9 ವರ್ಷದಲ್ಲಿ 7,347 ಕೋಟಿ ಆದಾಯ

Team Udayavani, Jun 26, 2019, 10:26 AM IST

ಕಲಬುರಗಿ: ಕಲಬುರಗಿ ರೈಲ್ವೆ ನಿಲ್ದಾಣ

ರಂಗಪ್ಪ ಗಧಾರ
ಕಲಬುರಗಿ: ಹೈದ್ರಾಬಾದ ಕರ್ನಾಟಕ ಭಾಗದ ಅಭಿವೃದ್ಧಿ ಮತ್ತು ಉದ್ಯೋಗ ಸೃಷ್ಟಿ ನಿಟ್ಟಿನಲ್ಲಿ ಕಲಬುರಗಿ ರೈಲ್ವೆ ವಿಭಾಗ ಆರಂಭಿಸಬೇಕೆಂಬ ಕೂಗಿನ ನಡುವೆ ಕಳೆದ ಒಂಭತ್ತು ವರ್ಷಗಳಲ್ಲಿ ಕಲಬುರಗಿ ಜಿಲ್ಲೆಯೊಂದರಿಂದಲೇ ರೈಲ್ವೆ ಇಲಾಖೆಗೆ ಬರೋಬ್ಬರಿ 7,347 ಕೋಟಿ ರೂ. ಆದಾಯ ಸಂದಾಯವಾಗಿರುವ ಅಂಶ ಬೆಳಕಿಗೆ ಬಂದಿದೆ.

ಆರ್‌ಟಿಐ ಕಾರ್ಯಕರ್ತ ಸುನೀಲ ಕುಲಕರ್ಣಿ ಎನ್ನುವರು ಪ್ರತಿ ವರ್ಷವೂ ಜಿಲ್ಲೆಯಿಂದ ರೈಲ್ವೆ ಇಲಾಖೆ ಗಳಿಸುತ್ತಿರುವ ಆದಾಯದ ಮಾಹಿತಿ ಕಲೆ ಹಾಕುತ್ತಿದ್ದಾರೆ. ಪ್ರಸ್ತಕ ವರ್ಷ ಸಲ್ಲಿಕೆಯಾದ ಆರ್‌ಟಿಐ ಅರ್ಜಿಯಿಂದ ಕಳೆದ 2018-19ನೇ ಆರ್ಥಿಕ ಸಾಲಿನಲ್ಲಿ ರೈಲ್ವೆ ಇಲಾಖೆಗೆ 794 ಕೋಟಿ ರೂ. ಆದಾಯ ಸಂದಾಯವಾಗಿರುವುದು ಬಯಲಾಗಿದೆ. ಮೇ 21ರಂದು ಸುನೀಲ ಸಲ್ಲಿಸಿದ್ದ ಅರ್ಜಿಯನ್ನು ಜೂ.13ರಂದು ರೈಲ್ವೆ ಇಲಾಖೆ ವಿಲೇವಾರಿ ಮಾಡಿದೆ.

ಹೈ.ಕ ಭಾಗದ ಕಲಬುರಗಿ, ಬೀದರ್‌, ಯಾದಗಿರಿ, ಬಳ್ಳಾರಿ, ರಾಯಚೂರು ಮತ್ತು ಕೊಪ್ಪಳ ಜಿಲ್ಲೆಗಳು ನಾಲ್ಕು ರೈಲ್ವೆ ವಲಯಗಳಿಗೆ ಹಂಚಿ ಹೋಗಿವೆ. ಕಲಬುರಗಿ ಜಿಲ್ಲೆಯ ಪ್ರಮುಖ ಆದಾಯ ಕೇಂದ್ರಗಳಾದ ಕಲಬುರಗಿ, ವಾಡಿ ರೈಲ್ವೆ ನಿಲ್ದಾಣ ಮಧ್ಯ ರೈಲ್ವೆಯ ಸೊಲ್ಲಾಪುರ ವಿಭಾಗಕ್ಕೆ ಒಳಪಟ್ಟರೆ, ಚಿತ್ತಾಪುರ, ಸೇಡಂ ಹಾಗೂ ಮಳಖೇಡ್‌ ನಿಲ್ದಾಣ ದಕ್ಷಿಣ ಮಧ್ಯ ರೈಲ್ವೆಯ ಸಿಕ್ರಿಂದ್ರಾಬಾದ್‌ ವಿಭಾಗದ ವ್ಯಾಪ್ತಿಯಲ್ಲಿ ಬರುತ್ತವೆ.

ಅದೇ ರೀತಿ ಬೀದರ್‌ ಜಿಲ್ಲೆ ದಕ್ಷಿಣ ಮಧ್ಯ ರೈಲ್ವೆಯ ಸಿಕಿಂದ್ರಾಬಾದ್‌ ವಿಭಾಗಕ್ಕೆ ರಾಯಚೂರು, ಯಾದಗಿರಿ ಜಿಲ್ಲೆಗಳು ದಕ್ಷಿಣ ಕರಾವಳಿ ರೈಲ್ವೆಯ ಗುಂತಕಲ್ ವಿಭಾಗಕ್ಕೆ ಹಾಗೂ ಬಳ್ಳಾರಿ, ಕೊಪ್ಪಳ ಜಿಲ್ಲೆಗಳು ನೈಋತ್ಯ ರೈಲ್ವೆ ವಲಯದ ಹುಬ್ಬಳ್ಳಿ ವಿಭಾಗಕ್ಕೆ ಒಳಪಟ್ಟಿವೆ. ಹೀಗೆ ಒಂದೊಂದು ವಲಯಕ್ಕೆ ಹಂಚಿ ಹೋಗಿರುವ ಹೈ.ಕ ಜಿಲ್ಲೆಗಳನ್ನು ಒಂದುಗೂಡಿಸಿ ಪ್ರತ್ಯೇಕ ರೈಲ್ವೆ ವಿಭಾಗ ಸ್ಥಾಪಿಸಬೇಕೆಂಬ ಕೂಗು ದಶಕಗಳಿಂದ ಕೇಳಿ ಬರುತ್ತಿದೆ.

ವರ್ಷಕ್ಕೆ 1,500 ಕೋಟಿ ಆದಾಯ: ಹೈ.ಕ ಭಾಗದ ಆರು ಜಿಲ್ಲೆಗಳಿಂದ ಒಟ್ಟಾರೆ 1,500 ಕೋಟಿ ರೂ.ಗಳಿಗೂ ಅಧಿಕ ಆದಾಯವನ್ನು ರೈಲ್ವೆ ಇಲಾಖೆ ಗಳಿಸುತ್ತಿದೆ. ಅದರಲ್ಲೂ ಕಲಬುರಗಿ ಮತ್ತು ಬಳ್ಳಾರಿ ಜಿಲ್ಲೆಯಲ್ಲಿ ಗಣಿ ಮತ್ತು ಸಿಮೆಂಟ್ ಕಾರ್ಖಾನೆಗಳು ಇರುವುದಿಂದ ಈ ಎರಡು ಜಿಲ್ಲೆಗಳಿಂದ ರೈಲ್ವೆಗೆ ಹೆಚ್ಚು ಆದಾಯ ಸಂದಾಯವಾಗುತ್ತದೆ ಎಂಬ ಅಂದಾಜಿದೆ. ಕಲಬುರಗಿ ಜಿಲ್ಲೆಯೊಂದರಿಂದಲೇ ಪ್ರಯಾಣಿಕರ ಟಿಕೆಟ್, ಸರಕು ಸಾಗಣೆ ಹಾಗೂ ಮತ್ತಿತರ ಮೂಲಗಳಿಂದ ಪ್ರತಿ ವರ್ಷ ಕನಿಷ್ಟ 600 ಕೋಟಿ ರೂ. ಆದಾಯವನ್ನು ಸೊಲ್ಲಾಪುರ ಹಾಗೂ ಸಿಕಿಂದ್ರಾಬಾದ್‌ ವಿಭಾಗದ ಜೇಬು ಸೇರುತ್ತದೆ. 2014-15 ಮತ್ತು 2015-16ನೇ ಸಾಲಿನಲ್ಲಿ ಕ್ರಮವಾಗಿ ಅತ್ಯಧಿಕ 936 ಕೋಟಿ ರೂ. ಮತ್ತು 923 ಕೋಟಿ ರೂ.ಗಳ ಆದಾಯ ಸಂಗ್ರಹವಾಗಿದೆ.

ಯಾವ ನಿಲ್ದಾಣ?-ಎಷ್ಟು ಆದಾಯ?: ಸುನೀಲ ಕುಲಕರ್ಣಿ ಅವರು ಸೊಲ್ಲಾಪುರ ಹಾಗೂ ಸಿಕಿಂದ್ರಾಬಾದ್‌ ವಿಭಾಗಕ್ಕೆ ಪ್ರತ್ಯೇಕ ಆರ್‌ಟಿಐ ಅರ್ಜಿ ಸಲ್ಲಿಸಿ ಆಯಾ ವ್ಯಾಪ್ತಿಯ ರೈಲ್ವೆ ಆದಾಯದ ಮಾಹಿತಿ ಸಂಗ್ರಹಿಸುತ್ತಿದ್ದಾರೆ. 2018-19ನೇ ಆರ್ಥಿಕ ಸಾಲಿನಲ್ಲಿ ಕಲಬುರಗಿ 72 ಕೋಟಿ ರೂ., ವಾಡಿ 16 ಕೋಟಿ ರೂ., ವಾಡಿ ಎಸಿಸಿ ಸಿಮೆಂಟ್ ಕಾರ್ಖಾನೆ 283 ಕೋಟಿ ರೂ., ಶಹಾಬಾದ 4.1 ಕೋಟಿ ರೂ., ಸೇಡಂ 115 ಕೋಟಿ ರೂ., ಚಿತ್ತಾಪುರ 11 ಕೋಟಿ ರೂ., ಮಳಖೇಡ್‌ (ರಾಜಶ್ರೀ ಸಿಮೆಂಟ್ ಕಾರ್ಖಾನೆ ಸೇರಿ) 282 ಕೋಟಿ ರೂ. ಹಾಗೂ ಚೆಟ್ಟಿನಾಡ್‌ ಸಿಮೆಂಟ್ ಪ್ಲಾಂಟ್ನಿಂದ ರೈಲ್ವೆ ಇಲಾಖೆಗೆ 10 ಕೋಟಿ ರೂ. ಆದಾಯ ಸಂದಾಯವಾಗಿದೆ.