ಹಾಡಹಗಲೇ ಮನೆ ಕಳ್ಳತನ

Team Udayavani, Mar 2, 2022, 10:13 AM IST

ಕಲಬುರಗಿ: ನಗರದ ಕುಸನೂರ ರಸ್ತೆಯ ಕೃಷ್ಣಾ ನಗರದಲ್ಲಿನ ಮನೆಯೊಂದಕ್ಕೆ ಹಾಡುಹಗಲೇ ಕನ್ನ ಹಾಕಿ ಚಿನ್ನಾಭರಣ ದೋಚಲಾಗಿದೆ.

ಆಳಂದ ತಾಲೂಕಿನ ಅಂಬಲಗಾ ಗ್ರಾಪಂ ಪಿಡಿಒ ಆಗಿರುವ ಅಮೀತ್‌ ಕುಮಾರ ಕೊಳ್ಳುರ್‌ ಅವರ ಮನೆಗೆ ಕನ್ನ ಹಾಕಿ 18 ತೊಲಿ ಚಿನ್ನಾಭರಣ- 21 ತೊಲಿ ಬೆಳ್ಳಿ ಆಭರಣ ಕಳ್ಳತನ ಮಾಡಿದ್ದಾರೆ. ಸೋಮವಾರ ಮಧ್ಯಾಹ್ನವೇ ಈ ಕೃತ್ಯ ನಡೆದಿದೆ.

ಅಮೀತ್‌ಕುಮಾರ ಕರ್ತವ್ಯಕ್ಕಾಗಿ ಬೆಳಗ್ಗೆ ಅಂಬಲಗಾಕ್ಕೆ ಹೋಗಿದ್ದರು. ಇವರ ಮೂವರು ಮಕ್ಕಳು ಶಾಲೆಗೆ ತೆರಳಿದ್ದರು. ಪತ್ನಿ ಮಮ್ಮಾದೇವಿ ಕೆಲಸದ ನಿಮಿತ್ತ ಗುಲ್ಬರ್ಗ ವಿಶ್ವವಿದ್ಯಾಲಯಕ್ಕೆ ಹೋಗಿದ್ದರು. ಮನೆಯಲ್ಲಿ ಯಾರೂ ಇಲ್ಲದ್ದನ್ನು ಗಮನಿಸಿ ಕಳ್ಳರು ಚಿನ್ನಾಭರಣ ದೋಚಿದ್ದಾರೆ. ಮನೆಯ ಮುಖ್ಯ ದ್ವಾರದ ಕೀಲಿ ಒಡೆದು ಒಳನುಗ್ಗಿದ ಕಳ್ಳರು ಅಲಮಾರಿ ಮುರಿದು ಒಳಗಿದ್ದ ಚಿನ್ನಾಭರಣ ದೋಚಿದ್ದಾರೆ.

ಮಧ್ಯಾಹ್ನ 2ರ ಹೊತ್ತಿಗೆ ಮಮ್ಮಾದೇವಿ ಅವರು ಮನೆಗೆ ಬಂದಾಗ ಕಳ್ಳತನ ನಡೆದಿರುವ ವಿಷಯ ತಿಳಿದುಬಂದಿದೆ. ಒಟ್ಟು ಅಂದಾಜು 7.91 ಲಕ್ಷ ರೂ. ಚಿನ್ನಾಭರಣ ದೋಚಿದ ಬಗ್ಗೆ ವಿಶ್ವವಿದ್ಯಾಲಯ ಠಾಣೆಗೆ ಮಮ್ಮಾದೇವಿ ದೂರು ನೀಡಿದ್ದಾರೆ.

ಎಲ್ಲರೂ ಮನೆಯಿಂದ ಹೊರ ಹೋದಾಗ ಈ ಕೃತ್ಯ ನಡೆದಿದೆ. ಸ್ಥಳಕ್ಕೆ ಪೊಲೀಸ್‌ ಅಧಿಕಾರಿ ಗಳು, ಶ್ವಾನ ದಳ, ಬೆರಳಚ್ಚು ತಜ್ಞರ ತಂಡ ಭೇಟಿ ನೀಡಿ ಪರಿಶೀಲನೆ ನಡೆಸಿದ್ದು. ವಿವಿ ಠಾಣೆಯಲ್ಲಿ ಪ್ರಕರಣ ದಾಖಲಾಗಿದೆ.