ಎಚ್‌.ಡಿ.ದೇವೇಗೌಡರ ಅತ್ತೆ, ಶತಾಯುಷಿ ಕಾಳಮ್ಮ ನಿಧನ

Team Udayavani, Jan 5, 2018, 7:50 AM IST

ಹಾಸನ: ಮಾಜಿ ಪ್ರಧಾನಿ ಎಚ್‌.ಡಿ. ದೇವೇಗೌಡ ಅತ್ತೆ, ಶತಾಯುಷಿ ಕಾಳಮ್ಮ ಗುರುವಾರ ನಿಧನರಾದರು.ಮೃತ ಕಾಳಮ್ಮ ಅವರಿಗೆ ದೇವೇಗೌಡ ಅವರ ಪತ್ನಿ ಚೆನ್ನಮ್ಮ ಸೇರಿ ಮೂವರು ಹೆಣ್ಣು, ಮತ್ತು ನಾಲ್ವರು ಪುತ್ರರು. ಆ ಪೈಕಿ ಚೆನ್ನಮ್ಮ ಹಿರಿ ಮಗಳು. ಹಿರಿಯ ಮಗ ಹಾಸನ ಜಿಪಂ ಮಾಜಿ ಅಧ್ಯಕ್ಷ ಎಚ್‌.ಎಸ್‌.ಪುಟ್ಟಸ್ವಾಮಿಗೌಡ 10 ವರ್ಷಗಳ ಹಿಂದೆಯೇ ನಿಧನರಾಗಿದ್ದರು.

ವಯೋ ಸಹಜ ಅನಾರೋಗ್ಯದಿಂದ ಬಳಲುತ್ತಿದ್ದ ಕಾಳಮ್ಮ ಕಳೆದ ಕೆಲ ದಿನಗಳಿಂದ ಚಿಕಿತ್ಸೆ ಪಡೆಯುತ್ತಿದ್ದು, ಹಾಸನದಲ್ಲಿರುವ ತಮ್ಮ ಪುತ್ರನ ನಿವಾಸದಲ್ಲಿ ವಿಶ್ರಾಂತಿಯಲ್ಲಿದ್ದರು. ಗುರುವಾರ ಮುಂಜಾನೆ ಕೊನೆಯುಸಿರೆಳೆದ ನಂತರ ಮೃತದೇಹವನ್ನು ಸ್ವಗ್ರಾಮ ಹಾಸನ ತಾಲೂಕು ಮೊಸಳೆ ಹೊಸಹಳ್ಳಿ ಸಮೀಪದ ಮುತ್ತಿಗೆ ಹಿರೇಹಳ್ಳಿಗೆ ಕೊಂಡೊಯ್ಯಲಾಯಿತು.

ನಿಧನವಾರ್ತೆ ಕೇಳಿ ಎಚ್‌.ಡಿ.ದೇವೇಗೌಡ ದಂಪತಿ ಮುತ್ತಿಗೆ ಹಿರೇಹಳ್ಳಿಗೆ ಬಂದರು. ದೇವೇಗೌಡರ ಪುತ್ರರಾದ ಎಚ್‌.ಡಿ.ಬಾಲಕೃಷ್ಣೇಗೌಡ ದಂಪತಿ, ಮಾಜಿ ಸಚಿವ ಎಚ್‌.ಡಿ.ರೇವಣ್ಣ, ಭವಾನಿ ರೇವಣ್ಣ, ಮಾಜಿ ಮುಖ್ಯಮಂತ್ರಿ ಎಚ್‌.ಡಿ.ಕುಮಾರಸ್ವಾಮಿ, ಅನಿತಾ ಕುಮಾರಸ್ವಾಮಿ ಪುತ್ರರು, ಸಂಬಂಧಿರು ಅಂತಿಮ ದರ್ಶನ ಪಡೆದು ಅಂತ್ಯಕ್ರಿಯೆಯಲ್ಲಿ ಪಾಲ್ಗೊಂಡರು.