ಮಧ್ಯಾಮಾವಧಿ ಸಾಲ ವಿತರಣೆಗೆ

Team Udayavani, Oct 26, 2021, 10:23 AM IST

ಕಲಬುರಗಿ: ಮುಂದಿನ ದಿನಗಳಲ್ಲಿ ಕಲಬುರಗಿ-ಯಾದಗಿರಿ ಜಿಲ್ಲಾ ಸಹಕಾರಿ ಕೇಂದ್ರ (ಡಿಸಿಸಿ) ಬ್ಯಾಂಕ್‌ ವತಿಯಿಂದ ಮಧ್ಯಾಮವಧಿ ಸಾಲ (ಎಂಟಿ ಲೋನ್‌) ವಿತರಿಸಲು ಬ್ಯಾಂಕ್‌ನ ಆಡಳಿತ ಮಂಡಳಿ ನಿರ್ಧಾರ ತೆಗೆದುಕೊಂಡಿದೆ ಎಂದು ಬ್ಯಾಂಕ್‌ನ ಅಧ್ಯಕ್ಷರಾಗಿರುವ ಸೇಡಂ ಮತಕ್ಷೇತ್ರದ ಶಾಸಕ ರಾಜಕುಮಾರ ಪಾಟೀಲ್‌ ತೇಲ್ಕೂರ ತಿಳಿಸಿದರು.

ಸೋಮವಾರ ನಗರದ ಡಾ| ಎಸ್‌.ಎಂ. ಪಂಡಿತ ರಂಗಮಂದಿರದಲ್ಲಿ ನಡೆದ ಬ್ಯಾಂಕ್‌ನ 95ನೇ ಸಾಮಾನ್ಯ ಸಭೆಯ ಅಧ್ಯಕ್ಷತೆ ವಹಿಸಿ ಮಾತನಾಡಿದ ಅವರು, ಬ್ಯಾಂಕ್‌ದಿಂದ ಪ್ರಸಕ್ತವಾಗಿ ಹೊಸ ಈಗಾಗಲೇ ರೈತರಿಗೆ ಬಡ್ಡಿ ರಹಿತ ಬೆಳೆ ಸಾಲ ವಿತರಿಸಲಾಗಿದ್ದು, ಸಾಲ ಮನ್ನಾದ ರೈತರಿಗೂ ಈಗ ಬೆಳೆಸಾಲ ವಿತರಿಸಲು ಮುಂದಾಗಲಾಗಿದೆ. ಮುಂದಿನ ದಿನಗಳಲ್ಲಿ ಹೊಲ ಸುಧಾರಣೆ, ನೀರಾವರಿ ಸೌಲಭ್ಯ ಹಾಗೂ ಹೈನುಗಾರಿಕೆ ಸಲುವಾಗಿಯೂ ರೈತರಿಗೆ ಮಧ್ಯಾಮವಧಿ ಸಾಲ ವಿತರಿಸಲಾಗುವುದು ಎಂದು ಪ್ರಕಟಿಸಿದರು.

ಮಧ್ಯಾಮವಧಿ ಸಾಲವನ್ನು ಅತ್ಯಂತ ಪಾರದರ್ಶಕತೆಯಿಂದ ವಿತರಿಸಲಾಗುವುದು. ಇದಕ್ಕೆ ಸಂಬಂಧಿಸಿದಂತೆ ಯಾವುದೇ ಫಾರಂಗಳ ವಿತರಣೆ ಇಲ್ಲ. ಸಾಲ ಪಡೆಯಲಿಚ್ಚಿಸುವರು ಬಿಳಿ ಹಾಳೆಯಲ್ಲಿ ಕೇಂದ್ರ ಶಾಖೆಯಲ್ಲಿ ಅರ್ಜಿಯೊಂದನ್ನು ಸಲ್ಲಿಸಿದರೆ ಸಾಕು, ಅದನ್ನೆಲ್ಲ ಪರಿಶೀಲಿಸಿ ಆಯಾ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘಕ್ಕೆ ಕಳುಹಿಸಿ, ಅಲ್ಲಿಂದ ಮಂಜೂರಾತಿ ಪಡೆದ ನಂತರವಷ್ಟೇ ತದನಂತರ ಸಾಲ ಬಿಡುಗಡೆಗೆ ಕ್ರಮ ಕೈಗೊಳ್ಳಲಾಗುವುದು. ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘದ ಪಾತ್ರವೇ ಪ್ರಮುಖವಾಗಿದೆ. ಒಟ್ಟಾರೆ ಮಧ್ಯಮಾವಧಿ ಸಾಲ ವಿತರಣೆಯಲ್ಲಿ ಯಾವುದೇ ಅವ್ಯವಹಾರಕ್ಕೆ ಅವಕಾಶವಿಲ್ಲ ಎಂದು ಅಧ್ಯಕ್ಷ ತೇಲ್ಕೂರ ಪ್ರಕಟಿಸಿದರು.

ಈಗ 25 ಸಾವಿರ ಬೆಳೆ ಸಾಲ ನೀಡಲಾಗಿದ್ದರೆ ಮುಂದಿನ ವರ್ಷ 50 ಸಾವಿರ ಹಾಗೂ ತದನಂತರ ಅದನ್ನು ಡಬಲ್‌ಗೊಳಿಸುವುದರ ಜತೆಗೆ ಮುಂದಿನ ಮೂರು ವರ್ಷದೊಳಗೆ ಎಲ್ಲ ರೈತರಿಗೆ ಮೂರು ಲಕ್ಷ ರೂ. ಬಡ್ಡಿ ರಹಿತ ಸಾಲ ವಿತರಿಸುವ ಯೋಜನೆ ಹೊಂದಲಾಗಿದೆ. ಇದಕ್ಕಾಗಿ ರೈತರು ಪಡೆದ ಸಾಲ ಸಕಾಲಕ್ಕೆ ಮರುಪಾವತಿಸಿದ್ದಲ್ಲಿ ಮಾತ್ರ ಸಾಧ್ಯ. ಸಾಲ ಹಾಗೂ ಸುಸ್ತಿ ಸಾಲ ವಸೂಲಾತಿಯ ಪ್ರಮಾಣದ ಮೇಲೆ ಶೇ.2ರಷ್ಟು ಮಾರ್ಜಿನ ಹಣವನ್ನು ವಾರದೊಳಗೆ ಪ್ರಾಥಮಿಕ ಕೃಷಿ ಪತ್ತಿನ ಸಹಕಾರ ಸಂಘಗಳಿಗೆ ಜಮಾ ಮಾಡಲಾಗುವುದು ಎಂದು ಡಿಸಿಸಿ ಬ್ಯಾಂಕ್‌ ಅಧ್ಯಕ್ಷ ಪಾಟೀಲ್‌ ಹೇಳಿದರು.

ಇದನ್ನೂ ಓದಿ: ನೋಡುಗರ ಕಣ್ಮನ ಸೆಳೆಯುತ್ತಿದೆ ನೀರಿನ ಝರಿ

ಸಭೆಯಲ್ಲಿ 23 ವಿಷಯಗಳನ್ನು ಚರ್ಚಿಸಿ ಅನುಮೋದನೆ ಪಡೆಯಲಾಯಿತು. ಈ ಸಂದರ್ಭದಲ್ಲಿ ಪಿಕೆಪಿಎಸ್‌ ಅಧ್ಯಕ್ಷರು ಹಾಗೂ ಕಾರ್ಯದರ್ಶಿಗಳು ಹಲವಾರು ಪ್ರಶ್ನೆಗಳನ್ನು ಕೇಳಿದರು. ಇದಕ್ಕೆ ಅಧ್ಯಕ್ಷರು ಸಮಜಾಯಿಷಿ ಉತ್ತರ ನೀಡಿದರು. ಬ್ಯಾಂಕ್‌ನ ಉಪಾಧ್ಯಕ್ಷ ಸುರೇಶ ಸಜ್ಜನ್‌, ನಿರ್ದೇಶಕರುಗಳಾದ ಶಿವಾನಂದ ಮಾನಕರ, ಸೋಮಶೇಖರ ಗೋನಾಯಕ, ಶರಣಬಸಪ್ಪ ಪಾಟೀಲ್‌ ಅಷ್ಠಗಾ, ಅಶೋಕ ಸಾವಳೇಶ್ವರ, ಬಾಪುಗೌಡ ಪಾಟೀಲ್‌, ಗೌತಮ ಪಾಟೀಲ್‌, ಬಸವರಾಜ ಪಾಟೀಲ್‌, ಗುರುನಾಥರೆಡ್ಡಿ ಪಾಟೀಲ್‌, ಮಹಾಂತಗೌಡ ಪಾಟೀಲ್‌, ನಿಂಗಣ್ಣ ದೊಡ್ಡಮನಿ, ಸಿದ್ರಾಮರೆಡ್ಡಿ, ಚಂದ್ರಶೇಖರ ತಳ್ಳಳ್ಳಿ, ಉತ್ತಮ ಬಜಾಜ, ಕಲ್ಯಾಣಪ್ಪ ಪಾಟೀಲ್‌, ಎಂಡಿ ಚಿದಾನಂದ ನಿಂಬಾಳ ಸೇರಿದಂತೆ ಮುಂತಾದವರಿದ್ದರು.

ಇದೇ ಸಂದರ್ಭದಲ್ಲಿ ಉತ್ತಮವಾಗಿ ಕಾರ್ಯನಿರ್ವಹಿಸಿ ಬ್ಯಾಂಕ್‌ನ ಸಿಬ್ಬಂದಿಗಳಾದ ಯಲ್ಲಪ್ಪ ಮುರಡಿ ಹಾಗೂ ಲಿಂಗನಗೌಡ ಅವರನ್ನು ಸನ್ಮಾನಿಸಲಾಯಿತು. ಅದೇ ರೀತಿ ವಿವಿಧ ಸಹಕಾರಿ ಸಂಘಗಳ ಅಧ್ಯಕ್ಷ-ಕಾರ್ಯದರ್ಶಿಗಳನ್ನು ಸಹ ಸನ್ಮಾನಿಸಲಾಯಿತು. ಬಿ.ಜಿ. ಕಲ್ಲೂರ ನಿರೂಪಿಸಿದರು.

ಮಂಡಳಿ ನಿರ್ಧಾರ ಬ್ಯಾಂಕ್‌ನ ಆಡಳಿತ ವೇಗ ಹೆಚ್ಚಿಸಲಾಗುವುದು. ಇದಕ್ಕಾಗಿ ಅಗತ್ಯ ಸಿಬ್ಬಂದಿಗಳ 11 ತಿಂಗಳಿಗಾಗಿ ನಿಯೋಜಿಸಲಾಗುವುದು. ಪ್ರಮುಖವಾಗಿ ಕೇಂದ್ರ ಕಚೇರಿ ಸೇರಿ ಶಾಖಾ ಕಚೇರಿಗಳಿಗೆ ಹೊಸ ಕಟ್ಟಡಗಳನ್ನು ನಿರ್ಮಿಸಲಾಗುವುದು. ರೈತರು ಸಾಲ ಪಡೆಯುವುದಾಗಿ ತಾಳ್ಮೆ ವಹಿಸಬೇಕು. ಕೇಳಿದಷ್ಟು ಸಾಲವನ್ನೇ ಡಿಸಿಸಿ ಬ್ಯಾಂಕ್‌ ದಿಂದ ನೀಡಲಾಗುವುದು. ತಮ್ಮದನ್ನು ನೋಡಿ ರಾಷ್ಟ್ರೀಯ ಬ್ಯಾಂಕ್‌ಗಳೇ ರೈತರ ಮನೆಗೆ ಬಂದು ಸಾಲ ನೀಡಲು ಕ್ಯೂ ನಿಲ್ಲುವಂತಾಗಬೇಕು. -ರಾಜಕುಮಾರ ಪಾಟೀಲ್‌ ತೇಲ್ಕೂರ, ಅಧ್ಯಕ್ಷ ಡಿಸಿಸಿ ಬ್ಯಾಂಕ್‌