ಅಧಿಕಾರಿಗಳ ಗೈರಿಗೆ ಆಕ್ರೋಶ

Team Udayavani, Jan 25, 2020, 12:52 PM IST

ಶಿರಹಟ್ಟಿ: ಪಟ್ಟಣದ ತಾಪಂ ಸಾಮರ್ಥ್ಯ ಸೌಧದಲ್ಲಿ ಶುಕ್ರವಾರ ನಡೆಯಬೇಕಾಗಿದ್ದ ಕೆಡಿಪಿ ತ್ತೈಮಾಸಿಕ ಸಭೆಯು ಅಧಿಕಾರಿಗಳ ಗೈರಿನಿಂದಾಗಿ ಆಕ್ರೋಶಗೊಂಡ ಶಾಸಕ ರಾಮಣ್ಣ ಲಮಾಣಿ ಸಭೆ ಮೊಟಕುಗೊಳಿಸಿ ಹೊರನಡೆದರು.

ಈ ಸಂದರ್ಭದಲ್ಲಿ ಮಾತನಾಡಿದ ಅವರು, ಪ್ರತಿ ಮೂರು ತಿಂಗಳಿಗೊಮ್ಮೆ ಶಾಸಕರ ಅಧ್ಯಕ್ಷೆಯಲ್ಲಿ ನಡೆಯುವ ಪ್ರಗತಿ ಪರಿಶೀಲನಾ ಸಭೆಗೆ ಅಧಿಕಾರಿಗಳು ಗೈರಾಗುವ ಮೂಲಕ ನಿರ್ಲಕ್ಷ್ಯ ಧೋರಣೆ ಅನುಸರಿಸಿದ್ದಾರೆ. ಬೆಳಗ್ಗೆ 11ಕ್ಕೆ ಪ್ರಾರಂಭವಾಗಬೇಕಾಗಿದ್ದ ಸಭೆಗೆ ಅಧಿಕಾರಿಗಳು ತಡವಾಗಿ ಬರುವುದು ಮತ್ತು ಬಾರದೇ ಇರುವುದು ಸಹಿಸಲಾಗದು. ಅಧಿಕಾರಿಗಳು ಗೈರಾಗಿ ಸಭೆ ಘನತೆಗೆ ಚ್ಯುತಿ ತಂದಿದ್ದು, ಜೊತೆಗೆ ಪ್ರತಿ ಇಲಾಖೆ ಅಧಿಕಾರಿಗಳು ಶಾಸಕರು ನಿರ್ದೇಶಿಸಿದ ವಿಷಯ ಪರಿಪಾಲಿಸದೆ ತಮಗೆ ಮನಃ ಬಂದಂತೆ ಅಧಿಕಾರ ನಡೆಸುತ್ತಿರುವುದು ಶಾಸಕರಿಗೆ ತೋರಿಸುವ ಅಗೌರವಾಗಿದೆ. ತಾಲೂಕು ಮಟ್ಟದ ಅಧಿಕಾರಿಗಳು ಶಾಸಕರ ಆದೇಶ ಪಾಲಿಸದಿದ್ದರೆ ಅವರನ್ನು ಇಟ್ಟುಕೊಂಡು ಏನು ಪ್ರಯೋಜನ. ಸಭೆಗಾದರು ಬಂದು ವಿಷಯ ಕುರಿತು ಚರ್ಚೆ ಮಾಡಬೇಕೆಂದರೆ ಸಭೆಗೂ ಬರುತ್ತಿಲ್ಲ. ಇವರ ನಡೆ ಸಾಕಷ್ಟು ಅನುಮಾನಕ್ಕೆ ಕಾರಣವಾಗಿದ್ದು, ಮುಂದಿನ ಸಭೆಗೆ ಗೈರಾದರೆ ಕಠಿಣ ಕ್ರಮ ಕೈಗೊಳ್ಳಲಾಗುವುದು ಎಂದು ಎಚ್ಚರಿಕೆ ನೀಡಿದರು.

ಅಸಾಯಕತೆ ತೋರಿದ ಇಒ: ಪ್ರತಿ ಕೆಡಿಪಿ, ಸಾಮಾನ್ಯ ಸಭೆಗೆ ಸರ್ವ ಇಲಾಖೆ ಅಧಿಕಾರಿಗಳು ಕಡ್ಡಾಯವಾಗಿ ಹಾಜರಾಗುವಂತೆ ನೋಟಿಸ್‌ ನೀಡಿದರೂ ಪಿಎಂಜಿಎಸ್‌ವೈ ಇಲಾಖೆ ಸೇರಿದಂತೆ ಕೆಲ ಅಧಿಕಾರಿಗಳು ಉದ್ದೇಶ ಪೂರ್ವಕವಾಗಿ ಸಭೆಗೆ ಗೈರಾಗುವುದರ ಮೂಲಕ ನೋಟಿಸ್‌ಗೆ ಅಗೌರವ ತೋರುತ್ತಿದ್ದಾರೆ. ಮೇಲಾಧಿಕಾರಿಗಳ ಗಮನಕ್ಕೆ ತಂದರು ಯಾವುದೇ ಪ್ರಯೋಜನವಾಗುತ್ತಿಲ್ಲ ಎಂದು ತಾಪಂ ಇಒ ತಮ್ಮ ಅಸಾಯಕತೆಯನ್ನು ಶಾಸಕರ ಎದುರು ತೋಡಿಕೊಂಡರು.

ಸಭೆಗೆ ಗೈರಾದ ಅಧಿಕಾರಿಗಳು: ಸಿಡಿಪಿಒ ಜಿ.ಆರ್‌. ಪವಿತ್ರ, ಗ್ರಾಮೀಣ ಕುಡಿಯುವ ನೀರು ಸರಬರಾಜ ಮತ್ತು ನೈರ್ಮಲ್ಯ ಇಲಾಖೆ ಹಾಗೂ ಜಿಪಂ ಇಲಾಖೆ ಅಧಿಕಾರಿ ನಾಗರತ್ನ, ಪಿಎಂಜಿಎಸ್‌ವೈ ಇಲಾಖೆ ಅಧಿಕಾರಿ, ತಾಲೂಕು ಆರೋಗ್ಯಾಧಿಕಾರಿ ಸುಬಾಸ ದೈಗೊಂಡ, ಸಮಾಜ ಕಲ್ಯಾಣ ಅಧಿಕಾರಿ ಎಸ್‌.ಬಿ. ಹರ್ತಿ, ಕಾರ್ಮಿಕಇಲಾಖೆ, ರೇಷ್ಮೆ ಇಲಾಖೆ, ಅಬಕಾರಿ, ಪೊಲೀಸ್‌, ತಹಶೀಲ್ದಾರ್‌ ಲಕ್ಷ್ಮೇಶ್ವರ, ಬಿಎಸ್‌ ಎನ್‌ಎಲ್‌, ಹೆಸ್ಕಾಂ, ಸಹಕಾರಿ ಸಂಘ, ಕೆಎಸ್‌ ಆರ್‌ಟಿಸಿ ಸೇರಿದಂತೆ ಶಿರಹಟ್ಟ ಹಾಗೂ ಲಕ್ಷ್ಮೇಶ್ವರ ಮುಖ್ಯಾಧಿಕಾರಿಗಳು ಸಭೆಗೆ ಗೈರು ಹಾಜರಾಗಿದ್ದರು. ಹೀಗಾಗಿ ಶಾಸಕರು ಸರ್ವ ಅಧಿಕಾರಿಗಳು ಸಭೆಗೆ ಹಾಜರಾಗದೆ ಜನರ ಸಮಸ್ಯೆಯನ್ನು ಯಾರ ಜೊತೆ ಚರ್ಚಿಸಬೇಕು ಎಂದು ಇಒ ಅವರನ್ನು ಪ್ರಶ್ನಿಸಿ, ಗೈರಾದ ಅಧಿಕಾರಿಗಳು ಅಮಾನತುಗೊಳಿಸುವಂತೆ ಸೂಚಿಸಿದರು.