ಪಂಚ ರಾಜ್ಯ ಚುನಾವಣೆ: ಬಿಜೆಪಿ ವಿಜಯೋತ್ಸವ

Team Udayavani, Mar 12, 2017, 1:15 PM IST

ಕಲಬುರಗಿ: ಪಂಚರಾಜ್ಯ ಚುನಾವಣೆಯಲ್ಲಿ ಭಾರತೀಯ ಜನತಾ ಪಕ್ಷ ಅದರಲ್ಲೂ ದೇಶದ ಅತಿದೊಡ್ಡ ರಾಜ್ಯ ಉತ್ತರ ಪ್ರದೇಶ, ಉತ್ತರಖಂಡಾದಲ್ಲಿ ಜಯಭೇರಿ ಸಾಧಿಸಿದ್ದರಿಂದ ಪಕ್ಷದ ಕಾರ್ಯಕರ್ತರು ಶನಿವಾರ ನಗರದ ಸರ್ದಾರ ವಲ್ಲಭಭಾಯಿ ಪಟೇಲ ವೃತ್ತದಲ್ಲಿ ವಿಜಯೋತ್ಸವ ಆಚರಿಸಿದರು. 

ಉತ್ತರಪ್ರದೇಶದಲ್ಲಿ ಬಿಜೆಪಿ ಸುನಾಮಿ ರೀತಿಯ ಗೆಲುವು ಸಾಧಿಸುತ್ತಿದ್ದಂತೆ ಪಕ್ಷದ ಕಾರ್ಯಕರ್ತರು ಪಟಾಕಿ ಸಿಡಿಸಿ-ಸಿಹಿ ಹಂಚಿ ಸಂಭ್ರಮಿಸಿದರು. ಪ್ರಧಾನಮಂತ್ರಿ ಅವರ ಅಭಿವೃದ್ಧಿ ಕೆಲಸಕ್ಕೆ ದೇಶದ ಜನತೆ ತಲೆತೂಗಿದ್ದಾರೆ ಎಂಬುದನ್ನು ಫಲಿತಾಂಶ ನಿರೂಪಿಸಿದೆ. 

ಕಾಂಗ್ರೆಸ್‌ ಮುಕ್ತ ಭಾರತಕ್ಕೆ ಮತ್ತೂಂದು ಹೆಜ್ಜೆ ಇಟ್ಟಂತಾಗಿದೆ. ಈ ಗೆಲುವು ಮುಂದಿನ ವರ್ಷ ಚುನಾವಣೆ ನಡೆಯುವ ಕರ್ನಾಟಕ ರಾಜ್ಯದಲ್ಲೂ ಮುಂದುವರಿಯಲಿದೆ ಎಂದು ಕಾರ್ಯಕರ್ತರು ಹರ್ಷ ವ್ಯಕ್ತಪಡಿಸಿದರು. 

ಪಕ್ಷದ ಮುಖಂಡರಾದ ಶಶೀಲ್‌ ನಮೋಶಿ, ಮಹಾಂತಗೌಡ ಪಾಟೀಲ, ಚಂದು ಪಾಟೀಲ, ನಾಮದೇವ ರಾಠೊಡ ಕರಹರಿ, ಸಂಗಮೇಶ ರಾಜೋಳೆ, ರಾಘವೇಂದ್ರ ಕುಲಕರ್ಣಿ, ಚನ್ನವೀರ ಲಿಂಗನವಾಡಿ, ವಿಜಯಕುಮಾರ ಹಳಕಟ್ಟಿ ಹಾಗೂ ಮುಂತಾದವರಿದ್ದರು.