ಗೌರವದಿಂದ ಮಾತಾಡಿ: ಗೌಡರಿಗೆ ತಿರುಗೇಟು

Team Udayavani, Jan 25, 2018, 6:45 AM IST

ಹಾಸನ: ಮಾಜಿ ಪ್ರಧಾನಿ ಎಚ್‌.ಡಿ.ದೇವೇಗೌಡರು ದೊಡ್ಡವರು. ಅವರು ವಯಸ್ಸಿಗೆ ತಕ್ಕಂತೆ ಗೌರವದಿಂದ
ಮಾತನಾಡಬೇಕು ಎಂದು ಜಿಲ್ಲಾ ಉಸ್ತುವಾರಿ ಸಚಿವ ಎ. ಮಂಜು ತಿರುಗೇಟು ನೀಡಿದರು.

ಶ್ರವಣಬೆಳಗೊಳದಲ್ಲಿ ಮಾತನಾಡಿದ ಅವರು, ಮಹಾಮಸ್ತಕಾಭಿಷೇಕದ ಕಾಮಗಾರಿಗಳಲ್ಲಿ ನನಗೆ
ಪರ್ಸೆಂಟೇಜ್‌, ಕಮೀಷನ್‌ ಸಿಗಲಿಲ್ಲವೆಂದು ಡೀಸಿಯನ್ನು ವರ್ಗಾವಣೆ ಮಾಡಿಸಿದ್ದೇ ನೆಂದು ದೇವೇಗೌಡರು ಆರೋಪ ಮಾಡುವುದಾದರೆ, 2006ರ ಮಹಾಮಸ್ತಕಾಭಿಷೇಕದ ಸಂದರ್ಭದಲ್ಲಿ ಅವರ ಮಗ ರೇವಣ್ಣನವರೇ ಜಿಲ್ಲಾ ಉಸ್ತುವಾರಿ
ಸಚಿವರಾಗಿದ್ದರು. ಆಗ ರೇವಣ್ಣ ಅವರೂ ಪರ್ಸೆಂಟೇಜ್‌, ಕಮೀಷನ್‌ ತೆಗೆದುಕೊಂಡಿದ್ರಾ ಎಂದು ಪ್ರಶ್ನಿಸಿದ್ದಾರೆ.

ಜಿಲ್ಲಾಧಿಕಾರಿ ರೋಹಿಣಿ ಸಿಂಧೂರಿ ಅವರ ವರ್ಗಾವಣೆಗೆ ನಾನು ಒತ್ತಡ ಹಾಕಿಲ್ಲ. ಆಡಳಿತಾತ್ಮಕ ಕಾರಣಕ್ಕೆ ಸರ್ಕಾರ
ಐಎಎಸ್‌ ಅಧಿಕಾರಿಗಳನ್ನು ವರ್ಗಾವಣೆ ಮಾಡಿದೆ ಎಂದರಲ್ಲದೆ, ಚುನಾವಣಾ ಆಯೋಗದ ಪತ್ರ ಬರೆದ ಬಗ್ಗೆ ತಮಗೇನೂ ಗೊತ್ತಿಲ್ಲ. ಮುಂದಿನ ದಿನಗಳಲ್ಲಿ ಸರ್ಕಾರ ಏನು ನಿರ್ಧಾರ ತೆಗೆದುಕೊಳ್ಳಬೇಕೋ ತೆಗೆದುಕೊಳ್ಳಲಿದೆ ಎಂದು ಹೇಳುವ ಮೂಲಕ ಶೀಘ್ರದಲ್ಲೇ ಡೀಸಿ ವರ್ಗಾವಣೆ ಸುಳಿವು ನೀಡಿದರು.