Hassan: ಗರ್ಭಿಣಿ ಪತ್ನಿಯ ಹತ್ಯೆಗೈದು ಆತ್ಮಹ*ತ್ಯೆಗೆ ಯತ್ನಿಸಿದ ಪತಿ

Team Udayavani, Nov 20, 2024, 12:09 AM IST

ಹಾಸನ: ತವರು ಮನೆಯಿಂದ ಮತ್ತಷ್ಟು ವರದಕ್ಷಿಣೆ ತರುವಂತೆ ಹಿಂಸೆ ನೀಡಿದ ಪತಿ, 3 ತಿಂಗಳ ಗರ್ಭಿಣಿ ಪತ್ನಿಯ ಜೀವ ತೆಗೆದಿರುವ ಅಮಾನವೀಯ ಘಟನೆ ಚನ್ನರಾಯಪಟ್ಟಣ ತಾಲೂಕಿನ ನುಗ್ಗೇಹಳ್ಳಿ ಹೋಬಳಿಯ ನೊರಕ್ಕಿ ಗ್ರಾಮದಲ್ಲಿ ನಡೆದಿದೆ.

ಅದೇ ತಾಲೂಕಿನ ದೊಡ್ಡೇರಿ ಕಾವಲು ಗ್ರಾಮದ ನಯನಾ (24) ಕೊಲೆಯಾದ ಗೃಹಿಣಿ. ಯಶೋದಮ್ಮ ಅವರ ಪುತ್ರಿ ನಯನಾಳ ವಿವಾಹ 3 ವರ್ಷಗಳ ಹಿಂದೆ ನೊರಕ್ಕಿ ಗ್ರಾಮದ ಅಯ್ಯಪ್ಪ (31)ನ ಜತೆಗೆ ಆಗಿತ್ತು.

ರವಿವಾರ ರಾತ್ರಿ ಅಯ್ಯಪ್ಪ ಮಾವನ ಮನೆಗೆ ಬಂದು ಅಲ್ಲಿಯೇ ಉಳಿದುಕೊಂಡಿದ್ದ. ಸೋಮವಾರ ಬೆಳಗ್ಗೆ ತನ್ನೂರು ನೊರಕ್ಕಿ ಗ್ರಾಮಕ್ಕೆ ಪತ್ನಿಯನ್ನು ಕರೆದುಕೊಂಡು ಹೋಗಿದ್ದ. ಬಳಿಕ ನಿಮ್ಮ ಮಗಳನ್ನು ಕೊಲೆ ಮಾಡಿದ್ದೇನೆಂದು ಆಕೆಯ ತಂದೆಗೆ ತಿಳಿಸಿದ್ದಾನೆ. ಕೃತ್ಯವೆಸಗಿದ ಬಳಿಕ ಅಯ್ಯಪ್ಪನೂ ವಿಷ ಸೇವಿಸಿ ಆತ್ಮಹತ್ಯೆಗೆ ಯತ್ನಿಸಿದ್ದು ಹಾಸನ ಜಿಲ್ಲಾಸ್ಪತ್ರೆಗೆ ದಾಖಲಿಸಲಾಗಿದೆ.