ಮತದಾನ ಜಾಗೃತಿಗೆ ಬೃಹತ್‌ ವಾಕಥಾನ್‌ ರ್ಯಾಲಿ

Team Udayavani, Jan 29, 2018, 10:43 AM IST

ಕಲಬುರಗಿ: ರಾಷ್ಟ್ರೀಯ ಮತದಾರರ ದಿನಾಚರಣೆ ಅಂಗವಾಗಿ ಮತದಾನದ ಮಹತ್ವ ಕುರಿತು ಜನರಲ್ಲಿ ಅರಿವು ಮೂಡಿಸಲು ಜಿಲ್ಲಾ ಸ್ವೀಪ್‌ ಸಮಿತಿಯಿಂದ ಬೃಹತ್‌ ವಾಕಥಾನ್‌ ರ್ಯಾಲಿ ನಡೆಯಿತು.

ಜಿಪಂ ಮುಖ್ಯ ಕಾರ್ಯನಿರ್ವಾಹಕ ಅ ಧಿಕಾರಿ ಹಾಗೂ ಜಿಲ್ಲಾ ಸ್ವೀಪ್‌ ಸಮಿತಿ ಅಧ್ಯಕ್ಷೆ ಹೆಪ್ಸಿಬಾರಾಣಿ ಕೊರ್ಲಪಾಟಿ, ಕಲಬುರಗಿ ಸಹಾಯಕ ಆಯುಕ್ತೆ ಬಿ. ಸುಶೀಲಾ ಹಾಗೂ ಜೇವರ್ಗಿ ತಹಶೀಲ್ದಾರ ಅಕೃತಿ ಸಾಗರ ಅವರು ನಾಡಿನ ಮಣ್ಣಿನ ಸಂಸ್ಕೃತಿ ಹಾಗೂ ಪರಂಪರೆಯ ಪ್ರತೀಕವಾದ ನೀಲಿ ಇಳಕಲ್‌ ಸೀರೆ ಧರಿಸಿ ಕಂಗೊಳಿಸಿದರು.

ಜಿಲ್ಲಾ ಸ್ವೀಪ್‌ ಸಮಿತಿಯಿಂದ ಗುಲಬರ್ಗಾ ವಿಶ್ವವಿದ್ಯಾಲಯ, ಪೊಲೀಸ್‌ ತರಬೇತಿ ಕೇಂದ್ರ, ಗೃಹ ರಕ್ಷಕದಳ, ಪದವಿ
ಮಹಾವಿದ್ಯಾಲಯಗಳ, ಪಿಡಿಎ ಇಂಜಿನಿಯರಿಂಗ್‌ ಕಾಲೇಜು, ವೈದ್ಯಕೀಯ ಮಹಾವಿದ್ಯಾಲಯ ಹಾಗೂ ನರ್ಸಿಂಗ್‌ ಕಾಲೇಜು, ವಸತಿ ನಿಲಯಗಳು, ಪದವಿ ಪೂರ್ವ ಹಾಗೂ ಸಾರ್ವಜನಿಕ ಶಿಕ್ಷಣ ಇಲಾಖೆ ಸೇರಿದಂತೆ ಸುಮಾರು 10,000 ವಿದ್ಯಾರ್ಥಿ ಹಾಗೂ ನೌಕರರ ಬೃಹತ್‌ ವಾಕಥಾನ್‌ ರ್ಯಾಲಿ ಆಯೋಜಿಸುವಲ್ಲಿ ಈ ಮೂರು ಮಹಿಳಾ ಅಧಿಕಾರಿಗಳ ಪಾತ್ರ ಮಹತ್ವದ್ದಾಗಿದೆ. ನಗರದ ಸರ್ದಾರ ವಲ್ಲಭಭಾಯಿ ಪಟೇಲ್‌ ವೃತ್ತದಿಂದ ಪ್ರಾರಂಭವಾದ ವಾಕಥಾನ್‌ ರ್ಯಾಲಿ ಡಾ| ಎಸ್‌.ಎಂ. ಪಂಡಿತ ರಂಗಮಂದಿರ ತಲುಪಿದ್ದರೂ ವಲ್ಲಭ ಭಾಯಿ ಪಟೇಲ್‌ ವೃತ್ತದಲ್ಲಿ ಜನಸಾಂದ್ರತೆ ಕಡಿಮೆಯಾಗಿರಲಿಲ್ಲ.

ನೀಲಿ ಸೀರೆ ಧರಿಸಿದ ಮೂವರು ಮಹಿಳಾ ಅಧಿಕಾರಿಗಳು ವಾಕಥಾನ್‌ ದಲ್ಲಿ ಪಾಲ್ಗೊಂಡಿದ್ದ ಜಿಲ್ಲಾಧಿಕಾರಿ ಆರ್‌. ವೆಂಕಟೇಶಕುಮಾರ, ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಎನ್‌. ಶಶಿಕುಮಾರ ಹಾಗೂ ಮಹಾನಗರ ಪಾಲಿಕೆ ಆಯುಕ್ತ ರಘುನಂದನಮೂರ್ತಿ ಅವರೊಂದಿಗೆ ಸರಿಸಮಾನವಾಗಿ ಪಾದರಸದಂತೆ ಸಂಚರಿಸಿ ವಾಕಥಾನ್‌ಗೆ ಯಾವುದೇ ತೊಂದರೆಯಾಗದಂತೆ ನೋಡಿಕೊಂಡರು. ರಂಗಮಂದಿರದ ಮುಂದೆ ಮತದಾರರ ಪ್ರತಿಜ್ಞಾವಿಧಿ ಬೋಧಿಸಲಾಯಿತು. ರಂಗಮಂದಿರದಲ್ಲಿ ಆಯೋಜಿಸಲಾಗಿದ್ದ ಸಹಿ ಸಂಗ್ರಹ ಅಭಿಯಾನದಲ್ಲಿ ಮೂವರು ಮಹಿಳಾ ಅಧಿಕಾರಿಗಳು ಒಟ್ಟಿಗೆ ಸಹಿ ಮಾಡಿದ್ದು ವಿಶೇಷವಾಗಿತ್ತು.