ಮತ್ತೆ 61 ಜನರಿಗೆ ಕೋವಿಡ್

Team Udayavani, Jul 26, 2020, 9:12 AM IST

ಗದಗ: ಜಿಲ್ಲೆಯಲ್ಲಿ ಶನಿವಾರ 61 ಜನರಿಗೆ ಕೋವಿಡ್‌-19 ಸೋಂಕು ದೃಢಪಟ್ಟಿದ್ದು, ಒಟ್ಟು ಸೋಂಕಿತರ ಸಂಖ್ಯೆ 943ಕ್ಕೆ ಏರಿಕೆಯಾಗಿದೆ.  ಅಲ್ಲದೇ ಇತ್ತೀಚೆಗೆ ಇಬ್ಬರು ಮೃತಪಟ್ಟಿದ್ದು, ಜಿಲ್ಲೆಯಲ್ಲಿ ಕೋವಿಡ್‌ ಸೋಂಕಿಗೆ 20 ಜನರು ಬಲಿಯಾಗಿದ್ದಾರೆ. ಸದ್ಯ 595 ಸಕ್ರಿಯ ಪ್ರಕರಣಗಳಿವೆ.

ಸೋಂಕಿಗೆ ಮೂವರು ಬಲಿ: ಕೊಪ್ಪಳ ಜಿಲ್ಲೆ ಸಿಡಗನಹಳ್ಳಿ ಗ್ರಾಮ 10 ವರ್ಷದ ಬಾಲಕ ಪಿ-75149 ಅನಾರೋಗ್ಯದಿಂದಾಗಿ ಜು.19 ರಂದು ಜಿಮ್ಸ್‌ ಆಸ್ಪತ್ರೆಗೆ ದಾಖಲಾಗಿದ್ದರು. ಅವರಿಗೆ ಜು.20ರಂದು ಕೋವಿಡ್‌ ಸೋಂಕು ಖಚಿತವಾಗಿದ್ದು, ಅಂದೇ ಮೃತರಾಗಿದ್ದಾರೆ. ರಕ್ತ ಹೀನತೆ, ಹೃದಯ ಸಂಬಂಧಿ ಕಾಯಿಲೆ ಹಾಗೂ ಕಿಡ್ನಿ ತೊಂದರೆಯಿಂದಾಗಿ ಬೆಟಗೇರಿ ನಿವಾಸಿ 70 ವರ್ಷದ ವೃದ್ಧ (ಪಿ.79796) ಅನಾರೋಗ್ಯದಿಂದಾಗಿ ಜು.20ರಂದು ಜಿಮ್ಸ್‌ ಆಸ್ಪತ್ರೆಗೆ ದಾಖಲಾಗಿದ್ದರು. ಜು.21 ರಂದು ಕೋವಿಡ್‌ ಸೋಂಕು ಇರುವುದು ಖಚಿತವಾಗಿತ್ತು. ಅದೇ ದಿನ ರಾತ್ರಿ ಚಿಕಿತ್ಸೆ ಫಲಿಸದೇ ಮೃತಪಟ್ಟಿದ್ದಾರೆ. ಕೋವಿಡ್‌-19 ಲಕ್ಷಣಗಳು ಕಂಡು ಬಂದಿದ್ದರಿಂದ ರೋಣ ತಾಲೂಕು ಹಿರೇಹಾಳ ನಿವಾಸಿ 60 ವರ್ಷದ ವೃದ್ಧ (ಪಿ-90619) ಜಿಮ್ಸ್‌ ಆಸ್ಪತ್ರೆಗೆ ದಾಖಲಾಗಿದ್ದರು.

ಜು.23ರಂದು ಅವರಿಗೆ ಕೋವಿಡ್‌-19 ದೃಢಪಟ್ಟಿದೆ. ಅಧಿಕ ರಕ್ತದೊತ್ತಡ, ಉಸಿರಾಟದ ತೊಂದರೆಯಿಂದ ಅಂದೇ ದಿನ ಮೃತಪಟ್ಟಿದ್ದಾರೆ. ಕೋವಿಡ್‌ -19ರ ಮಾರ್ಗಸೂಚಿಗಳ ಅನ್ವಯ ಅಂತ್ಯಕ್ರಿಯೆ ನೆರವೇರಿಸಲಾಗಿದೆ ಎಂದು ಜಿಲ್ಲಾಧಿಕಾರಿ ಎಂ. ಸುಂದರೇಶ್‌ ಬಾಬು ತಿಳಿಸಿದ್ದಾರೆ.