ಹಾವೇರಿ: ಜಿಲ್ಲೆಯಲ್ಲಿ ಕ್ಷೀಣಿಸುತ್ತಿದೆ ಎಲೆಬಳ್ಳಿ ಬೆಳೆ ಕ್ಷೇತ್ರ

Team Udayavani, Jan 13, 2025, 5:49 PM IST

ಉದಯವಾಣಿ ಸಮಾಚಾರ
ಹಾವೇರಿ: ಬಂಗಾರದ ಬೆಳೆ ಎಂದೇ ಗುರುತಿಸಿಕೊಂಡಿದ್ದ ಎಲೆಬಳ್ಳಿ(ವೀಳ್ಯದೆಲೆ)ಬೆಳೆ ಕ್ಷೇತ್ರ ವರ್ಷದಿಂದ ವರ್ಷಕ್ಕೆ ಕ್ಷೀಣಿಸುತ್ತಿದ್ದು, ಕಳೆದ ಮೂರು ವರ್ಷಗಳಲ್ಲಿ 393.84 ಹೆಕ್ಟೇರ್‌ ಕುಸಿತ ಕಂಡಿರುವುದು ಆತಂಕ ಮೂಡಿಸಿದೆ.

ಕಳೆದ 2-3 ವರ್ಷಗಳಲ್ಲಿ ಜಿಲ್ಲೆಯಲ್ಲಿ ಎದುರಾದ ಅತಿವೃಷ್ಟಿ, ಪ್ರವಾಹ ಹಾಗೂ ಬರದಿಂದ ಎಲೆಬಳ್ಳಿ ತೋಟ ನಿರ್ವಹಣೆಗೆ ಕಷ್ಟ ಆಗುತ್ತಿರುವ ಹಿನ್ನೆಲೆಯಲ್ಲಿ ಜಿಲ್ಲೆಯ ರೈತರು ಎಲೆಬಳ್ಳಿ ತೋಟದಿಂದ ವಿಮುಕ್ತರಾಗುತ್ತಿದ್ದಾರೆ. ಎಲೆಬಳ್ಳಿ ತೋಟಕ್ಕೆ ನೀರಾವರಿ ಅಗತ್ಯವಿದ್ದು, ಜಿಲ್ಲೆಯಲ್ಲಿ ವಾತಾವರಣದ ವೈಪರಿತ್ಯದ ಪರಿಣಾಮ ವೀಳ್ಯೆದೆಲೆ ಬೆಳೆಯಲು ರೈತರು ಆಸಕ್ತಿ ತೋರದ ಹಿನ್ನೆಲೆಯಲ್ಲಿ ವರ್ಷದಿಂದ ವರ್ಷಕ್ಕೆ ಎಲೆಬಳ್ಳಿ ತೋಟ ಕ್ಷೀಣಿಸುತ್ತಿದೆ. ಕಳೆದ ಮೂರು ವರ್ಷಗಳಲ್ಲಿ 2452.84 ಹೆಕ್ಟೇರ್‌
ಪ್ರದೇಶದಲ್ಲಿದ್ದ ಎಲೆಬಳ್ಳಿ ತೋಟ ಪ್ರಸಕ್ತ ವರ್ಷದಲ್ಲಿ 393.84 ಹೆಕ್ಟೇರ್‌ಗೆ ಕುಸಿತಗೊಂಡಿದೆ.

ಜಿಲ್ಲೆಯ ಸವಣೂರು, ಶಿಗ್ಗಾವಿ, ಹಿರೇಕೆರೂರು, ರಾಣಿಬೆನ್ನೂರು ಭಾಗದಲ್ಲಿ ನವಾಬರ ಕಾಲದಿಂದಲೂ ವ್ಯಾಪಕವಾಗಿ ವೀಳ್ಯದೆಲೆ ಬೆಳೆಯಲಾಗುತ್ತಿದೆ. ಅದರಲ್ಲೂ ಸವಣೂರು ಎಲೆಗೆ ಮಾರುಕಟ್ಟೆಯಲ್ಲಿ ಅಪಾರ ಬೇಡಿಕೆಯಿದೆ. ಆದರೆ ನಿರಂತರ ಬರದಿಂದ ಎಲೆಬಳ್ಳಿ ತೋಟದ ಮೇಲೆ ಪರಿಣಾಮ ಉಂಟು ಮಾಡಿದೆ. ಅಲ್ಲದೇ ಕೃಷಿ ಕಾರ್ಮಿಕರ ಕೊರತೆ, ವಿವಿಧ ರೋಗಬಾಧೆ, ಸಕಾಲಿಕ ಮಾಹಿತಿ ಕೊರತೆಯಿಂದ ಎಲೆಬಳ್ಳಿ ತೋಟ ಸೊರಗುತ್ತಿವೆ.

ಎಲೆಬಳ್ಳಿ ತೋಟದ ಅಂಕಿ-ಅಂಶಗಳ ಕುರಿತು ಸ್ವತಃ ತೋಟಗಾರಿಕೆ ಇಲಾಖೆ ಅಧಿಕಾರಿ, ಸಿಬ್ಬಂದಿ ಕೂಡ ಈ ಬಗ್ಗೆ ಹಲವು ಅನುಮಾನಗಳನ್ನು ವ್ಯಕ್ತಪಡಿಸಿದ್ದು, ಮೂರೇ ವರ್ಷಕ್ಕೆ ಇಷ್ಟೊಂದು ಪ್ರಮಾಣದಲ್ಲಿ ಕುಸಿತ ಸಾಧ್ಯವಿಲ್ಲ. ಆದರೆ ಬೆಳೆ ಸರ್ವೇ ಸಂದರ್ಭದಲ್ಲಿ ಎಲೆಬಳ್ಳಿ, ತರಕಾರಿ ಬೆಳೆ ಎಂದು ಇತ್ತೀಚಿನ ದಿನಗಳಲ್ಲಿ ರೈತರು ನಮೂದಿಸುವಲ್ಲಿ ಹಿಂದೇಟು ಹಾಕುತ್ತಿದ್ದಾರೆ.

ಅಲ್ಲದೇ ಈ ಮೊದಲು ಕ್ಷೇತ್ರ ಕಾರ್ಯ ಅಂದರೆ ಸ್ವತಃ ಕಂದಾಯ, ತೋಟಗಾರಿಕೆ, ಕೃಷಿ ಇಲಾಖೆ ಸಿಬ್ಬಂದಿ ಜಮೀನಿಗೆ ತೆರಳಿ ಬೆಳೆ ಸಮೀಕ್ಷೆ ನಡೆಸುತ್ತಿದ್ದರು. ಆದರೆ ಪ್ರಸ್ತುತ ತಾಂತ್ರಿಕತೆ ಪರಿಣಾಮ ಇಂದು ಸ್ವತಃ ರೈತರೇ “ಮೊಬೈಲ್‌ ಆ್ಯಪ್‌’ ಮೂಲಕ ತಮ್ಮ ಬೆಳೆ ನಮೂದು ಮಾಡುವ ಅವಕಾಶವಿದೆ. ಈ ವೇಳೆ ಮೆಕ್ಕೆಜೋಳಕ್ಕೆ ಉತ್ತಮ ಬೆಳೆವಿಮೆ ಇರುವ ಹಿನ್ನೆಲೆಯಲ್ಲಿ ತೋಟಗಾರಿಕೆ ಬೆಳೆಗಳನ್ನು ನಮೂದಿಸದೇ ಇರುವುದು ಇಲಾಖೆಗೆ ಸವಾಲಾಗಿದೆ.

ಒಟ್ಟಾರೆ ಕಳೆದ ಮೂರು ವರ್ಷಗಳಲ್ಲಿ ಜಿಲ್ಲೆಯಲ್ಲಿನ ವೀಳ್ಯದೆಲೆ ಅಥವಾ ಎಲೆಬಳ್ಳಿ ತೋಟಗಳು ವರ್ಷದಿಂದ ವರ್ಷಕ್ಕೆ ಕುಸಿತಗೊಳ್ಳುತ್ತಿರುವುದು ಆತಂಕಕಾರಿ ಬೆಳವಣಿಯಾಗಿದ್ದು, ಈ ನಿಟ್ಟಿನಲ್ಲಿ ಸಂಬಂಧಿಸಿದ ಇಲಾಖೆಗಳು ಎಚ್ಚೆತ್ತುಕೊಳ್ಳುವ ಜತೆಗೆ ರೈತರಿಗೆ ಎಲೆಬಳ್ಳಿ ಬೆಳೆಯಲು ಪ್ರೋತ್ಸಾಹ ನೀಡಲು ಮುಂದಾಗಬೇಕಿದೆ.

ಜಿಲ್ಲೆಯಲ್ಲಿ ಅಡಿಕೆ ಬೆಳೆ ಕ್ಷೇತ್ರ ವರ್ಷದಿಂದ ವರ್ಷಕ್ಕೆ ಏರಿಕೆ ಆಗುತ್ತಿದ್ದು,ವೀಳ್ಯದೆಲೆ ಮತ್ತು ತರಕಾರಿ ಬೆಳೆಯ ಕ್ಷೇತ್ರದಲ್ಲಿ ಕುಸಿತ ಕಂಡಿದೆ. ಈ ಕುರಿತು ಜಿಲ್ಲಾಡಳಿತದ ಗಮನಕ್ಕೆ ತಂದಿದ್ದು, ಇದರ ಸಕಾಲಿಕ ನಿರ್ವಹಣೆ ಮತ್ತು ಜಾಗೃತಿ ಮೂಡಿಸುವತ್ತ ಗಮನ ಹರಿಸಿದ್ದೇವೆ.
*ಸಿದ್ರಾಮಯ್ಯ ಸಂಬರಗಿಮಠ, ಸಹಾಯಕ
ನಿರ್ದೇಶಕರು, ತೋಟಗಾರಿಕೆ ಇಲಾಖೆ.

ಜಿಲ್ಲೆಯಲ್ಲಿ ಉಂಟಾಗುತ್ತಿರುವ ಅತಿವೃಷ್ಟಿ ಹಾಗೂ ಅನಾವೃಷ್ಟಿಯಿಂದ ವೀಳ್ಯದೆಲೆ ಬೆಳೆಗಾರರು ಅಪಾರ ನಷ್ಟ ಅನುಭವಿಸುವಂತಾಗಿದೆ. ಹೀಗಾಗಿ ಎಲೆಬಳ್ಳಿ ತೋಟ ನಿರ್ವಹಣೆ ಮಾಡಲಾಗದೇ ರೈತರು ಪರ್ಯಾಯ ಬೆಳೆಗಳತ್ತ ಗಮನ ಹರಿಸುತ್ತಿದ್ದರಿಂದ ಜಿಲ್ಲೆಯಲ್ಲಿ ಎಲೆಬಳ್ಳಿ ತೋಟ ವರ್ಷದಿಂದ ವರ್ಷಕ್ಕೆ ಕ್ಷೀಣಿಸುತ್ತಿದೆ. ಸರ್ಕಾರ ಎಲೆಬಳ್ಳಿ ಬೆಳೆಗಾರರಿಗೆ ಅಗತ್ಯ
ಪ್ರೋತ್ಸಾಹ ನೀಡಬೇಕಿದೆ.
ಅಲ್ಲಾಭಕ್ತ ಕಡಕೋಳ, ಎಲೆಬಳ್ಳಿ ಬೆಳೆಗಾರ

■ ವೀರೇಶ ಮಡ್ಲೂರ