ಲಾಕ್‌ಡೌನ್‌ ಸಡಿಲಿಕೆ; ಕೃಷಿ ಚಟುವಟಿಕೆ ಚುರುಕು

Team Udayavani, May 19, 2020, 2:44 PM IST

ಸಾಂದರ್ಭಿಕ ಚಿತ್ರ

ಹಾವೇರಿ: ಕಳೆದ ವರ್ಷ ನೆರೆ, ಅತಿವೃಷ್ಟಿ ಹಾಗೂ ಪ್ರಸಕ್ತ ಕೋವಿಡ್ ಲಾಕ್‌ಡೌನ್‌ ಸಂಕಷ್ಟಕ್ಕೆ ಸಿಲುಕಿದ್ದ ಜಿಲ್ಲೆಯ ರೈತರೀಗ ಹೊಸ ಆಸೆ, ಹೊಸ ನಿರೀಕ್ಷೆಯೊಂದಿಗೆ ಮತ್ತೆ ಜಮೀನಿನತ್ತ ಹೆಜ್ಜೆ ಹಾಕುತ್ತಿದ್ದಾರೆ.

ಜಿಲ್ಲೆಯ ವಿವಿಧ ಭಾಗಗಳಲ್ಲಿ ಮಳೆಯಾಗಿದ್ದರಿಂದ ರೈತರು ಭೂಮಿ ಹದಗೊಳಿಸಲು ಸಜ್ಜಾಗಿದ್ದಾರೆ. ಈ ವರ್ಷವಾದರೂ ಉತ್ತಮ ಮಳೆ-ಬೆಳೆ ಬಂದು ರೈತರ ಬದುಕು ಹಸನಾಗಬಹುದೆಂಬ ಆಸೆ ರೈತರ ಮನದಲ್ಲಿ ಚಿಗುರೊಡೆದಿದೆ. ಲಾಕ್‌ಡೌನ್‌ನಿಂದ ಕೃಷಿ ಸಲಕರಣೆಗಳನ್ನು ಸಜ್ಜುಗೊಳಿಸಿಕೊಳ್ಳಲು ಸಾಧ್ಯವಾಗದ ರೈತರೀಗ ಕೃಷಿ ಕಾರ್ಯಗಳಿಗೆ ಅವಶ್ಯವಿರುವ ಸಾಮಗ್ರಿಗಳ ಸಂಗ್ರಹಣೆ, ಸಿದ್ಧತೆ ನಡೆಸಿದ್ದಾರೆ. ಕೃಷಿಗೆ ಬೇಕಾಗುವ ಪ್ರಮುಖ ಸಲಕರಣೆಗಳಾದ ರಂಟಿ, ಕುಂಟಿ, ಕೊರಡು, ಬುಡಗುಂಟಿ, ನೊಗ, ಕಾಯಿಕೊಲು ದುರಸ್ತಿ ಮಾಡಿಸಿಕೊಳ್ಳುತ್ತಿದ್ದಾರೆ. ಕಮ್ಮಾರನ ಕುಲುಮೆಗೆ ಒಯ್ದು ಸರಿ ಮಾಡಿಕೊಳ್ಳುತ್ತಿದ್ದಾರೆ. ಇನ್ನು ಟ್ರ್ಯಾಕ್ಟರ್‌ ಮೂಲಕ ಬಿತ್ತನೆ ಮಾಡುವವರು ಯಂತ್ರದ ನೇಗಿಲು, ರಂಟಿ ತಯಾರಿಸಿಕೊಳ್ಳುತ್ತಿದ್ದಾರೆ. ಹೀಗಾಗಿ ಕೃಷಿ ಚಟುವಟಿಕೆಗೆ ಪೂರಕ ಸೇವೆ ನೀಡುವ ಅಂಗಡಿಗಳಲ್ಲಿ ವ್ಯವಹಾರ ಜೋರಾಗಿದೆ.

ಬಿತ್ತನೆ ಗುರಿ: ಜಿಲ್ಲೆಯಲ್ಲಿ ಪ್ರಸಕ್ತ ಮುಂಗಾರು ಹಂಗಾಮಿಗೆ ಒಟ್ಟಾರೆ 3,32,826 ಹೆಕ್ಟೇರ್‌ ಬಿತ್ತನೆ ಗುರಿ ಹೊಂದಲಾಗಿದೆ. ಏಕದಳ 2,07,973 ಹೆಕ್ಟೇರ್‌, ದ್ವಿದಳ 7,209 ಹೆಕ್ಟೇರ್‌, ಎಣ್ಣೆಕಾಳು 31,854 ಹೆಕ್ಟೇರ್‌, ವಾಣಿಜ್ಯ ಬೆಳೆ 85,790 ಹೆಕ್ಟೇರ್‌, ಗುರಿ ಹೊಂದಲಾಗಿದೆ. ಇದರಲ್ಲಿ ಪ್ರಮುಖವಾಗಿ ಗೋವಿನಜೋಳ 1,63,318 ಹೆಕ್ಟೇರ್‌, ಹತ್ತಿ 77,565 ಹೆಕ್ಟೇರ್‌, ಭತ್ತ 40235 ಹೆಕ್ಟೇರ್‌, ಶೇಂಗಾ 19,840 ಹೆಕ್ಟೇರ್‌ ಹಾಗೂ ಸೋಯಾ ಅವರೆ 11,360 ಹೆಕ್ಟೇರ್‌ ಪ್ರಮುಖ ಬೆಳೆಗಳಾಗಿವೆ.

ಮುಂಗಾರು ಹಂಗಾಮಿಗೆ 33650 ಕ್ವಿಂಟಲ್‌ ಬಿತ್ತನೆ ಬೀಜದ ಅವಶ್ಯಕತೆಯಿದೆ. ಇದರಲ್ಲಿ ಮುಖ್ಯವಾಗಿ ಹೈಬ್ರಿಡ್‌ ಗೋವಿನಜೋಳ 12000 ಕ್ವಿಂಟಲ್‌, ಭತ್ತ 5500 ಕ್ವಿಂಟಲ್‌, ಸೋಯಾ ಅವರೆ 12000 ಕ್ವಿಂಟಲ್‌, ತೊಗರಿ 900 ಕ್ವಿಂಟಲ್‌, ಹೆಸರು 400 ಕ್ವಿಂಟಲ್‌, ಶೇಂಗಾ 2700 ಕ್ವಿಂಟಲ್‌ ಬೀಜಗಳ ಅವಶ್ಯಕತೆಯಿದ್ದು, ಈವರೆಗೆ 610 ಕ್ವಿಂಟಲ್‌ ಬಿತ್ತನೆ ಬೀಜ ದಾಸ್ತಾನು ಮಾಡಿಕೊಳ್ಳಲಾಗಿದೆ. ಬಿತ್ತನೆ ಬೀಜ ಸರಬರಾಜು ಮುಂದುವರಿದಿದೆ.

ಗೊಬ್ಬರ ದಾಸ್ತಾನು: ಮುಂಗಾರು ಹಂಗಾಮಿಗೆ ಒಟ್ಟು 1,05,858 ಟನ್‌ ರಸಗೊಬ್ಬರ ಹಂಚಿಕೆಯಾಗಿದೆ ಇದರಲ್ಲಿ ಯೂರಿಯಾ 48200 ಟನ್‌, ಡಿಎಪಿ 21720 ಟನ್‌, ಎಂ.ಓ.ಪಿ 4478 ಟನ್‌, ಕಾಂಪ್ಲೆಕ್ಸ್‌ 29650 ಟನ್‌ ಇರುತ್ತದೆ. ಇದರಲ್ಲಿ 31616 ಟನ್‌ ಸರಬರಾಜು ಆಗಿದ್ದು, 485 ಟನ್‌ ವಿತರಣೆಯಾಗಿ, 31131 ಟನ್‌ ದಾಸ್ತಾನು ಇದೆ. ಅವಶ್ಯಕತೆಗೆ ಅನುಗುಣವಾಗಿ ರಸಗೊಬ್ಬರ ಸರಬರಾಜಿಗೆ ಇಲಾಖೆ ವ್ಯವಸ್ಥೆ ಮಾಡಿಕೊಂಡಿದೆ.

ದರ ಹೆಚ್ಚಿಸಿದರೆ ದೂರು ನೀಡಿ: ಜಿಲ್ಲೆಯ ಎಲ್ಲ ಕೃಷಿ ಪರಿಕರ ಮಾರಾಟಗಾರರು ನಿಗದಿ ಪಡಿಸಿದ ದರದಲ್ಲಿ ಮಾರಲು ಜಿಲ್ಲಾಡಳಿತ . ಸೂಚನೆ ನೀಡಿದೆ. ಮಾರಾಟ ಮಾಡಿದ ಪರಿಕರಗಳಿಗೆ ಕಡ್ಡಾ ಯವಾಗಿ ರಸೀದಿ ಯಲ್ಲಿ ಲಾಟ್‌ ಇಲ್ಲವೇ ಬ್ಯಾಚ್‌ ಸಂಖ್ಯೆ ಹಾಗೂ ನಿಗದಿಪಡಿಸಿದ ದರ ನಮೂದಿಸಲು ಸೂಚಿಸಿದೆ. ಯಾವುದೇ ಮಾರಾಟಗಾರರು ನಿಗದಿಪಡಿಸಿದ ದರಕ್ಕಿಂತ ಹೆಚ್ಚಿನ ದರಕ್ಕೆ ಮಾರಿದರೆ, ಅವಧಿ  ಮೀರಿರುವ ಪರಿಕರ ಮಾರಿದರೆ ಯಾವುದೇ ಬಿತ್ತನೆ ಬೀಜ, ರಸಗೊಬ್ಬರದ ದಾಸ್ತಾನು ಮಾಡಿಕೊಂಡು ಕೃತಕ ಅಭಾವ ಸೃಷ್ಟಿಸಿದರೆ ರೈತರು ಕೂಡಲೇ ಸಮೀಪದ ಕೃಷಿ ಅಧಿಕಾರಿಗಳು ಅಥವಾ ಸಹಾಯಕ ಕೃಷಿ ನಿರ್ದೇಶಕರಿಗೆ ದೂರು ನೀಡಬೇಕೆಂದು ಜಿಲ್ಲಾಡಳಿತ ರೈತರಿಗೆ ತಿಳಿಸಿದೆ.

ಅಧಿಕೃತ ಪರವಾನಗಿ ಹೊಂದಿದ ಪರಿಕರ ಮಾರಾಟಗಾರರಿಂದ ಮಾತ್ರ ರೈತರು ಬೀಜ, ರಸಗೊಬ್ಬರ ಮತ್ತು ಸಸ್ಯ ಸಂರಕ್ಷಣಾ ಔಷಧಿ ಖರೀದಿಸಬೇಕು. ಖರೀದಿಸಿದ ಪರಿಕರಗಳಿಗೆ ಕಡ್ಡಾಯವಾಗಿ ರಸೀದಿ ಪಡೆಯಬೇಕು. ಯಾವುದೇ ಕಾರಣಕ್ಕೂ ರೈತರು ಯಾವುದೇ ಉಚಿತ-ಉಡುಗೊರೆ ಆಮಿಷಕ್ಕೊಳಗಾಗದೇ ಪರಿಕರಗಳ ಗುಣಮಟ್ಟ ಖಾತರಿಪಡಿಸಿಕೊಂಡು ಖರೀದಿಸಬೇಕು.  –ಬಿ.ಮಂಜುನಾಥ, ಜಂಟಿ ನಿರ್ದೇಶಕರು, ಕೃಷಿ ಇಲಾಖೆ

ಕಳೆದ ವರ್ಷ ನೆರೆ, ಅತಿವೃಷ್ಟಿಯಾಗಿ ಅಪಾರ ಪ್ರಮಾಣದ ಬೆಳೆ ಹಾಳಾಗಿತ್ತು. ಇನ್ನು ಅಳಿದುಳಿದ ಒಂದಿಷ್ಟು ಬೆಳೆಗೆ ಕೋವಿಡ್ ಲಾಕ್‌ಡೌನ್‌ನಿಂದ ಸಮರ್ಪಕ ಬೆಲೆಯೂ ಸಿಗಲಿಲ್ಲ. ಮೆಕ್ಕೆಜೋಳದ ಬೆಲೆಯಂತೂ ಪಾತಾಳಕ್ಕೆ ಕುಸಿಯಿತು. ಈಗಷ್ಟೇ ಒಂದಿಷ್ಟು ಮಳೆ ಬಿದ್ದಿದ್ದು ಮುಂದಿನ ದಿನಗಳಲ್ಲಿ ಮುಂಗಾರು ಸಕಾಲದಲ್ಲಿ, ಸಮರ್ಪಕವಾಗಿ ಸುರಿದು ಉತ್ತಮ ಬೆಳೆ ಬರಬಹುದೆಂಬ ನಿರೀಕ್ಷೆಯಲ್ಲಿ ಜಮೀನು ಹದಗೊಳಿಸಲು ಸಜ್ಜಾಗಿದ್ದೇವೆ. –ಶಿವಯೋಗಿ ಬೆನ್ನೂರು, ರೈತ

–ಎಚ್‌.ಕೆ. ನಟರಾಜ