ಹುಬ್ಬಳ್ಳಿ : ವ್ಯಕ್ತಿಗೆ ಕೃತಕ ತಲೆ ಬುರುಡೆ ಯಶಸ್ವಿ ಜೋಡಣೆ

Team Udayavani, Apr 26, 2021, 7:18 PM IST

ಹುಬ್ಬಳ್ಳಿ: ಸುಮಾರು 52 ವರ್ಷ ವಯಸ್ಸಿನ ಸರಕಾರಿ ನೌಕರರೊಬ್ಬರಿಗೆ ಟೈಟಾನಿಯಂ ಕೃತಕ ತಲೆಬುರುಡೆಯನ್ನು ಇಲ್ಲಿನ ಬಾಲಾಜಿ ಆಸ್ಪತ್ರೆ ವೈದ್ಯರು ಯಶಸ್ವಿಯಾಗಿ ಅಳವಡಿಕೆ ಮಾಡಿದ್ದಾರೆಂದು ಆಸ್ಪತ್ರೆ ಚೇರ್ಮನ್‌ ಹಾಗೂ ನರರೋಗ ತಜ್ಞ ಡಾ| ಕ್ರಾಂತಿಕಿರಣ ತಿಳಿಸಿದ್ದಾರೆ.

ಮೆದುಳಿನ ಸ್ಟ್ರೋಕ್‌ನಿಂದ ಕೋಮಾ ಸ್ಥಿತಿಯಲ್ಲಿ ನೌಕರ ಆಸ್ಪತ್ರೆಗೆ ದಾಖಲಾಗಿದ್ದರು. ಮೆದುಳಿನ ಬಲಭಾಗ ಒಂದೆಡೆಗೆ ತೀವ್ರ ಬಾವು ಬಂದ ಪರಿಣಾಮದಿಂದ ಚಿಂತಾಜನಕ ಸ್ಥಿತಿಯಲ್ಲಿ ಇದ್ದರು. ಬಲಭಾಗದ ಬುರುಡೆ ಕತ್ತರಿಸಿ ಶಸ್ತ್ರಚಿಕಿತ್ಸೆ ನಡೆಸಲಾಗಿತ್ತು. ಕತ್ತರಿಸಿದ ತಲೆ ಬುರುಡೆ ಜೋಡಿಸಿದಲ್ಲಿ ಮೆದುಳಿಗೆ ಹೆಚ್ಚಿನ ಭಾರವಾಗುವ ಸಾಧ್ಯತೆಯಿಂದ ಶಸ್ತ್ರಚಿಕಿತ್ಸೆ ಭಾಗವನ್ನು ತೊಡೆಭಾಗದ ಚರ್ಮದಿಂದ ಮುಚ್ಚಿಡಲಾಗಿತ್ತು.

ವಿಶೇಷ ಲೋಹದಿಂದ ತಯಾರಿಸಲಾದ ಹಾಗೂ ಸಹಜ ಮೂಳೆಗಿಂತ ಹೆಚ್ಚು ಶಕ್ತಿಯಾಲಿಯಾದ ಟೈಟಾನಿಯಂ ಕೃತಕ ಬುರುಡೆಯನ್ನು ಬೆಂಗಳೂರಿನ ಕಂಪೆನಿಯಿಂದ ತರಿಸಿ ಅಳವಡಿಸಿದ್ದು, ಶಸ್ತ್ರಚಿಕಿತ್ಸೆ ಯಶಸ್ವಿಯಾಗಿ ರೋಗಿ ಚೇತರಿಸಿಕೊಂಡಿದ್ದಾರೆಂದು ಅವರು ತಿಳಿಸಿದ್ದಾರೆ.