ಸನ್ನದ್ಧ ಪದವೀಧರರ ರೂಪಿಸಿ

Team Udayavani, Jan 10, 2017, 12:29 PM IST

ಹುಬ್ಬಳ್ಳಿ: ಜಾಗತಿಕ ಸ್ಪರ್ಧೆಗೆ ಸನ್ನದ್ಧ ಪದವೀಧರರನ್ನು ರೂಪಿಸದಿದ್ದರೆ ಎಂಜಿನಿಯರಿಂಗ್‌ ಕಾಲೇಜುಗಳು ಪ್ರಾಮುಖ್ಯತೆ ಕಳೆದುಕೊಳ್ಳಲಿವೆ ಎಂದು ಎಂದು ಉದ್ಯಮ ತಜ್ಞ ಅಶೋಕ ಸನ್ಮನಿ ಹೇಳಿದರು. ಕೆಎಲ್‌ಇ ಇನ್ಸ್‌ಟಿಟ್ಯೂಟ್‌ ಆಫ್ ಟೆಕ್ನಾಲಜಿಯ ಮೆಕ್ಯಾನಿಕಲ್‌ ಎಂಜಿನಿಯರಿಂಗ್‌ ವಿಭಾಗ ಸೋಮವಾರ ಆಯೋಜಿಸಿದ್ದ ಇಂಡಸ್ಟ್ರಿ ಓರಿಯಂಟೆಡ್‌ ಇಂಟರ್ನ್ಶಿಪ್‌ ಪ್ರೋಗ್ರಾಮ್‌ ಉದ್ಘಾಟನಾ ಕಾರ್ಯಕ್ರಮದಲ್ಲಿ ಅವರು ಮಾತನಾಡಿದರು.

ದೇಶದಲ್ಲಿ ಎಂಜಿನಿಯರಿಂಗ್‌ ಕಾಲೇಜುಗಳು ನಾಯಿಕೊಡೆಗಳಂತೆ ಹುಟ್ಟಿಕೊಳ್ಳುತ್ತಿದ್ದು, ಸದ್ಯ ದೇಶದಲ್ಲಿ 3800 ಕಾಲೇಜುಗಳಿದ್ದು, ಮುಂದಿನ 5 ವರ್ಷಗಳಲ್ಲಿ 1000 ಎಂಜಿನಿಯರಿಂಗ್‌ ಕಾಲೇಜುಗಳು ಬಂದ್‌ ಆಗುವುದರಲ್ಲಿ ಸಂದೇಹವಿಲ್ಲ ಎಂದರು. ಪ್ರತಿ ವರ್ಷ 18 ಲಕ್ಷ ಎಂಜಿನಿಯರಿಂಗ್‌ ಪದವೀಧರರು ಕ್ಯಾಂಪಸ್‌ನಿಂದ ಹೊರಗೆ ಬರುತ್ತಾರೆ. ಕಂಪನಿಗಳು ಎಂಜಿನಿಯರಿಂಗ್‌ ಪದವೀಧರರನ್ನೇ ಅವಲಂಬಿಸಬೇಕೆಂದಿಲ್ಲ.

ಪಿಯುಸಿ ಅಥವಾ ಬೇರೆ ಪದವಿ ಪಡೆದ ಅಭ್ಯರ್ಥಿಗಳನ್ನು ಕಡಿಮೆ ಸಂಬಳಕ್ಕೆ ನೇಮಕ ಮಾಡಿಕೊಳ್ಳುತ್ತಿದ್ದಾರೆ. ಆದ್ದರಿಂದ ಕೌಶಲ್ಯ ವೃದ್ಧಿಸಿಕೊಂಡರೆ ಮಾತ್ರ ಎಂಜಿನಿಯರಿಂಗ್‌ ಪದವೀಧರರಿಗೆ ಉತ್ತಮ ಭವಿಷ್ಯವಿದೆ ಎಂದು ತಿಳಿಸಿದರು. ಎಲ್ಲ ಎಂಜಿನಿಯರಿಂಗ್‌ ಪದವೀಧರರೂ ಎಂಜಿನಿಯರ್‌ಗಳಲ್ಲ. ಬ್ರಿಕ್ಸ್‌ ದೇಶಗಳಿಗೆ ಹೋಲಿಕೆ ಮಾಡಿದರೆ ನಮ್ಮಲ್ಲಿ ಎಂಜಿನಿಯರಿಂಗ್‌ ಪದವೀಧರರ ಸಂಖ್ಯೆ ದೊಡ್ಡದಾಗಿದ್ದರೂ ಗುಣಮಟ್ಟದ ಎಂಜಿನಿಯರ್‌ಗಳ ಪ್ರಮಾಣ ಅತಿ ಕಡಿಮೆಯಾಗಿದೆ ಎಂದರು.

ಐಟಿಯಿಂದ ಎಂಜಿನಿಯರಿಂಗ್‌ ಕಳಾಹೀನ: ಎಂಜಿನಿಯರ್‌ಗಳು ಹಾಗೂ ಐಟಿ ವೃತ್ತಿಪರರು ಬೇರೆ ಬೇರೆ. ಮಾಹಿತಿ ತಂತ್ರಜ್ಞಾನ ಕ್ಷೇತ್ರದಿಂದ ಎಂಜಿನಿಯರಿಂಗ್‌ ಕ್ಷೇತ್ರ ಕಳಾಹೀನವಾಗುತ್ತಿದೆ. ಯಾವುದೇ ಎಂಜಿನಿಯರಿಂಗ್‌ ಪಾಸಾದವರು ಕೂಡ ಐಟಿ ಕ್ಷೇತ್ರಕ್ಕೆ ಹೋಗುತ್ತಾರೆ. ಇದರಿಂದ ಮುಂದಿನ ದಿನಗಳಲ್ಲಿ ಖಂಡಿತಾ ನಿರುದ್ಯೋಗ ಸಮಸ್ಯೆ ಹೆಚ್ಚಾಗುವುದು ನಿಸ್ಸಂಶಯ ಎಂದು ಹೇಳಿದರು.

ವಿದೇಶಗಳಲ್ಲಿ ಎಂಜಿನಿಯರಿಂಗ್‌ ನೊಂದಿಗೆ ಸಾಫ್ಟ್ವೇರ್‌ ಹಾಗೂ ಇಂಗ್ಲಿಷ್‌ ತಿಳಿದಿದ್ದರೆ ಆದ್ಯತೆ ನೀಡಲಾಗುತ್ತದೆ. ಆದರೆ ನಮ್ಮ ದೇಶದಲ್ಲಿ ಸಾಫ್ಟ್ವೇರ್‌ ದಿಗೆ ಇಂಗ್ಲಿಷ್‌ ಗೊತ್ತಿದ್ದರೆ ಸಾಕು, ಎಂಜಿನಿಯರಿಂಗ್‌ಗೆ ಕೊನೆಯ ಆದ್ಯತೆ ಎಂದರು. ಬೇರೆ ಎಂಜಿನಿಯರಿಂಗ್‌ ಪದವಿ ಪಡೆದು ಐಟಿ ಕ್ಷೇತ್ರಕ್ಕೆ ಹೋದವರ ಸ್ಥಿತಿ ಗಂಭೀರವಾಗುತ್ತಿದೆ. ಕೇವಲ ಡಾಟಾ ಎಂಟ್ರಿ, ಸಾಫ್ಟ್ವೇರ್‌ ಎಂಟ್ರಿ ಕೆಲಸಕ್ಕೂ ಮೀರಿದ ಕಾರ್ಯವನ್ನು ಕಂಪನಿಗಳು ನಿರೀಕ್ಷಿಸುತ್ತಿವೆ.

ಇದು ಸಹಸ್ರಾರು ಉದ್ಯೋಗಿಗಳು ಉದ್ಯೋಗ ಕಳೆದುಕೊಳ್ಳುವ ಭೀತಿ ಸೃಷ್ಟಿಸಿದೆ ಎಂದು ಅಭಿಪ್ರಾಯಪಟ್ಟರು. ಸಾನಿಧ್ಯ ವಹಿಸಿದ್ದ ರಾಮಕೃಷ್ಣ-ವಿವೇಕಾನಂದ ಆಶ್ರಮದ ಅಧ್ಯಕ್ಷ ಸ್ವಾಮಿ ರಘುವೀರಾನಂದಜಿ ಮಾತನಾಡಿ, ಮಾನವ ಜನ್ಮ ಸಿಕ್ಕಿದ್ದು ನಮ್ಮೆಲ್ಲರ ಪುಣ್ಯ. ಸತ್ಕಾರ್ಯಗಳನ್ನು ಮಾಡುವ ಮೂಲಕ ಜೀವನ ಸಾರ್ಥಕಪಡಿಸಿಕೊಳ್ಳಬೇಕು ಎಂದರು. ಎಲ್ಲ ವ್ಯಕ್ತಿಗಳು ಮುಕ್ತತೆ ಪಡೆಯುವ ಕಡೆಗೆ ಸಾಗುತ್ತಿದ್ದಾರೆ.

ಶರಣರ 1ವಚನವನ್ನು ಅರ್ಥ ಮಾಡಿಕೊಂಡು ಜೀವನದಲ್ಲಿ ಅಳವಡಿಸಿಕೊಂಡರೆ ಜೀವನ ಪಾವನವಾಗುವುದು. ಅಧ್ಯಾತ್ಮ ಎನ್ನುವುದು ಕೆಲವರಿಗೆ ಮಾತ್ರ ಅವಶ್ಯ ಎಂಬುದು ಸರಿಯಲ್ಲ ಇದು ಎಲ್ಲರಿಗೂ ಅಗತ್ಯವಾದುದು ಎಂಬುದನ್ನು ಅರಿಯಬೇಕು ಎಂದು ತಿಳಿಸಿದರು. ಪದವಿ ಮುಗಿದ ನಂತರ ನಾವು ಉದ್ಯೋಗ ಪಡೆಯಲು ಅಲೆಯದೇ ಕಂಪನಿಗಳೇ ನಮ್ಮನ್ನು ಹುಡುಕಿಕೊಂಡು ಬಂದು ಕೆಲಸ ನೀಡಬೇಕು.

ಈ ರೀತಿ ನಾವು ವ್ಯಕ್ತಿತ್ವ, ಕೌಶಲ್ಯ ವೃದ್ಧಿಪಡಿಸಿಕೊಳ್ಳಬೇಕು ಎಂದರು. ಕೆಎಲ್‌ಇ ಐಟಿ ಕಾಲೇಜಿನ ಡೀನ್‌ ಆರ್‌. ಆರ್‌.ಬುರಬುರೆ ಮಾತನಾಡಿ, ಉದ್ಯಮ ಹಾಗೂ ಕಾಲೇಜುಗಳಲ್ಲಿ ನೀಡುವ ಶಿಕ್ಷಣದ ಮಧ್ಯೆ ಅಂತರ ಹೆಚ್ಚಾಗಿದ್ದು, ಅಂತರ ಕಡಿಮೆ ಮಾಡುವ ದಿಸೆಯಲ್ಲಿ ಇಂಥ ಶಿಬಿರಗಳನ್ನು ಆಯೋಜಿಸಲಾಗುತ್ತಿದೆ. ವಿದ್ಯಾರ್ಥಿಗಳು ಶೇ.100ರಷ್ಟು ತನ್ಮಯತೆಯಿಂದ ಶಿಬಿರದಲ್ಲಿ ಪಾಲ್ಗೊಳ್ಳಬೇಕು ಎಂದು ತಿಳಿಸಿದರು. ಮೆಕ್ಯಾನಿಕಲ್‌ ವಿಭಾಗದ ಎಸ್‌.ಸಿ.ಸಜ್ಜನ ಮಾತನಾಡಿದರು. ಗುರುರಾಜ ದೇಶಪಾಂಡೆ ನಿರೂಪಿಸಿದರು.