ಗಡಿನಾಡಿಗರ ಕಾಳಜಿ ಇರಲಿ

Team Udayavani, Mar 26, 2017, 2:25 PM IST

ಧಾರವಾಡ: (ಡಾ|ಎಂ.ಎಂ.ಕಲಬುರ್ಗಿ ವೇದಿಕೆ)ನಡುನಾಡಿಗರು ಗಡಿನಾಡ ಕನ್ನಡಿಗರ ಕಾಳಜಿ ಮಾಡದೇ ಹೋದರೆ ಕನ್ನಡದ ಉಳಿವು ಕಷ್ಟವಾಗುತ್ತದೆ ಎಂದು 11ನೇ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನಾಧ್ಯಕ್ಷ ಕವಿ ವಿ.ಸಿ.ಐರಸಂಗ ಸಲಹೆ ನೀಡಿದರು. ನಗರದ ಕನ್ನಡ ಸಾಹಿತ್ಯ ಪರಿಷತ್‌ ಆವರಣದಲ್ಲಿ ಶನಿವಾರ ನಾಡೋಜ ಡಾ|ಎಂ.ಎಂ.ಕಲಬುರ್ಗಿ ಮಹಾವೇದಿಕೆಯಲ್ಲಿ ನಡೆದ 11ನೇ ಜಿಲ್ಲಾ ಕನ್ನಡ ಸಾಹಿತ್ಯ ಸಮ್ಮೇಳನದಲ್ಲಿ ಅವರು ಅಧ್ಯಕ್ಷತೆಯ ಭಾಷಣ ಮಾಡಿದರು.

ಕರ್ನಾಟಕ ಏಕೀಕರಣದ ಸಂದರ್ಭದಲ್ಲಿ ನಾಡು-ನುಡಿಗಾಗಿ ಸಾಕಷ್ಟು ಮಹನೀಯರು ಶ್ರಮಿಸಿದ್ದು, ಆದರೆ ಈಗ ಗಡಿಭಾಗದಲ್ಲಿ ಕನ್ನಡ ಮಂಕಾಗುತ್ತಿದೆ. ಕನ್ನಡಿಗರು ಬಡವಾಗುತ್ತಿದ್ದರೂ ಸರಕಾರದ ಪ್ರಯತ್ನಗಳು ಫಲಪ್ರದವಾಗುತ್ತಿಲ್ಲ. ಒಳನಾಡಿನಲ್ಲಿರುವ ನಾವು ಗಡಿನಾಡಿಗರ ಕಡೆ ಗಮನ ಹರಿಸಬೇಕಿದೆ. ಅವರ ಭಾವನೆಗಳಿಗೆ ಮತ್ತು ಸಮಸ್ಯೆಗಳಿಗೆ ಸ್ಪಂದಿಸಬೇಕಿದೆ.

ಅಂದಾಗ ಮಾತ್ರ ಅವರನ್ನು ಕನ್ನಡ  ನಾಡು ನುಡಿಯ ಮುಖ್ಯವಾಹಿನಿಗೆ ತಂದಂತಾಗುತ್ತದೆ. ಅದರಿಂದ ಅವರ ಆತ್ಮಸ್ಥೈರ್ಯ ಹೆಚ್ಚಾಗುವ ಮೂಲಕ ನಾಡು ನುಡಿಯ ಬಗ್ಗೆ ಅಪಾರ ಗೌರವ ತನ್ನಿಂದ ತಾನೇ ಮೂಡಲಿದೆ ಎಂದರು. ಸಮ್ಮೇಳನದ ಮೂಲಕ ಆಳುವ ಸರ್ಕಾರಗಳಿಗೆ ಮಾತೃಭಾಷೆ ಉಳಿವಿಗೆ ಒತ್ತಡ ಹೇರುವ ಪ್ರಾಮಾಣಿಕ ಕೆಲಸಗಳು ನಡೆಯಬೇಕು. ಅಂದಾಗ ಕನ್ನಡ ಬೆಳೆಯಲಿದೆ ಎಂದರು. 

ಶರಣರು ಕವಿಗಳಲ್ಲವೇ?: ಗದ್ಯದ ಸಾಲುಗಳನ್ನೇ ಸ್ವೇಚ್ಛೆಯಿಂದ ತುಂಡರಿಸಿ ಆ ತುಂಡುಗಳನ್ನು ಒಂದರ ಕೆಳಗೆ ಒಂದರಂತೆ ಬರೆದುದೆಲ್ಲ ಕಾವ್ಯ ಎನಿಸಿಹ ಕಾಲವಿದು. ಅವನ್ನು ಬರೆದವರೆಲ್ಲಾ ಕವಿಗಳೆನಿಸಿ ಪದವಿ ಪ್ರಶಸ್ತಿಗಳನ್ನೂ ಪಡೆದರು. ಇದೊಂದು ವಿಪರ್ಯಾಸ. ಹಾಗೇ ನೋಡಿದರೆ ಶರಣರು ಬರೆದ ಸಾಹಿತ್ಯವನ್ನು ವಚನಗಳೆನ್ನದೆ ಕಾವ್ಯ ಎಂದು ಏಕೆ ಅನ್ನಲಿಲ್ಲ? ಶರಣರಿಗೆಲ್ಲರಿಗೆ ಕವಿಗಳೆಂದು ಏಕೆ ಅನ್ನಲಿಲ್ಲ? ಈ ಪ್ರಶ್ನೆಗಳಿಗೆ ಸಮರ್ಪಕ ಉತ್ತರ ಸಿಗಬೇಕಿದೆ.

ಲಯಬದ್ಧವಾದ ಪದ್ಯಗಳನ್ನು ಬರೆಯವ ಹವ್ಯಾಸವನ್ನು ಉಳಿಸಿಕೊಂಡು ಹೋಗುವ ಕವಿಗಳ ಅವಶ್ಯಕತೆ ಇದೆ ಎಂದರು. ಭ್ರಷ್ಟಾಚಾರ ಪಿಡುಗು ಇಂದೂ ಜೀವಂತವಾಗಿದೆ. ಆರ್‌ಟಿಐ  ಯೋಜನೆಗಳು, ಲೋಕಾಯುಕ್ತ ನೇಮಕಾತಿ ಕೆಲವು ಹಂತದವರೆಗೆ ಸಹಕಾರಿ ಎನಿಸಿವೆ.

ಆದರೆ, ಈ ಪಿಡುಗುಗಳ ಉನ್ಮೂಲನೆ ಸಾಧ್ಯವಾಗದಿರುವುದು ಶೋಚನೀಯ. ನ್ಯಾಯಾಂಗದ ವ್ಯವಸ್ಥೆ ಪರಾಕಾಷ್ಟೆ ತಲುಪಿದೆ. ಸಾವಿರ-ಲಕ್ಷ ಪ್ರಕರಣಗಳು ನ್ಯಾಯ ಕಾಣದೆ ತೀಪುದಾರರು ಇಂದಿಗೂ ಕೋರ್ಟ್‌ಗೆ ಎಡತಾಕುವುದು ತಪ್ಪಿಲ್ಲ. ಪ್ರಕರಣಗಳಿಗೆ ಕಟ್ಟುನಿಟ್ಟಾದ ಪರಿಮಿತಿ ಹಾಕುವುದು ಅವಶ್ಯ ಎಂದರು. 

ಬರಕ್ಕೆ ಸ್ಪಂದಿಸಿ: ರಾಜ್ಯದಲ್ಲಿ ಬರ ಆವರಿಸಿದ್ದು, ಇದರಿಂದ ಜಾನುವಾರುಗಳಿಗೆ ಕುಡಿಯುವ ನೀರು ಸಿಗದ ಪರಿಸ್ಥಿತಿ ನಿರ್ಮಾಣವಾಗಿದೆ. ಹೀಗಾಗಿ ಪ್ರಜ್ಞಾವಂತರ ಗುಂಪು ಆ ಕಡೆ ಕೆರೆ-ಕಟ್ಟೆಗಳನ್ನು ಹೂಳೆತ್ತುವ ಮತ್ತು ಅವುಗಳಿಗೆ ನೀರು ತುಂಬಿಸುವ ಕೆಲಸ ಮಾಡಬೇಕಿದೆ. ಇದಲ್ಲದೇ ಬರದ ಹೊಡೆತ ತಾಳಲಾರದೇ ಆತ್ಮಹತ್ಯೆಗೆ ಶರಣಾಗುತ್ತಿರುವ ಅನ್ನದಾತರ ಸಹಾಯಕ್ಕೆ ನಿಲ್ಲುವುದು ನೆಮ್ಮಲ್ಲರ ಧರ್ಮವಾಗಬೇಕು.

ಇದರೊಂದಿಗೆ ಸಮಾಜದಲ್ಲಿ ಅಸಂಬದ್ಧ ಘಟನೆಗಳು ನಡೆದಾಗ ಅವುಗಳನ್ನು ಪ್ರತಿಭಟಿಸುವ, ನೊಂದ ಮಹಿಳೆಯರಿಗೆ ಸಹಾಯ ಹಸ್ತ ನೀಡುವ ಅನುಕಂಪ ಅಲೆಗಳು ನಮ್ಮ ಹೃದಯದಿಂದ ಹೊರ ಹೊಮ್ಮಬೇಕಿದೆ ಎಂದರು. ಸಾಹಿತ್ಯವೂ ಸಾಮಾಜಿಕ, ವೈಜ್ಞಾನಿಕ, ಆಧ್ಯಾತ್ಮಿಕ ಹೀಗೆ ಹಲವು ವಿಷಯಗಳಲ್ಲಿ ಜನತೆ ಎದುರಿಸುವ ಆತಂಕಗಳಿಗೆ ಪರಿಹಾರದ ಕ್ಷಮತೆ ಒದಗಿಸಬೇಕು.

ಸ್ತ್ರೀ ಸಬಲೀಕಣ, ಗಡಿ ವಿವಾದ, ರೈತರ ಗೋಳು, ಭ್ರಷ್ಟಾಚಾರ ನಿರ್ಮೂಲನೆ, ನ್ಯಾಯಾಂಗದ ಅವನತಿ, ಬಾಲಕಾರ್ಮಿಕರ ಸಮಸ್ಯೆಗಳು, ಬಾಲ್ಯವಿವಾಹದಂಥ ಅನೇಕ ಪಿಡುಗು ಗ್ರಾಮೀಣ ಭಾಗದಲ್ಲಿ ಹಾಗೆಯೇ ಉಳಿದಿವೆ. ಸರ್ಕಾರ ಈ ದಿಸೆಯಲ್ಲಿ ಪರಿಣಾಮಕಾರಿ ಯೋಜನೆ ಜಾರಿಗೆ ತರುವುದು ಅಗತ್ಯವಿದೆ ಎಂದರು. 

ನ್ಯಾಯ ಬಗೆಹರಿಸಿ: ನ್ಯಾಯಾಲಯಗಳಲ್ಲಿ ಸಾವಿರ ಸಾವಿರ ಲಕ್ಷಗಟ್ಟಲೆ ಕೇಸುಗಳು ನ್ಯಾಯ ಕಾಣದೇ ತೀರ್ಪು ದೊರೆಯದೇ ಪಕ್ಷಗಾರರು ಕೋರ್ಟುಗಳಿಗೆ ಎಡತಾಕಿ ವಕೀಲರಿಗೆ ಪ್ರತಿ ಮುಂದೂಡುವಿಕೆಗೆ ಸಾವಿರಾರು ಹಣ ಸುರಿದು ಸೋತಿದ್ದಾರೆ. ನ್ಯಾಯ ಸಿಗುವ ಮುಂಚೆಯೇ ಸಾಕಷ್ಟು ಜನ ಸತ್ತು ಹೋಗಿದ್ದಾರೆ.

ಹೀಗಾಗಿ ಬುದ್ಧಿ ಜೀವಿಗಳು ತಮ್ಮ ಲಕ್ಷವನ್ನು ಇತ್ತ ಹೊರಳಿಸಿ ಕೇಸುಗಳ ಮುಂದೂಡಿಕೆಗೆ ಲಗಾಮು ಹಾಕುವ ವಿಧಾನ, ಸತ್ಯಾಗ್ರಹಗಳ ಮೂಲಕ ಸಂವಿಧಾನದಲ್ಲಿ ಕಾಯ್ದೆ ಮಾಡಿ ಒಂದೊಂದು ಕೇಸಿಗೆ ಕಟ್ಟು ನಿಟ್ಟಾದ ಅವಧಿಯ ಪರಿಮಿತಿ ಹಾಕುವುದು ಅವಶ್ಯವಿದೆ ಎಂದರು.