ಅಖಂಡ ಭಾರತವೇ ಸಂಪತ್ತು: ಬಿದರಿ

Team Udayavani, Aug 17, 2019, 2:51 PM IST

ಕಲಬುರಗಿ: ಶರಣಬಸವ ವಿವಿಯ ಇಂಡಕ್ಸನ್‌ ಕಾರ್ಯಕ್ರಮದಲ್ಲಿ ನಿವೃತ್ತ ಐಪಿಎಸ್‌ ಅಧಿಕಾರಿ ಶಂಕರ ಬಿದರಿ ಮಾತನಾಡಿದರು.

ಕಲಬುರಗಿ: ವಿದ್ಯಾರ್ಥಿಗಳು ವೈಯಕ್ತಿಕ ಸಂಪತ್ತು, ಸ್ವಾರ್ಥ ಮನೋಭಾವನೆಗೆ ಬೆಲೆ ಕೊಡದೇ, ದೇಶಕ್ಕಾಗಿ ದುಡಿಯಬೇಕು. ಜತೆಗೆ ಇಡೀ ಭಾರತವೇ ನಮ್ಮ ಸಂಪತ್ತು ಎಂದು ತಿಳಿಯಬೇಕು ಎಂದು ನಿವೃತ್ತ ಐಪಿಎಸ್‌ ಅಧಿಕಾರಿ ಶಂಕರ ಬಿದರಿ ಹೇಳಿದರು.

ಶರಣಬಸವ ಶತಮಾನೋತ್ಸವ ಸಭಾಂಗಣದಲ್ಲಿ ಶರಣಬಸವ ವಿವಿಯಿಂದ ನಡೆಯುತ್ತಿರುವ ಇಂಡಕ್ಸನ್‌ ಕಾರ್ಯಕ್ರಮದಲ್ಲಿ ಮಾತನಾಡಿದ ಅವರು, ದೇಶವೇ ಕುಟುಂಬ ಎಂದು ತಿಳಿದುಕೊಂಡು ಮುನ್ನಡೆದಲ್ಲಿ ಮಾತ್ರ ಭಾರತ ಸಮೃದ್ಧ ರಾಷ್ಟ್ರವಾಗುವುದಕ್ಕೆ ಸಾಧ್ಯ. ಇದರಲ್ಲಿ ಹೆಚ್ಚಿನ ಜವಾಬ್ದಾರಿ ವಿದ್ಯಾರ್ಥಿಗಳ ಮೇಲಿದೆ. ಹೀಗಾಗಿ ತಾವು ಅಧ್ಯಯನ ಮಾಡುವ ವಿಷಯದಲ್ಲಿ ಪಾರದರ್ಶಕತೆ, ಗುಣಾತ್ಮಕ ಶಿಕ್ಷಣ ಪಡೆಯಬೇಕು ಎಂದರು. ಶರಣಬಸವ ವಿದ್ಯಾಸಂಸ್ಥೆಯಲ್ಲಿ ಎಂಜಿನಿಯರಿಂಗ್‌, ಬಿಬಿಎಂ, ಕಲಾ, ವಿಜ್ಞಾನ ಸೇರಿದಂತೆ ವಿವಿಧ ಹೊಸ ಕೋರ್ಸ್‌ಗಳು ಆರಂಭವಾಗಿವೆ. ಈ ಕೋರ್ಸ್‌ಗಳಲ್ಲಿ ಅಧ್ಯಯನ ಮಾಡುತ್ತಿರುವಾಗ ದೇಶದೆಲ್ಲೆಡೆ ಉದ್ಯೋಗವಕಾಶ ದೊರೆತರೆ ಖುಷಿಯಿಂದ ಹೋಗಬೇಕು. ಅವಕಾಶಗಳು ಮತ್ತೆ ಮರಳಿ ಬರುವುದಿಲ್ಲ. ನಿಮ್ಮ ಕರ್ತವ್ಯದಿಂದ ದೇಶಾಭಿಮಾನ ಹೆಚ್ಚುತ್ತದೆ ಎಂದು ಹೇಳಿದರು.

ವಿವಿ ಕುಲಪತಿ ಡಾ| ನಿರಂಜನ ನಿಷ್ಠಿ ಮಾತನಾಡಿ, ಶ್ರವಣಕುಮಾರ ಹೆತ್ತ ತಂದೆ, ತಾಯಿಯನ್ನು ಯಾವ ರೀತಿ ಗೌರವದಿಂದ ಕಂಡಿದ್ದರು. ಅದೇ ರೀತಿ ನೀವು ಹೆತ್ತವರನ್ನು ಪ್ರೀತಿಸಿ, ಗೌರವಿಸಿ ಎಂದರು.

ಶರಣಬಸವ ವಿವಿ ಸಮ ಕುಲಪತಿ ಡಾ| ವಿ.ಡಿ. ಮೈತ್ರಿ, ಶರಣಬಸವೇಶ್ವರ ವಿದ್ಯಾವರ್ಧಕ ಸಂಘದ ಕಾರ್ಯದರ್ಶಿ ಬಸವರಾಜ ದೇಶಮುಖ, ವಿ.ವಿ ಕುಲಸಚಿವ ಡಾ| ಅನೀಲಕುಮಾರ ಬಿಡವೆ, ವಿವಿ ಮೌಲ್ಯಮಾಪನ ಕುಲಸಚಿವ ಡಾ| ಲಿಂಗರಾಜ ಶಾಸ್ತ್ರೀ, ಡಾ| ಶಿವದತ್ತ ಹೊನ್ನಳಿ, ಡಾ| ಬಸವರಾಜ ಮಠಪತಿ ಇದ್ದರು.