ಅದ್ಧೂರಿ ಬನಶಂಕರಿದೇವಿ ರಥೋತ್ಸವ

Team Udayavani, Jan 4, 2018, 10:46 AM IST

ಕಾಳಗಿ: ಗ್ರಾಮದ ಆದಿಶಕ್ತಿ, ಜಗನ್ಮಾತೆ ಬನಶಂಕರಿದೇವಿ ಜಾತ್ರಾಮಹೋತ್ಸವ ಅಂಗವಾಗಿ ಮಂಗಳವಾರ ರಾತ್ರಿ ಅಪಾರ ಭಕ್ತ ಸಮೂಹದ ಮಧ್ಯೆ ವಿಜೃಂಭಣೆಯಿಂದ ರಥೋತ್ಸವ ಜರುಗಿತು.

ರಥೋತ್ಸವದ ನಿಮಿತ್ತ ವಿವಿಧ ಧಾರ್ಮಿಕ, ಸಾಂಸ್ಕೃತಿಕ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗಿದೆ. ಬೆಳಗ್ಗೆ ವೇ.ಮೂ.
ಶಂಕ್ರಯ್ಯಸ್ವಾಮಿ ದೇವಾಂಗ ಮಠ ನೇತೃತ್ವದಲ್ಲಿ ಬನಶಂಕರಿದೇವಿ ಮೂರ್ತಿಗೆ ಮಹಾ ರುದ್ರಾಭಿಷೇಕ, ದಾರಾಭಿಷೇಕ ಜರುಗಿತು.

ನಂತರ ಗ್ರಾಮಸ್ಥರು ಹಾಗೂ ಸುತ್ತಮುತ್ತಲಿನ ಗ್ರಾಮಗಳಿಂದ ಆಗಮಿಸಿದ ಭಕ್ತರು ದೇವಿಗೆ ವಿಶೇಷ ನೈವೇದ್ಯ ಅರ್ಪಿಸಿ ಪೂಜೆ ಮಾಡಿದರು. ದೇವಸ್ಥಾನದ ಅಂಗಳದಲ್ಲಿ ಮುತೈದೆಯರಿಗೆ ಉಡಿತುಂಬುವ ಕಾರ್ಯಕ್ರಮ ಜರುಗಿತು.
 
ಸಂಜೆ ಗ್ರಾಮದ ಪ್ರಮುಖ ಮುಖಂಡರೊಂದಿಗೆ ಡೊಳ್ಳು, ಹಲಗೆ, ಭಾಜಾ-ಭಜಂತ್ರಿ, ವಾದ್ಯ ಮೇಳಗಳೊಂದಿಗೆ ಭಜನೆ ಮಾಡುತ್ತಾ ದೇವಾಂಗ ಮಠದಿಂದ ಕುಂಭ, ಕಳಶ ಹಾಗೂ ಪುರವಂತರನ್ನು ಕರೆದುಕೊಂಡು ಮೆರವಣಿಗೆಯ ಮೂಲಕ ದೇವಸ್ಥಾನಕ್ಕೆ ಆಗಮಿಸಿದರು.

ತದನಂತರ ಹಿರೇಮಠದ ಪೂಜ್ಯ ಶಿವಬಸವ ಶಿವಾಚಾರ್ಯರು, ಡೊಣ್ಣೂರಿನ ಶಿವಾನಂದ ದೇವರು ನೇತೃತ್ವದಲ್ಲಿ ಅಲಂಕೃತ ರಥಕ್ಕೆ ಪೂಜೆ ಸಲ್ಲಿಸಲಾಯಿತು. ಅಪಾರ ಭಕ್ತ ಸಮೂಹದ ಮಧ್ಯೆ ರಥವು ಸ್ಥಳ ಬಿಡುತ್ತಿದ್ದಂತೆ ಬನಶಂಕರಿದೇವಿ ಮಾತಾಕೀ ಜೈ ಎನ್ನುವ ಜಯಘೋಷಣೆ ಕೂಗುತ್ತಾ ರಥಕ್ಕೆ ಉತ್ತತ್ತಿ, ನಾರು, ಬಾಳೆಹಣ್ಣು, ಹೂ, ನಾಣ್ಯಗಳನ್ನೆಸೆದು ಭಕ್ತಿ ಸಮರ್ಪಿಸಿದರು.

ಬನಶಂಕರಿ ದೇವಸ್ಥಾನ ಸಮಿತಿ ಗೌರವಾಧ್ಯಕ್ಷ ಬಾಲಚಂದ್ರ ಕಾಂತಿ, ಅಧ್ಯಕ್ಷ ವೀರೇಶ ಸಿಂಗಶೆಟ್ಟಿ, ನಾಗಣ್ಣಾ ಟೆಂಗಳಿಕರ್‌, ರಾಮಣ್ಣಾ ಕಣ್ಣಿ, ಗಣಪತರಾವ್‌ ಸಿಂಗಶೆಟ್ಟಿ, ಮುಖಂಡರಾದ ಶಿವಶರಣಪ್ಪ ಕಮಲಾಪುರ, ಶರಣಗೌಡ ಪೊಲೀಸ ಪಾಟೀಲ, ಜೈಶಂಕರ ಮಾಲಿಪಾಟೀಲ, ಶಿವಶರಣಪ್ಪ ಗುತ್ತೇದಾರ, ಪಾಂಡುರಂಗ ಕಣ್ಣಿ, ರವಿ ಅಲ್ಲಾಪುರ, ಅಣವೀರಪ್ಪ ಸಿಂಗಶೆಟ್ಟಿ, ವೀರಣ್ಣ ಟಿಂಗಳಿ, ನಾಗರಾಜ ಟೆಂಗಳಿಕರ್‌, ಬಸವರಾಜ ಸಿಂಗಶೆಟ್ಟಿ, ವಾಸುದೇವ ಕಣ್ಣಿ ಇದ್ದರು.