ವಾಡಿ: ಭೀಮಾ ನದಿಯಲ್ಲಿ ಮೀನುಗಾರ ನೀರುಪಾಲು

Team Udayavani, Jun 3, 2022, 8:40 PM IST

ವಾಡಿ: ಪಟ್ಟಣ ಸಮೀಪದ ಕುಂದನೂರು ಭೀಮಾ ನದಿಯಲ್ಲಿ ಮೀನು ಹಿಡಿಯಲು ಹೋದ ಮೀನುಗಾರನೊಬ್ಬ ನೀರುಪಾಲಾದ ಘಟನೆ ಶುಕ್ರವಾರ ಬೆಳಕಿಗೆ ಬಂದಿದೆ.

ಕುಂದನೂರು ಗ್ರಾಮ ನಿವಾಸಿ ಮರೆಪ್ಪ ಮಾರುತಿ (52) ಮೃತಪಟ್ಟ ಮೀನುಗಾರ. ಗುರುವಾರ ಸಂಜೆ ಮೀನು ಹಿಡಿಯಲು ಮರೆಪ್ಪ ಭೀಮಾನದಿ ದಂಡೆಗೆ ಹೋಗಿದ್ದಾನೆ ಎನ್ನಲಾಗಿದ್ದು, ಕತ್ತಲಾದರೂ ಮನೆಗೆ ಮರಳದ ಕಾರಣ ಕುಟುಂಬಸ್ಥರು ಗಾಬರಿಗೊಂಡಿದ್ದಾರೆ. ಪೊಲೀಸ್ ಠಾಣೆಗೆ ಮಾಹಿತಿ ನೀಡಿ ಕಾಣೆಯಾದವನನ್ನು ಹುಡುಕಿಕೊಡುವಂತೆ ಮನವಿ ಮಾಡಿದ್ದಾರೆ.

ಶುಕ್ರವಾರ ಬೆಳಗ್ಗೆ ಸಿಬ್ಬಂದಿಗಳು ಹಾಗೂ ಈಜುಪಟುಗಳೊಂದಿಗೆ ನದಿ ದಂಡೆಗೆ ಭೇಟಿ ನೀಡಿದ ವಾಡಿ ಠಾಣೆಯ ಎಎಸ್‌ಐ ಚನ್ನಮಲ್ಲಪ್ಪಗೌಡ ಪಾಟೀಲ, ನೀರಿನಲ್ಲಿ ಮುಳುಗಿದ ಶವವನ್ನು ಪತ್ತೆ ಹಚ್ಚುವಲ್ಲಿ ಯಶಸ್ವಿಯಾಗಿದ್ದಾರೆ. ಮರಣೋತ್ತರ ಪರೀಕ್ಷೆ ನಡೆಸಿದ ನಂತರ ಮೃತ ದೇಹವನ್ನು ಕುಟುಂಬಸ್ಥರಿಗೆ ಒಪ್ಪಿಸಲಾಯಿತು. ಮೃತಪಟ್ಟ ಮೀನುಗಾರನಿಗೆ ಪತ್ನಿ ಹಾಗೂ ಮೂವರು ಪುತ್ರರಿದ್ದಾರೆ ಎನ್ನಲಾಗಿದ್ದು, ವಾಡಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.