ಒತ್ತಡ ನಿವಾರಣೆಗೆ ಧ್ಯಾನ ಮಾಡಿ

Team Udayavani, Jan 6, 2017, 12:54 PM IST

ಕಲಬುರಗಿ: ಒತ್ತಡ ನಿವಾರಣೆಗೆ ಅನಗತ್ಯ ವಿಷಯಗಳಿಂದ ದೂರ ಇರುವುದು ಹಾಗೂ ಸ್ವಯಂ ನಿಯಂತ್ರಣ ಹಾಕಿಕೊಳ್ಳುವುದೇ ಪರಿಹಾರವಾಗಿದೆ ಎಂದು ಆಂಧ್ರಪ್ರದೇಶ ಹೈಕೋರ್ಟ್‌ನ ನಿವೃತ್ತ ಮುಖ್ಯ ನಾಯಮೂರ್ತಿ ವಿ. ಈಶ್ವರಯ್ಯ ಹೇಳಿದರು. 

ನಗರದ ಸೇಡಂ ರಸ್ತೆಯ ಗೀತಾ ನಗರದಲ್ಲಿನ ಪ್ರಜಾಪೀತ ಬ್ರಹ್ಮಕುಮಾರಿ ಈಶ್ವರೀಯ ವಿಶ್ವವಿದ್ಯಾಲಯದ ಅಮೃತ ಸರೋವರದಲ್ಲಿ ಈಶ್ವರೀಯ ವಿವಿ ಹಾಗೂ ಜಿಲ್ಲಾ ಪೊಲೀಸ ಇಲಾಖೆಯು ಪೊಲೀಸರ ಕರ್ತವ್ಯ ಕಾರ್ಯನಿರ್ವಹಣೆಯಲ್ಲಿನ ಒತ್ತಡ ನಿವಾರಣೆ ಕುರಿತು ಆಯೋಜಿಸಲಾದ ಕಾರ್ಯಾಗಾರ ಉದ್ದೇಶಿಸಿ ಅವರು ಮಾತನಾಡಿದರು. 

ಪೊಲೀಸರ ಒತ್ತಡ ನಿವಾರಿಸಲು ಹಾಗೂ ಸೂಕ್ತ ಹೆಜ್ಜೆ ಇಡಲು ಸ್ನೇಹ ಮನೋಭಾವ, ಸಹಕಾರ, ಪ್ರೀತಿ ಅಳವಡಿಸಿಕೊಳ್ಳುವುದರ ಜತೆಗೆ ಧ್ಯಾನ ಅಗತ್ಯವಾಗಿದೆ. ಈಶ್ವರೀಯ ವಿಶ್ವವಿದ್ಯಾಲಯದಲ್ಲಿ ಧ್ಯಾನವೇ ಮಹತ್ವವಾಗಿದೆ. ಒತ್ತಡ ಕಾರ್ಯದ ನಡುವೆ ಧ್ಯಾನದ ಮನೋಭಾವ ಹೊಂದಿದ್ದರೆ ತಕ್ಕಮಟ್ಟಿಗೆ ಒತ್ತಡ ನಿವಾರಣೆಯಾಗುವುದರಲ್ಲಿ ಯಾವುದೇ ಸಂಶಯವಿಲ್ಲ ಎಂದರು. 

ಭೃಷ್ಟಾಚಾರ ಇಂದು ಸರ್ವ ರಂಗಗಳಲ್ಲಿ ವ್ಯಾಪಿಸಿದೆ. ಇದನ್ನೆಲ್ಲ ಕಾನೂನುಬದ್ಧ ಕ್ರಮ ಕೈಗೊಳ್ಳುವಲ್ಲಿ ಪೊಲೀಸರ ಪಾತ್ರವೇ ಪ್ರಮುಖವಾಗಿದೆ. ಹೀಗಾಗಿ ಎಲ್ಲ ಆಯಾಮಗಳೊಂದಿಗೆ ವಿಚಾರಿಸಿ ತರ್ಕಬದ್ಧತೆಯಿಂದ ವಿಚಾರಿಸಿ ಸೂಕ್ತ ನಿರ್ಣಯ ಕೈಗೊಳ್ಳಬೇಕು. ಇದಕ್ಕೆಲ್ಲ  ಮಾನಸಿಕತೆಯಿಂದ ಸದೃಢತೆ ಹೊಂದಿದ್ದಾಗ ಮಾತ್ರ ಸಾಧ್ಯ. 

ಆದ್ದರಿಂದ ಧ್ಯಾನದ ಅಳವಡಿಕೆ ಅಗತ್ಯವಾಗಿದೆ ಎಂದರು. ಬ್ರಹ್ಮಕುಮಾರಿ ವಿಜಯಾ ಹಾಗೂ ಬ್ರಹ್ಮಕುಮಾರ ಪ್ರೇಮ್‌ ಮಾತನಾಡಿ, ಈಶ್ವರೀಯ ವಿಶ್ವವಿದ್ಯಾಲಯ ಉದ್ದೇಶವೇ ಸಮಾಜ ಶಾಂತಿ, ನೆಮ್ಮದಿಯಿಂದ ಬದುಕು ನಿರ್ವಹಿಸುವುದಾಗಿದೆ. ಇದಕ್ಕಾಗಿಯೇ ವಿವಿ ಆರಂಭದಿಂದ ಇಂದಿನವರೆಗೂ ಅವಿರತವಾಗಿ ಶ್ರಮಿಸುತ್ತಿದೆ.

ಒತ್ತಡದ ನೌಕರಿ ಇಲ್ಲವೇ ಕೆಲಸದ ನಡುವೆಯೂ ಕುಟುಂಬದ ಜೊತೆ ಕಾಲ ಕಳೆಯಲು ಸಮಯ ನೀಡುವುದು ಮುಖ್ಯವಾಗಿದೆ ಎಂದರು. ಜಿಲ್ಲೆಯ ಹಿರಿಯ ಪೊಲೀಸ್‌ ಅಧಿಕಾರಿಗಳು, ಆರಕ್ಷಕ ನಿರೀಕ್ಷರು, ಪೊಲೀಸ್‌ ಸಿಬ್ಬಂದಿಗಳು ಕಾರ್ಯಾಗಾರದಲ್ಲಿ ಪಾಲ್ಗೊಂಡಿದ್ದರು. ನಂತರ ಮುಖ್ಯ ನ್ಯಾಯಾಧೀಶರೊಂದಿಗೆ ಸಂವಾದ ಕಾರ್ಯಕ್ರಮವೂ ನಡೆಯಿತು. 

ಹೆಚ್ಚಿನ ಅಗತ್ಯಕ್ಕೆ ಪೂರ್ಣವಿರಾಮ ಹಾಕಿ
ಹೆಚ್ಚಿನ ಅಗತ್ಯತೆಗಳಿಗೆ ಪೂರ್ಣ ವಿರಾಮ ಹಾಕಿದರೆ ಸಂತೋಷದಿಂದ ಇರಬಹುದು. ಬೇಡಿಕೆಗಳೆ ನಮ್ಮ ಮನಸ್ಸು ವಿಚಲಿತಗೊಳ್ಳುವಂತೆ ಮಾಡುತ್ತವೆ. ಆದ್ದರಿಂದ ಇದಕ್ಕೆಲ್ಲ ಸ್ವಯಂ ನಿಯಂತ್ರಣ ಹೇರಿಕೊಳ್ಳುವುದು ಬಹು ಮುಖ್ಯ.
-ಎನ್‌. ಶಶಿಕುಮಾರ, ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ