ಮುಕ್ತಿ ಮಂದಿರದಲ್ಲಿ ತ್ರಿಕೋಟಿ ಶಿವಲಿಂಗ ಸ್ಥಾಪನೆ

Team Udayavani, Apr 1, 2022, 3:36 PM IST

ಲಕ್ಷ್ಮೇಶ್ವರ: ಭೂ ಕೈಲಾಸ ಮುಕ್ತಿಮಂದಿರ ಧರ್ಮಕ್ಷೇತ್ರದಲ್ಲಿ ತ್ರಿಕೋಟಿ ಶಿವಲಿಂಗ ಸ್ಥಾಪನೆಯಾಗಿ ಜ್ಯೋತಿರ್ಲಿಂಗಗಳಷ್ಟೇ ಪವಿತ್ರ ಕ್ಷೇತ್ರವಾಗಬೇಕೆಂಬ ಲಿಂ|ಜ|ವೀರ ಗಂಗಾಧರ ಶಿವಾಚಾರ್ಯರ ಕನಸು, ಸಂಕಲ್ಪ ಈಡೇರಿಕೆಗೆ ಕಾಲ ಕೂಡಿ ಬಂದಿದೆ.

ಅವರ ಕೃಪಾಶೀರ್ವಾದದಿಂದ ಮುಕ್ತಿಮಂದಿರ ಧರ್ಮ ಕ್ಷೇತ್ರದಲ್ಲಿ ಏ.2 ರಂದು ಶನಿವಾರ ಬೆಳಿಗ್ಗೆ 9ಕ್ಕೆ ಬಾಳೆಹೊನ್ನೂರು ಜ|ಪ್ರಸನ್ನ ರೇಣುಕ ಡಾ|ವೀರ ಸೋಮೇಶ್ವರ ಶಿವಾಚಾರ್ಯರು ತ್ರಿಕೋಟಿ ಶಿವಲಿಂಗ ಸ್ಥಾಪನೆಯ ಗದ್ದುಗೆಗಳ ಶಂಕುಸ್ಥಾಪನೆ(ಗುದ್ದಲಿ ಪೂಜೆ) ನೆರವೇರಿಸಲಿದ್ದಾರೆ ಎಂದು ಮುಕ್ತಿಮಂದಿರ ಧರ್ಮಕ್ಷೇತ್ರದ ಪಟ್ಟಾಧ್ಯಕ್ಷರಾದ ಶ್ರೀ ವಿಮಲರೇಣುಕ ವೀರಮುಕ್ತಿಮುನಿ ಶಿವಾಚಾರ್ಯ ಹೇಳಿದರು.

ಈ ಕುರಿತು ಗುರುವಾರ ಸುದ್ದಿಗೋಷ್ಠಿಯಲ್ಲಿ ಮಾಹಿತಿ ನೀಡಿದ ಅವರು, ಕಳೆದ 2-3 ದಶಕಗಳ ಭಕ್ತರ ಕನಸಾಗಿರುವ ತ್ರಿಕೋಟಿ ಲಿಂಗ ಸ್ಥಾಪನೆಗೆ ಅನೇಕ ಸಮಸ್ಯೆಗಳು ಎದುರಾದರೂ ಸಹ ಇದೀಗ ಲಿಂ|ಜಗದ್ಗುರುಗಳ ಸಂಕಲ್ಪ ಸಾಕಾರಕ್ಕೆ ಮುಂದಡಿ ಇಡಲಾಗುತ್ತಿದೆ.

ಕ್ಷೇತ್ರದಲ್ಲಿ ಈಗಾಗಲೇ ಸಿದ್ಧಗೊಂಡಿರುವ ಸಾವಿರಾರು ಶಿವಲಿಂಗಗಳು ಪ್ರತಿಷ್ಠಾಪನೆಗೊಂಡರೆ ಶ್ರೀಕ್ಷೇತ್ರ ದೇಶಾದ್ಯಂತ ಪ್ರಸಿದ್ಧಿ ಪಡೆಯಲಿದೆ. 2.5 ಅಡಿ ಎತ್ತರದ ಶಿವಲಿಂಗವೊಂದರಲ್ಲಿ 6000 ಗರ್ಭಲಿಂಗಗಳಿರುವಂತಹ 5000 ಶಿವಲಿಂಗಗಳು ಸೇರಿದಾಗ ತ್ರಿಕೋಟಿ ಲಿಂಗವಾಗುತ್ತವೆ. ಈ 5000 ಶಿವಲಿಂಗಗಳು 8 ವರ್ತುಲಗಳಲ್ಲಿ ಪ್ರತಿಷ್ಠಾಪಿತಗೊಂಡು ನಡುವೆ ಲಿಂ|ಜಗದ್ಗುರುಗಳ ಹಾಗೂ ರೇಣುಕರ ಬೃಹತ್‌ ಮೂರ್ತಿ ಮಂದಿರ ನಿರ್ಮಾಣಗೊಳ್ಳಲಿದೆ.

ಈಗಾಗಲೇ ಕ್ಷೇತ್ರದಲ್ಲಿ 4500ಕ್ಕೂ ಹೆಚ್ಚು ಶಿವಲಿಂಗಗಳು, ಒಂದು ಬೃಹತ್‌ ಶಿವಲಿಂಗ ಮತ್ತು ಬಸವಣ್ಣನ ಮೂರ್ತಿ ಸಿದ್ಧಗೊಂಡು ಶ್ರೀಕ್ಷೇತ್ರದಲ್ಲಿ ನೆಲೆನಿಂತಿವೆ. ಲಿಂ|ಶ್ರೀಗಳ ಸಂಕಲ್ಪ ಈಡೇರಿಕೆಗೆ ನಾಡಿನ ಅನೇಕ ಭಕ್ತರು ಸಹಾಯ ನೀಡಿದ್ದು, 1 ಶಿವಲಿಂಗ ಸೇವೆಗೆ 6001 ರೂ. ನಿಗದಿಪಡಿಸಲಾಗಿದೆ ಎಂದರು.

ಬಹುದೊಡ್ಡ ಧರ್ಮ ಕಾರ್ಯಕ್ಕೆ ಭಕ್ತರಿಂದ ತನು, ಮನ, ಧನದ ಸಹಾಯ- ಸಹ ಕಾರದ ಅಗತ್ಯವಿದೆ. “ಮಾನವ ಧರ್ಮಕ್ಕೆ ಜಯವಾಗಲಿ- ಧರ್ಮದಿಂದಳೇ ವಿಶ್ವಕ್ಕೆ ಶಾಂತಿ’ ಎಂಬ ಘೋಷಣೆಯನ್ನು ಜಗತ್ತಿಗೆ ನೀಡಿದ ಲಿಂ|ಜ|ವೀರಗಂಗಾಧರ ಶಿವಾಚಾರ್ಯರು ಸಂಕಲ್ಪ ಈಡೇರಿಕೆಗೆ ಕೈಗೊಂಡ ಮಹೋನ್ನತ ಕಾರ್ಯಕ್ಕೆ ರಂಭಾಪುರಿ ಪೀಠದ ಜಗದ್ಗುರುಗಳ ಅನುಗ್ರಹ, ಭಕ್ತ ಗಣದ ಸಹಾಯ- ಸಹಕಾರದಿಂದ ತ್ರಿಕೋಟಿ ಶಿವಲಿಂಗ ಸ್ಥಾಪನೆಯ ಕಾರ್ಯಕ್ಕೆ ಮುಂದಡಿಯಿಡಲು ಸಾಧ್ಯವಾಗುತ್ತಿವೆ ಎಂದರು.

ಈ ಶ್ರೇಷ್ಠ ಕಾರ್ಯ ನಿರ್ವಿಘ್ನವಾಗಿ ಸಾಗಲು ಯುಗಾದಿಯ ಪರ್ವಕಾಲದ ಶುಭಕೃತ ನಾಮ ಸಂವತ್ಸರದಲ್ಲಿ ರಂಭಾಪುರಿ ಜಗ ದ್ಗುರುಗಳು ಭೂಮಿಪೂಜೆ ನೆರವೇರಿಸಲಿದ್ದಾರೆ. ನಾಡಿನ ಹರ-ಗುರು-ಚರಮೂರ್ತಿಗಳು, ರಾಜಕೀಯ ಮುಖಂಡರು, ಗಣ್ಯರು ಭಾಗವಹಿಸುವರು ಎಂದರು.