15 ಲಕ್ಷ ವೆಚ್ಚದ ಸಿಸಿ ರಸ್ತೆ ಕಾಮಗಾರಿಗೆ ಚಾಲನೆ

Team Udayavani, Oct 19, 2021, 12:13 PM IST

ಜೇವರ್ಗಿ: ಪಟ್ಟಣದ ಆರಾಧ್ಯ ದೇವತೆ ಮಹಾಲಕ್ಷ್ಮೀ ದೇವಸ್ಥಾನದಿಂದ ಅಂಚೆ ಕಚೇರಿವರೆಗೆ 15 ಲಕ್ಷ ರೂ. ವೆಚ್ಚದ ಸಿಸಿ ರಸ್ತೆ ಕಾಮಗಾರಿಗೆ ಚಾಲನೆ ನೀಡಲಾಯಿತು.

ಪುರಸಭೆಯ 14ನೇ ಹಣಕಾಸು ಯೋಜನೆ ಅಡಿ ಸುಮಾರು 15 ಲಕ್ಷ ರೂ. ಅಂದಾಜು ವೆಚ್ಚದಲ್ಲಿ ನಿರ್ಮಿಸಲಾಗುತ್ತಿರುವ ಸಿಸಿ ರಸ್ತೆ ಕಾಮಗಾರಿಗೆ ಪುರಸಭೆ ಉಪಾಧ್ಯಕ್ಷ ರಾಜು ರದ್ದೇವಾಡಗಿ ಚಾಲನೆ ನೀಡಿದರು.

ಕಳೆದ ಅನೇಕ ದಿನಗಳಿಂದ ದೇವಸ್ಥಾನದಿಂದ ಅಂಚೆ ಕಚೇರಿ ವರೆಗೆ ರಸ್ತೆ ಸಂಪೂರ್ಣ ಹದಗೆಟ್ಟಿತ್ತು. ಇದರಿಂದ ನಿತ್ಯ ದೇವಸ್ಥಾನಕ್ಕೆ ಬರುವ ಭಕ್ತಾದಿಗಳು ಪರದಾಡುವಂತೆ ಆಗಿತ್ತು. ಈ ಬಗ್ಗೆ ಹಲವಾರು ಬಾರಿ ಪುರಸಭೆ ಅಧಿಕಾರಿಗಳಿಗೆ ಸ್ಥಳೀಯರು ಮನವಿ ಮಾಡಿದ್ದರು. ಅಲ್ಲದೇ ಬರುವ ಅ.30ರಂದು ಮಹಾಲಕ್ಷ್ಮೀ ಜಾತ್ರಾ ಮಹೋತ್ಸವ ಆಯೋಜಿಸಲಾಗಿದ್ದು, ಬುಧವಾರ ಸಿಸಿ ರಸ್ತೆ ಕಾಮಗಾರಿಗೆ ಅಧಿಕಾರಿಗಳು ಚಾಲನೆ ನೀಡಿರುವುದರಿಂದ ಸ್ಥಳೀಯರು ಹರ್ಷ ವ್ಯಕ್ತಪಡಿಸಿದ್ದಾರೆ.

ಪುರಸಭೆ ಮುಖ್ಯಾಧಿಕಾರಿ ಶರಣಯ್ನಾಸ್ವಾಮಿ ಹಿರೇಮಠ, ಕಿರಿಯ ಅಭಿಯಂತ ಮಲ್ಲಿಕಾರ್ಜುನ, ಶಿವಕುಮಾರ ಪಾಟೀಲ. ಪ್ರಮುಖರಾದ ಸಾಹೇಬಗೌಡ ಕಲ್ಲಾ, ಪುರಸಭೆ ಸದಸ್ಯ ದೇವಿಂದ್ರ ಸುಬೇದಾರ, ರಾಜು ತಳವಾರ, ರವಿ ಕೋಳಕೂರ, ವೆಂಕಯ್ಯ ಗುತ್ತೆದಾರ ಈ ಸಂದರ್ಭದಲ್ಲಿ ಇದ್ದರು.