ರಾವೂರಲ್ಲಿ ಕುಡಿಯುವ ನೀರೂ ಕೊಚ್ಚೆಯಲ್ಲಿ!

Team Udayavani, Apr 21, 2022, 9:46 AM IST

ವಾಡಿ: ತಾಂತ್ರಿಕವಾಗಿ ದೇಶ ಎಷ್ಟೇ ಮುಂದುವರಿದರೂ ಗ್ರಾಮೀಣ ಪ್ರದೇಶಗಳು ಮೂಲಭೂತ ಸೌಕರ್ಯಗಳ ಕೊರತೆಯಿಂದ ಅಕ್ಷರಶಃ ನರಳುತ್ತಿವೆ. ಶೌಚಾಲಯ, ಕುಡಿಯುವ ನೀರು, ಬೀದಿ ದೀಪಗಳಂತ ಸಣ್ಣ ಸಮಸ್ಯೆಗಳು ಈಡೇರದೇ ಜನತೆ ಗೋಳಾಡುವಂತ ಪರಿಸ್ಥಿತಿಯಿದೆ.

ಕಸ ವಿಲೇವಾರಿ ಸಮರ್ಪಕವಾಗಿರದೇ ಕುಡಿಯುವ ನೀರಿನ ಸಾರ್ವಜನಿಕ ತಾಣಗಳು ಶುಚಿತ್ವ ಕಾಣದೇ ರೋಗಪೀಡಿತ ಪ್ರದೇಶಗಳಾಗಿ ಗ್ರಾಮೀಣ ಜನರ ಜೀವಹಿಂಡುತ್ತಿವೆ. ಇದೀಗ ನೂತನ ಶಹಾಬಾದ ತಾಲೂಕಿಗೆ ಸೇರ್ಪಡೆಯಾಗಿರುವ ಚಿತ್ತಾಪುರ ವಿಧಾನಸಭೆ ಮತಕ್ಷೇತ್ರದ ರಾವೂರ ಗ್ರಾಮದಲ್ಲಿ ಅನಾಗರಿಕ ಬಯಲು ಶೌಚ ಪದ್ಧತಿ ಈಗಲೂ ಜೀವಂತವಿದೆ.

ಗ್ರಾಪಂ ಕೇಂದ್ರ ಸ್ಥಾನವಾದ ರಾವೂರಿನ ಈ ತೆರೆದ ಶೌಚಾಲಯಗಳು ಹಗಲು, ರಾತ್ರಿ ದುರ್ಗಂಧ ಹರಡುತ್ತ ಸ್ವತ್ಛ ಭಾರತ ಯೋಜನೆಗೆ ಸವಾಲೊಡ್ಡಿ ಬಳಕೆಯಾಗುತ್ತಿವೆ. ಗ್ರಾಮದ ಕನಕನಗರ ಮತ್ತು ದಲಿತರ ಬಡಾವಣೆ ಮಾರ್ಗದಲ್ಲಿ ನಾಲ್ಕು ದಶಕಗಳ ಹಿಂದೆ ನಿರ್ಮಿಸಲಾದ ನಾಲ್ಕು ಕಾಂಪೌಂಡ್‌ ಗೋಡೆಗಳ ತೆರೆದ ಶೌಚಾಲಯಗಳನ್ನೇ ಮಹಿಳೆಯರು ಈಗಲೂ ಬಳಕೆ ಮಾಡುತ್ತಿದ್ದಾರೆ.

ಸಮುದಾಯ ಶೌಚಾಲಯ ನಿರ್ಮಾಣಕ್ಕೆ ಸರ್ಕಾರ ವಿಶೇಷ ಅನುದಾನ ಮೀಸಲಿಟ್ಟರೂ ಸದ್ಭಳಕೆಯಾಗುತ್ತಿಲ್ಲ ಎಂಬುದಕ್ಕೆ ರಾವೂರು ಉತ್ತಮ ಉದಾಹರಣೆಯಾಗಿದೆ. ಸಮಾಜ ಸಾಕಷ್ಟು ಪರಿವರ್ತನೆ ಕಂಡಿದೆಯಾದರೂ ಮೂಲಭೂತ ಸೌಕರ್ಯ ವಿಷಯದಲ್ಲಿ ಇನ್ನೂ ನೆಲಕಚ್ಚಿದೆ.

ವೃದ್ಧರು, ಹಿರಿಯರು, ಯುವತಿಯರು ಈ ತೆರೆದ ಶೌಚಾಲಯ ಬಳಕೆ ಮಾಡಲು ಮುಜುಗರ ಅನುಭವಿಸುತ್ತಿದ್ದಾರೆ. ಪರ್ಯಾಯ ವ್ಯವಸ್ಥೆಯಿಲ್ಲದೇ ಬಹಿರ್ದೆಸೆ ಪದ್ಧತಿ ಜೀವಂತವಿಟ್ಟುಕೊಂಡಿದ್ದಾರೆ. ಕುಡಿಯುವ ನೀರಿನ ಸಾರ್ವಜನಿಕ ಸ್ಥಳಗಳು ಕೊಚ್ಚೆಯಿಂದ ಕೂಡಿವೆ. ಜಲಮೂಲಗಳ ತಾಣಗಳು ಶುಚಿಯಾಗಿಡಬೇಕಾದ ಗ್ರಾಪಂ ಆಡಳಿತ ಕರ್ತವ್ಯ ಪ್ರಜ್ಞೆ ಮರೆತು ಜನರಿಗೆ ರೋಗ ಸರಬರಾಜು ಮಾಡುತ್ತಿದೆ.

ಅಧಿಕಾರಿಗಳು, ಚುನಾಯಿತ ಜನಪ್ರತಿನಿಧಿಗಳು, ಸರ್ಕಾರಿ ನೌಕರರೇ ಹೆಚ್ಚಿರುವ ಪ್ರಜ್ಞಾವಂತರ ಊರು ರಾವೂರಿನಲ್ಲಿ ಮಹಿಳೆಯರಿಗಾಗಿ ಉತ್ತಮ ಸಾರ್ವಜನಿಕ ಶೌಚಾಲಯ ಸೌಲಭ್ಯ ಒದಗಿಸದೇ ಇರುವುದು ನಾಚಿಕೆಗೇಡಿನ ಸಂಗತಿಯಾಗಿದೆ.

ನಾವು ಸಣ್ಣವರಿದ್ದಾಗಿನಿಂದಲೂ ಇದೇ ನಾಲ್ಕು ಗೋಡೆಯ ಶೌಚಾಲಯ ಬಳಸುತ್ತಿದ್ದೇವೆ. ಹುಡುಗಿಯರು ನಾಚಿಕೆಪಡುತ್ತಾರೆ. ಪಂಚಾಯಿತಿಗೆ ಕೇಳಿದರೆ ಮನೆ-ಮನೆಗೆ ಶೌಚಾಲಯ ಕಟ್ಟಿಸಿಕೊಳ್ಳಲು ಹಣ ಕೊಡ್ತಿದ್ದೀವಿ. ಸಾರ್ವಜನಿಕ ಶೌಚಾಲಯ ಕಟ್ಟಲು ಅವಕಾಶ ಇಲ್ಲ ಅಂತಿದ್ದಾರೆ. ಮನೆಯಲ್ಲಿ ಜಾಗ ಇಲ್ಲದ ಬಡವರು ಏನು ಮಾಡಬೇಕು? ಹಳೆಯದ್ದನ್ನು ಕೆಡವಿ ಹೊಸ ಶೌಚಾಲಯದ ವ್ಯವಸ್ಥೆ ಮಾಡಬೇಕು. -ಮುತ್ತಮ್ಮ ಪೂಜಾರಿ, ಹಿರಿಯ ಮಹಿಳೆ, ಕನಕನಗರ

ಮನೆಗೊಂದು ಶೌಚಾಲಯ ನಿರ್ಮಾಣಕ್ಕೆ ನಾವು ಮೊದಲ ಆಧ್ಯತೆ ನೀಡುತ್ತಿದ್ದೇವೆ. ಆವಶ್ಯಕತೆ ಇದ್ದಲ್ಲಿ ಸಮುದಾಯ ಶೌಚಾಲಯ ನಿರ್ಮಿಸಲು ಪಿಡಿಒ ತೀರ್ಮಾನ ಕೈಗೊಳ್ಳುತ್ತಾರೆ. ಅಲ್ಲದೇ ಶಾಸಕ ಪ್ರಿಯಾಂಕ್‌ ಖರ್ಗೆ ತಾಲೂಕಿನ ಪ್ರತಿ ಗ್ರಾಪಂ ಕೇಂದ್ರಸ್ಥಾನಗಳಲ್ಲಿ ವಿಶೇಷವಾಗಿ ಮಹಿಳೆಯರಿಗಾಗಿ ಸಾರ್ವಜನಿಕ ಶೌಚಾಲಯ ನಿರ್ಮಿಸಲು ತಲಾ 25 ಲಕ್ಷ ರೂ. ಅನುದಾನ ಒದಗಿಸಿದ್ದಾರೆ. ರಾವೂರ ಗ್ರಾಮಕ್ಕೂ ಸೌಕರ್ಯ ಒದಗಲಿದೆ. -ನೀಲಗಂಗಾ ಬಬಲಾದ, ತಾಪಂ ಕಾರ್ಯನಿರ್ವಾಹಕ ಅಧಿಕಾರಿ ಚಿತ್ತಾಪುರ

-ಮಡಿವಾಳಪ್ಪ ಹೇರೂರ