ಜಾವಗಲ್‌ ಸುತ್ತಮುತ್ತ ಭೂಕಂಪನ ಅನುಭವ

Team Udayavani, Oct 31, 2018, 6:00 AM IST

ಜಾವಗಲ್‌: ಹಾಸನ ಜಿಲ್ಲೆ ಜಾವಗಲ್‌ ಹೋಬಳಿಯ 10-15 ಗ್ರಾಮಗಳಲ್ಲಿ ಸೋಮವಾರ ರಾತ್ರಿ ಭೂಕಂಪನದ ಅನುಭವವಾಗಿದೆ. ಇಲ್ಲಿನ ಉಂಡಿಗನಾಳು, ದೇಶಾಣಿ, ಕರಗುಂದ, ವಡೇರಹಳ್ಳಿ, ಕಲ್ಯಾಡಿ, ಗೇರಮರ, ವೃಂದಾವನಹಳ್ಳಿ, ಮಾದಾಪುರ, ಹರಳಹಳ್ಳಿ, ಹಾರನಹಳ್ಳಿ ಸುತ್ತಮುತ್ತಲ ಗ್ರಾಮಗಳಲ್ಲಿ ಸೋಮವಾರ ರಾತ್ರಿ 10.15 ರ ಸಮಯದಲ್ಲಿ ಭಾರೀ ಸ್ಫೋಟದ ಶಬ್ದ ಕೇಳಿಬಂದಿದ್ದು, ಕೆಲ ಕ್ಷಣದಲ್ಲಿ ಮನೆಯಲ್ಲಿದ್ದ ಪಾತ್ರೆ ಮತ್ತಿತರ ವಸ್ತುಗಳು ಅಲ್ಲಾಡಿವೆ. ಇದರಿಂದ ಗಾಬರಿಗೊಂಡು ಮನೆಯಲ್ಲಿದ್ದವರು ಹೊರಬಂದಿದ್ದಾರೆ. ಬಳಿಕ 10.30 ರ ವೇಳೆಯಲ್ಲೂ ಮತ್ತೂಮ್ಮೆ ಇದೇ ರೀತಿಯ ಅನುಭವವಾಯಿತು ಎಂದು ಗ್ರಾಮಸ್ಥರು ತಿಳಿಸಿದ್ದಾರೆ.

ಈ ಭಾಗದಲ್ಲಿ ಎತ್ತಿನಹೊಳೆ ಯೋಜನೆಯ ನಾಲಾ ಕಾಮಗಾರಿ ನಡೆಯುತ್ತಿರುವುದರಿಂದ ಸ್ಫೋಟಕಗಳನ್ನು ಬಳಸಿರುವುದರಿಂದ ಈ ರೀತಿ ಶಬ್ದ ಬಂದಿದೆ ಎಂದು ಶಂಕಿಸಲಾಗಿದೆ. ಈ ಕುರಿತು ಪ್ರತಿಕ್ರಿಯಿಸಿರುವ ಕಾಮಗಾರಿಯ ಗುತ್ತಿಗೆದಾರರು ಹಾಗೂ  ಎಂಜಿನಿಯರ್‌ಗಳು, ಸಂಜೆಯ ನಂತರ ಸ್ಫೋಟಕ ಬಳಸುವುದಿಲ್ಲ ಎಂದು ತಿಳಿಸಿದ್ದಾರೆ.