್ಟ್‌ ಕಾಮಗಾರಿಗೆ ಲಾಕ್‌ಡೌನ್‌ ವರ

Team Udayavani, Jun 16, 2021, 2:54 PM IST

ವರದಿ: ಹೇಮರಡ್ಡಿ ಸೈದಾಪುರ

ಹುಬ್ಬಳ್ಳಿ: ಸ್ಮಾರ್ಟ್‌ ಸಿಟಿ ಯೋಜನೆಯಡಿ ನಡೆಯುತ್ತಿರುವ ಸ್ಮಾರ್ಟ್‌ ರಸ್ತೆ ಕಾಮಗಾರಿ ನಿರೀಕ್ಷೆಗೂ ಮೀರಿ ಪ್ರಗತಿ ಕಂಡಿದ್ದು, ಲಾಕ್‌ಡೌನ್‌ ಸಂದರ್ಭದಲ್ಲಿ ವಾಹನ, ಜನರ ಓಡಾಟ ಇಲ್ಲದ ಪರಿಣಾಮ ಶೇ.50ಕ್ಕೂ ಕಡಿಮೆ ಕಾರ್ಮಿಕರನ್ನು ಬಳಕೆ ಮಾಡಿಕೊಂಡು ಕಡಿಮೆ ಅವಧಿಯಲ್ಲಿ ಶೇ.70-75 ಕಾಮಗಾರಿ ಪೂರ್ಣಗೊಳಿಸಿದ್ದಾರೆ.

ಸ್ಮಾರ್ಟ್‌ಸಿಟಿ ಕಂಪನಿಯ ಸ್ಮಾರ್ಟ್‌ ರಸ್ತೆಗಳ ಕಾಮಗಾರಿ ಆರಂಭವಾದಾಗ ಸ್ಥಳೀಯ ವ್ಯಾಪಾರಿಗಳು, ಜನರು ಕಾಮಗಾರಿ ಮುಗಿಯುವುದು ಯಾವಾಗ ಎಂಬ ಅನುಮಾನ ವ್ಯಕ್ತಪಡಿಸಿದ್ದರು. ಆದರೆ ಲಾಕ್‌ಡೌನ್‌ ಅವಧಿಯನ್ನು ಸ್ಮಾರ್ಟ್‌ಸಿಟಿ ಅಧಿಕಾರಿಗಳು, ಗುತ್ತಿಗೆದಾರರು ಸದ್ಬಳಕೆ ಮಾಡಿಕೊಂಡಿದ್ದಾರೆ. ಹೀಗಾಗಿ ಮೂರ್‍ನಾಲ್ಕು ತಿಂಗಳಲ್ಲಿ ಮುಗಿಯಬೇಕಾದ ಕಾರ್ಯವನ್ನು ಬಹುತೇಕ ಪೂರ್ಣಗೊಳಿಸಿದ್ದಾರೆ.

ಶೇ.70 ಕಾಮಗಾರಿ ಪೂರ್ಣ: ಇದೀಗ ಸ್ಮಾರ್ಟ್‌ ರಸ್ತೆ ಪ್ಯಾಕೇಜ್‌ 2 ಹಾಗೂ 3 ಕಾಮಗಾರಿ ಸ್ಟೇಶನ್‌ ರಸ್ತೆ, ಜೆ.ಸಿ. ನಗರ, ದುರ್ಗದ ಬಯಲು, ಮರಾಠಗಲ್ಲಿ, ಅಂಚಟಗೇರಿ ಓಣಿ, ಬೆಳಗಾಂವಕರ ಗಲ್ಲಿ, ತಬೀಬ್‌ ಲ್ಯಾಂಡ್‌, ಗಣೇಶ ಪೇಟೆ, ದಾಜೀಬಾನ ಪೇಟೆ, ತುಳಜಾಭವಾನಿ ವೃತ್ತ ಸೇರಿದಂತೆ ಸುತ್ತಲಿನ ಪ್ರದೇಶಗಳಲ್ಲಿ ನಡೆಯುತ್ತಿವೆ. ಇತರೆ ದಿನಗಳಲ್ಲಿ ಈ ಭಾಗದಲ್ಲಿ ಕಾಮಗಾರಿಗಳನ್ನು ಕೈಗೊಳ್ಳುವುದು ಸವಾಲಿನ ಕಾರ್ಯ. ಆದರೆ ಲಾಕ್‌ಡೌನ್‌ ಅವ ಧಿ ಸದ್ಬಳಕೆ ಮಾಡಿಕೊಂಡು ಅಗತ್ಯ ಕಾರ್ಯಗಳನ್ನು ಬಹುತೇಕ ಪೂರ್ಣಗೊಳಿಸಿದ್ದಾರೆ. ಕೇವಲ ಒಂದೂವರೆ ತಿಂಗಳ ಅವಧಿಯಲ್ಲಿ ಶೇ.70 ಕಾಮಗಾರಿ ಪೂರ್ಣಗೊಳಿಸಿದ್ದು ಈ ಭಾಗದ ಚಿತ್ರಣವೇ ಬದಲಾಗಿದೆ.

ಕೋವಿಡ್‌ ನಿಯಮಗಳ ಪ್ರಕಾರ ಶೇ.50 ಕ್ಯಾಂಪ್‌ ಕಾರ್ಮಿಕರನ್ನು ಬಳಸಿಕೊಂಡು ರಸ್ತೆ ಎರಡು ಬದಿಯಲ್ಲಿ ತೆರೆದ ಗಟಾರ, ಡಕ್ಟ್ ಪೂರ್ಣಗೊಂಡಿದೆ.

ಇಡೀ ಯೋಜನೆಯ ಪ್ರಾಥಮಿಕ ಹಾಗೂ ದೊಡ್ಡ ಕಾರ್ಯಗಳಿವು. ಸಾಮಾನ್ಯ ದಿನಗಳಲ್ಲಿ ಹಗಲು ಹೊತ್ತಿನಲ್ಲಿ ಬಾರ್‌ ಬೆಂಡಿಂಗ್‌ ಕೆಲಸ ರಾತ್ರಿ ಕಾಂಕ್ರೀಟ್‌ ಹಾಕಲಾಗುತ್ತಿತ್ತು. ಇದೀಗ ಲಾಕ್‌ಡೌನ್‌ ಇರುವುದರಿಂದ ಹಗಲು ಹೊತ್ತಿನಲ್ಲಿ ಎಲ್ಲಾ ಕೆಲಸ ನಿರ್ವಹಿಸಿದ್ದು, ಇರುವ ಅಲ್ಪ ಕಾರ್ಮಿಕರ ಮೇಲೂ ಯಾವುದೇ ಒತ್ತಡ ಬೀಳಲಿಲ್ಲ. ಪ್ರಮುಖ ಕಾಮಗಾರಿಗಳಲ್ಲಿ ಜಂಕ್ಷನ್‌ಗಳಲ್ಲಿ ಸಿಡಿ ನಿರ್ಮಾಣಕ್ಕಾಗಿ ರಸ್ತೆ ಸಂಚಾರ ತಡೆದು ನಿರ್ಮಾಣ ಕಾರ್ಯ ನಡೆಸಬೇಕಾಗಿತ್ತು. ಕನಿಷ್ಟ 10-14 ದಿನಗಳು ಬೇಕಾಗುತ್ತಿತ್ತು. ಇನ್ನೂ ಪ್ರಮುಖ ಮಾರುಕಟ್ಟೆ ಸ್ಥಳಗಳಲ್ಲಿನ ಜಂಕ್ಷನ್‌ಗಳಲ್ಲಿ ರಸ್ತೆ ಅಗೆಯುವುದು ಸುಲಭವೂ ಆಗಿರಲಿಲ್ಲ. ಇನ್ನೂ 50-60 ವರ್ಷಗಳ ಹಳೆಯದಾದ ನಾಲಾಗಳನ್ನು ಸ್ವತ್ಛಗೊಳಿಸಿ ನೀರಿನ ಹರಿವು ಗಮನಿಸಿ ವ್ಯವಸ್ಥಿತವಾಗಿ ನಿರ್ಮಿಸಲು ಸಾಧ್ಯವಾಗಿದೆ.