Kalaburagi; ಅಪರಿಚಿತ ಬೈಕ್ ಢಿಕ್ಕಿ:MLC ಅರವಿಂದ ಅರಳಿ ತಾಯಿ ವಿಧಿವಶ

Team Udayavani, Dec 13, 2023, 10:28 PM IST

ಕಲಬುರಗಿ: ನಗರದ ಸೇಡಂ ರಿಂಗ್ ರಸ್ತೆಯ ಟೊಯೊಟಾ ಶೋರೂಂ ಬಳಿ ಬುಧವಾರ ಸಂಜೆ ಬೈಕ್ ಢಿಕ್ಕಿಯಾಗಿ ರಸ್ತೆ ದಾಟುತ್ತಿದ್ದ ಸುಮಿತ್ರಾಬಾಯಿ ಶಾಮರಾವ ಅರಳಿ(75) ಮೃತಪಟ್ಟಿದ್ದಾರೆ. ಇವರು ವಿಧಾನ ಪರಿಷತ್ ಸದಸ್ಯ ಅರವಿಂದ ಕುಮಾರ ಅರಳಿ ಅವರ ತಾಯಿ.

ಬಡೇಪುರ ಕಾಲೊನಿಯಲ್ಲಿರುವ ಪುತ್ರಿ ಶೀಲಾದೇವಿ ಲಿಂಗರಾಜ ಅರಸ ಅವರ ಮನೆಯಲ್ಲಿ ವಾವಾಗಿದ್ದರು. ಸಂಜೆ ಕೆಲಸದ ನಿಮಿತ್ತ ರಸ್ತೆ ದಾಟುವಾಗ ಅಪರಿಚಿತ ಬೈಕ್ ಢಿಕ್ಕಿ ಹೊಡೆದಿದ್ದು, ಸುಮಿತ್ರಾಬಾಯಿ ಅವರ ತಲೆಗೆ ತೀವ್ರ ಪೆಟ್ಟಾಗಿದೆ. ಅವರನ್ನು ಆಸ್ಪತ್ರೆಗೆ ಸಾಗಿಸುವಾಗ ಸಾವನ್ನಪ್ಪಿದ್ದಾರೆ ಎಂದು ಪೊಲೀಸ್ ಮೂಲಗಳು ತಿಳಿಸಿವೆ.

ಸ್ಥಳಕ್ಕೆ ಡಿಸಿಪಿ ಕನ್ನಿಕಾ ಸಿಕ್ರಿವಾಲ್, ಇನ್‌ಸ್ಪೆಕ್ಟರ್ ಖಾಜಾ ಹುಸೇನಿ ಮತ್ತು ಸಿಬಂದಿ ಭೇಟಿ ನೀಡಿದಿದ್ಸಾರೆ. ಸಂಚಾರ ಠಾಣೆ-2 ರಲ್ಲಿ ಪ್ರಕರಣ ದಾಖಲಾಗಿದೆ. ಪುತ್ರರಾದ ಎಂಎಲ್ ಸಿ ಅರಳಿ, ಯುವ ಸಬಲೀಕರಣ ಮತ್ತು ಕ್ರೀಡಾ ಇಲಾಖೆ ಅಧಿಕಾರಿ ಡಾ.ಗೌತಮ ಅರಳಿ, ಸೂರ್ಯಕಾಂತ ಅರಳಿ ಹಾಗೂ ಇಬ್ಬರು ಪುತ್ರಿಯರನ್ನು ಅಗಲಿದ್ದಾರೆ.

ಗುರುವಾರ ಮಧ್ಯಾಹ್ನ 3 ಕ್ಕೆ ಹುಮನಾಬಾದ್ ತಾಲೂಕಿನ ಹಳ್ಳಿಖೇಡ್(ಬಿ) ಗ್ರಾಮದಲ್ಲಿ ಅಂತ್ಯಕ್ರಿಯೆ ನಡೆಯಲಿದೆ ಎಂದು ಮೂಲಗಳು ತಿಳಿಸಿವೆ.ಬೆಳಗಾವಿ ಅಧಿವೇಶನದಲ್ಲಿ ಭಾಗಿಯಾಗಿದ್ದ ಎಂಎಲ್‌ಸಿ ಅರಳಿ ಸುದ್ದಿ ತಿಳಿಯುತ್ತಲೇ ಕಲಬುರಗಿಗೆ ದೌಡಾಯಿಸಿದ್ದಾರೆ.