Mundargi: ಬೀದಿ ನಾಯಿ ದಾಳಿ; ಮಗುವಿನ ಸ್ಥಿತಿ ಗಂಭೀರ

Team Udayavani, Dec 8, 2024, 2:38 PM IST

ಮುಂಡರಗಿ: ಬೀದಿ ನಾಯಿಯೊಂದು ಮಗುವಿನ ಮೇಲೆ ದಾಳಿ ಮಾಡಿದ ಪರಿಣಾಮ ತುಟಿ ಹರಿದು, ಹಲ್ಲು ಮುರಿದು, ಮಗುವಿನ ಸ್ಥಿತಿ ಚಿಂತಾಜನಕವಾದ ಘಟನೆ ಪಟ್ಟಣದ 20ನೇ ವಾರ್ಡಿನಲ್ಲಿ ಡಿ.8ರ ರವಿವಾರ ಬೆಳಗ್ಗೆ ನಡೆದಿದೆ.

ಪಟ್ಟಣದ 20ನೇ ವಾರ್ಡಿನಲ್ಲಿ ಮನೆಯ ಮುಂದೆ ಆಟವಾಡುತ್ತಿದ್ದ ರುದ್ರೇಶ (2.5 ವರ್ಷ) ಎಂಬ ಮಗುವಿನ ಮೇಲೆ ನಾಯಿ ದಾಳಿ ಮಾಡಿ ಕಚ್ಚಿದ್ದು, ಅಕ್ಕಪಕ್ಕದವರು ಮಗುವನ್ನು ನಾಯಿಯಿಂದ ಬಿಡಿಸಲು ಪ್ರಯತ್ನಿಸಿ, ಕೊನೆಗೂ ಬಿಡಿಸಿದ್ದಾರೆ.

ನಾಯಿ ಕಚ್ಚಿದ ಪರಿಣಾಮ ಮಗುವಿನ ಕೆಳಗಿನ ತುಟಿ ಹರಿದು, ಹಲ್ಲು ಕೂಡಾ ಮುರಿದಿದೆ. ಮಗುವಿಗೆ ಪ್ರಾಥಮಿಕ ಚಿಕಿತ್ಸೆ ನೀಡಿ, ಹೆಚ್ಚಿನ ಚಿಕಿತ್ಸೆಗಾಗಿ ಗದಗ ಜಿಲ್ಲಾ ಆಸ್ಪತ್ರಗೆ ಕಳುಹಿಸಲಾಗಿದೆ.

ಬೀದಿ ನಾಯಿಗಳ ಉಪಟಳದಿಂದ ಬೇಸತ್ತ ಜನತೆ ನಾಯಿಗಳ ಹಾವಳಿ ಬಗ್ಗೆ ಆಕ್ರೋಶ ವ್ಯಕ್ತಪಡಿಸಿದ್ದಾರೆ. ಕೂಡಲೇ ಬೀದಿ ನಾಯಿಗಳ ಕಾಟ ತಪ್ಪಿಸಲು ಪುರಸಭೆ ಆಡಳಿತ ಮಂಡಳಿಗೆ ಆಗ್ರಹಿಸಿದ್ದಾರೆ.