Pendrive Case: ಜೆಡಿಎಸ್‌ ಶಾಸಕ ಎ.ಮಂಜು ವಿಚಾರಣೆ

Team Udayavani, Jun 1, 2024, 8:31 PM IST

ಹಾಸನ: ಅಶ್ಲೀಲ ವೀಡಿಯೋ ಪೆನ್‌ಡ್ರೈವ್‌ ಸಂಬಂಧ ಅರಕಲಗೂಡು ಕ್ಷೇತ್ರದ ಜೆಡಿಎಸ್‌ ಶಾಸಕ ಎ. ಮಂಜು ಅವರು ಶನಿವಾರ ಹಾಸನದ ಸಿಇಎನ್‌ ಪೊಲೀಸ್‌ ಠಾಣೆಯಲ್ಲಿ ವಿಚಾರಣೆ ಎದುರಿಸಿದರು.

ಬೆಳಗ್ಗೆ 11.30ಕ್ಕೆ ಹಾಜರಾದ ಮಂಜು ಅವರು ಎಎಸ್ಪಿ ಎಂ.ಕೆ.ತಮ್ಮಯ್ಯ ಅವರಿಂದ 12.45 ಗಂಟೆ ವರೆಗೆ ವಿಚಾರಣೆಗೆ ಒಳಗಾದರು. ಪೆನ್‌ಡ್ರೈವ್‌ ಹಂಚಿಕೆ ಪ್ರಕರಣದ ಪ್ರಮುಖ ಆರೋಪಿ ನವೀನ್‌ ಗೌಡನು ಶಾಸಕ ಮಂಜುಗೆ ಎ.20ರಂದು ಪೆನ್‌ಡ್ರೈವ್‌ ಕೊಟ್ಟಿದ್ದೆ ಎಂದು ತನ್ನ ಫೇಸ್‌ಬುಕ್‌ ಖಾತೆಯಲ್ಲಿ ಮೇ 12ರಂದು ಬರೆದುಕೊಂಡಿದ್ದ. ಎಸ್‌ಐಟಿ ವಶದಲ್ಲಿದ್ದ ನವೀನ್‌ ಗೌಡನನ್ನು ಎಎಸ್ಪಿ ತಮ್ಮಯ್ಯ ವಿಚಾರಣೆ ನಡೆಸಿದಾಗಲೂ ಅದನ್ನು ಪುನರುಚ್ಚರಿಸಿದ್ದ ಹಿನ್ನೆಲೆಯಲ್ಲಿ ಶಾಸಕರನ್ನು ವಿಚಾರಣೆಗೆ ಕರೆಯಲಾಗಿತ್ತು.

ಎ.ಮಂಜು ಪ್ರತಿಕ್ರಿಯಿಸಿ, ನನ್ನ ವಿರುದ್ಧ ಆರೋಪ ಮಾಡಿದ್ದ ನವೀನ್‌ ಗೌಡ ವಿರುದ್ಧ ನಾನೇ ಎಸ್‌ಐಟಿಗೆ ದೂರು ನೀಡಿದ್ದೆ. ಪೊಲೀಸರಿಗೆ ಮಾಹಿತಿ ನೀಡಿದ್ದೇನೆ ಎಂದು ತಿಳಿಸಿದರು.