ಆಲಿಕಲ್ಲು ಮಳೆ: 9 ಕುರಿ ಸಾವು, 4 ಎಕರೆ ಪಪ್ಪಾಯಿ ಹಾನಿ

ಲಕ್ಷ್ಮೇಶ್ವರ: ತಾಲೂಕಿನ ಯಳವತ್ತಿ ಗ್ರಾಮದಲ್ಲಿ ಗುರುವಾರ ರಾತ್ರಿ ಸುರಿದ ಆಲಿಕಲ್ಲು ಮಳೆಗೆ 3 ಕುರಿ ಮತ್ತು 6 ಮರಿಗಳು ಮೃತಪಟ್ಟಿರುವ ಘಟನೆ ತಡವಾಗಿ ಬೆಳಕಿಗೆ ಬಂದಿದೆ. ಕುರಿಗಳ ಮಾಲೀಕ ಶಿರಹಟ್ಟಿಯ ಮೈಲಾರಪ್ಪ ಅಂಕಲಿ ಎಂಬುದಾಗಿ ತಿಳಿದು ಬಂದಿದೆ.

ಗುರುವಾರ ತಡರಾತ್ರಿ ಯಳವತ್ತಿ ಗ್ರಾಮದ ಹೊರವಲಯದಲ್ಲಿ ಬೀಡು ಬಿಟ್ಟದ್ದ ವೇಳೆಯಲ್ಲಿ ಸುರಿದ ಅಕಾಲಿಕ ಆಲಿಕಲ್ಲು ಮಳೆಯ ಹೊಡೆತಕ್ಕೆ ಸಿಕ್ಕಿ 3 ದೊಡ್ಡ ಮತ್ತು 6 ಸಣ್ಣ ಮರಿಗಳು ಸತ್ತಿವೆ. ಯಳವತ್ತಿ ಗ್ರಾಮದಿಂದ 4-5 ಕಿಮೀ. ದೂರದ ಜಮೀನೊಂದರಲ್ಲಿ ಘಟನೆ ನಡೆದಿದ್ದರಿಂದ ಪ್ರಕರಣ ತಡವಾಗಿ ಬೆಳಕಿಗೆ ಬಂದಿದೆ. ಪಶು ವೈದ್ಯಾಧಿಕಾರಿಗಳು ಸ್ಥಳಕ್ಕೆ ಆಗಮಿಸಿ ಸತ್ತ ಕುರಿಗಳ ಪರಿಶೀಲನೆ ಮಾಡಿದ್ದಾರೆ.

ಈ ಕುರಿತಂತೆ ಶಿರಹಟ್ಟಿ ಪೊಲೀಸ್‌ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ. ಅಲ್ಲದೇ ಇದೇ ಗ್ರಾಮದ ವಿಶ್ವನಾಥ ಚಿಂಚಲಿ ಎಂಬುವರ 4 ಎಕರೆ ಪಪ್ಪಾಯಿ ಬೆಳೆ ಆಲಿಕಲ್ಲು ಮಳೆಗೆ ಹಾಳಾಗಿದೆ. ಗ್ರಾಮದಲ್ಲಿ ಬೀಸಿದ ಬಿರುಗಾಳಿಗೆ ಕೆಲವು ತಗಡಿನ ಶೆಡ್ಡುಗಳು ಕಿತ್ತಿವೆ. ಮಳೆಗಿಂತ ಗಾಳಿ, ಗುಡುಗು ಸಿಡಿನ ಅಬ್ಬರವೇ ಹೆಚ್ಚಾಗಿದ್ದು ಕಂಡು ಬಂದಿದೆ.