ದೇವರ ಪೂಜೆ ಬಾಡೂಟಕ್ಕೆ ಜಗಳ: ಯುವಕನ ಕೊಲೆ

Team Udayavani, Jan 19, 2022, 1:27 PM IST

ಹಾಸನ: ದೇವರ ಪೂಜೆಯ ಬಾಡೂಟಕ್ಕೆ ಆಹ್ವಾನಿಸಲಿಲ್ಲವೆಂದು ಸ್ನೇಹಿತರ ನಡುವೆ ಉಂಟಾದ ಜಗಳ ಕೊಲೆಯಲ್ಲಿ ಅಂತ್ಯಗೊಂಡಿರುವ ಘಟನೆ ಅರಸೀಕೆರೆ ತಾಲೂಕು ಪುರ್ಲೆಹಳ್ಳಿಯಲ್ಲಿ ನಡೆದಿದೆ.

ಗಲಾಟೆ: ಪುರ್ಲೆಹಳ್ಳಿ ಗ್ರಾಮದ ಶರತ್‌ (29) ಕೊಲೆಯಾದ ಯುವಕ. ಪುರ್ಲೆ ಹಳ್ಳಿಯ ಗಿರೀಶ್‌ ಮತ್ತು ಶರತ್‌ ಎಂಬವರ ಮನೆಯವರು ಚಿಕ್ಕಮಗಳೂರು ಜಿಲ್ಲೆಯ ಸಖರಾಯಪಟ್ಟಣ ಸಮೀಪದ ಚೌಡೇಶ್ವರಿ ದೇಗುಲದಲ್ಲಿ ಭಾನುವಾರ ಪೂಜೆ ಮಾಡಿಸಿ ಬಾಡೂಟ ಹಾಕಿದ್ದರು. ಆದರೆ, ನಮ್ಮನ್ನು ಊಟಕ್ಕೆ ಕರೆದಿಲ್ಲ. ಕರೆದಿದ್ದರೆ ನಾವೂ ಹೋಗುತ್ತಿದ್ದೆವು ಎಂದುಗಿರೀಶ್‌ ಸಂಬಂಧಿಕರೂ ಆದ ನಟರಾಜು ಕುಟುಂಬದವರು ಭಾನುವಾರ ರಾತ್ರಿ ಜಗಳ ತೆಗೆದಿದ್ದರು.

ಈ ವೇಳೆ ಗ್ರಾಮದ ಹಿರಿಯರು ಜಗಳವನ್ನು ಬಿಡಿಸಿ ಬುದ್ಧಿವಾದ ಹೇಳಿಕಳುಹಿಸಿದ್ದರು. ಘಟನೆಯಿಂದ ಸಿಟ್ಟಿಗೆದ್ದಿದ್ದ ಕೆಂಡಾಮಂಡಲವಾಗಿದ್ದ ನಟರಾಜು ಇತರರು ಗಿರೀಶ್‌ ಮತ್ತು ಶರತ್‌ ಮನೆಗೆ ನುಗ್ಗಿ ಮಾರಕಾಸ್ತ್ರಗಳಿಂದ ಹಲ್ಲೆ ಮಾಡಿದ್ದರು.

ಪ್ರಕರಣ ದಾಖಲು: ನಟರಾಜು ಧನಪಾಲ್‌, ಅರ್ಜುನ್‌, ಮಂಜುನಾಥ ಮತ್ತಿತರರು ಹಲ್ಲೆನಡೆಸಿದ್ದು, ಹಲ್ಲೆಯಿಂದ ಗಾಯಗೊಂಡಿದ್ದಶರತ್‌, ರಾಖೇಶ್‌ ಯೋಗೇಶ್‌ ಆಸ್ಪತ್ರೆಯಲ್ಲಿಚಿಕಿತ್ಸೆ ಪಡೆಯುತ್ತಿದ್ದರು. ತೀವ್ರವಾಗಿ ಗಾಯಗೊಂಡಿದ್ದ ಶರತ್‌ (28) ಸೋಮವಾರ ರಾತ್ರಿ ಬೆಂಗಳೂರಿನ ಖಾಸಗಿ ಆಸ್ಪತ್ರೆಯಲ್ಲಿ ಚಿಕಿತ್ಸೆ ಫ‌ಲಕಾರಿಯಾಗದೇ ಸಾವನ್ನಪ್ಪಿದರು.

ಅರಸೀಕೆರೆ ತಾಲೂಕು ಬಾಣಾವರ ಠಾಣೆಯಲ್ಲಿ ಈ ಸಂಬಂಧ ಪ್ರಕರಣ ದಾಖಲಾಗಿದ್ದು, ಆರೋಪಿಗಳು ತಲೆ ಮರೆಸಿಕೊಂಡಿದ್ದಾರೆ.