ನಿರಂಕಾರಿ ಸದಸ್ಯರಿಂದ ರೈಲು ನಿಲ್ದಾಣ ಸ್ವಚ್ಛತೆ

Team Udayavani, Feb 24, 2017, 2:31 PM IST

ಕಲಬುರಗಿ: ಬಾಬಾ ಹರದೇವ್‌ ಸಿಂಹ ಮಹಾರಾಜರ 63ನೇ ಜನ್ಮದಿನದ ನಿಮಿತ್ತ ಸ್ಥಳೀಯ ಸಂತ ನಿರಂಕಾರಿ ಮಂಡಳದ ಸದಸ್ಯರು ಗುರುವಾರ ನಗರದ ರೈಲು ನಿಲ್ದಾಣದಲ್ಲಿ ಸ್ವಚ್ಛತಾ ಕಾರ್ಯ ನಡೆಸಿದರು. ಬೆಳಗ್ಗೆ 8:00 ಗಂಟೆಯಿಂದ 12:00 ಗಂಟೆ ವರೆಗೆ ಒಟ್ಟು 200 ಕಾರ್ಯಕರ್ತರು ರೈಲ್ವೆ ಪ್ಲಾಟ್‌ಫಾರ್ಮ್, ವಿಶ್ರಾಂತಿ ಕೋಣೆ, ಶೌಚಾಲಯಗಳು, ಅಂಗಡಿ, ಮುಂಗಟ್ಟುಗಳ ಸ್ಥಳ, ಹಳಿಗಳು ಸೇರಿದಂತೆ ಒಳಾಂಗಣ, ಹೊರಾಂಗಣ ಮುಂತಾದೆಡೆ ಶ್ರಮದಾನದ ಮೂಲಕ ಇಡೀ ರೈಲು ನಿಲ್ದಾಣ ಸ್ವಚ್ಛಗೊಳಿಸಿದರು. 

ರೈಲು ನಿಲ್ದಾಣದ ಪ್ಲಾಟ್‌ಫಾರ್ಮ್ನ ನೆಲ ಹಾಸಿಗೆ ಹೊಲಸಾಗಿತ್ತು. ಕಾರ್ಯಕರ್ತರು ನೀರು ಹಾಕಿ ಶುಚಿಗೊಳಿಸಿದರು. ಬಿದ್ದ ಹೊಲಸನ್ನು ತೆಗೆದು ಕಸದ ಬುಟ್ಟಿಗೆ ಹಾಕಿದರು. ಛತ್ತಿನಲ್ಲಿದ್ದ ಧೂಳನ್ನು ಝಾಡಿಸಿದರು. ರೈಲು ಹಳಿಗಳಲ್ಲಿದ್ದ ಕಸ ತೆಗೆದರು. ಪ್ಲಾಟ್‌ಫಾರ್ಮ್ನ್ನು ತೊಳೆದರು. ರೈಲು ನಿಲ್ದಾಣದ ಹೊರ ಅಂಗಳದಲ್ಲಿದ್ದ ಗಿಡ, ಗಂಟಿಗಳನ್ನು ತೆಗೆದು ಪ್ರಯಾಣಿಕರ ಸುಗಮ ಸಂಚಾರಕ್ಕೆ ಹಾಗೂ ಮಲೀನತೆ ನಿವಾರಿಸುವ ಕಾರ್ಯವನ್ನು ಕಾರ್ಯಕರ್ತರು ಮಾಡಿದರು. 

ಅಭಿಯಾನದ ನೇತೃತ್ವವಹಿಸಿದ್ದ ರಾಜು ಸಾಂಗವೀಕರ್‌ ಮಾತನಾಡಿ, ಸ್ವಚ್ಛತಾ ಕಾರ್ಯವನ್ನು ಕಳೆದ ವರ್ಷ 48 ದೊಡ್ಡ ರೈಲು ನಿಲ್ದಾಣಗಳಲ್ಲಿ ನಿರಂಕಾರಿ ಮಂಡಳಿಯು ಕೈಗೊಂಡಿದ್ದು, ಈಗಾಗಲೇ ಕೇಂದ್ರ ಸರ್ಕಾರವು ಈ ಸಂಘಟನೆಯನ್ನು ಬ್ರ್ಯಾಂಡ್‌ ಅಂಬಾಸಡರ್‌ (ರಾಯಭಾರಿ) ಎಂದು ಪರಿಗಣಿಸಿದೆ. ಈ ಹಿನ್ನೆಲೆಯಲ್ಲಿ ಸಂಘಟನೆ ವತಿಯಿಂದ ಸ್ವಚ್ಛತಾ ಅಭಿಯಾನ ಕೈಗೊಂಡಿದ್ದೇವೆ ಎಂದರು. ಸೀತಾರಾಮ ಚವ್ಹಾಣ, ರವೀಂದ್ರ ವಕಲೆ, ರವೀಂದ್ರ ದುರವೆ, ಪ್ರಭಾಕರ ತವಡೆ ಹಾಗೂ ಮಹಿಳಾ ಕಾರ್ಯಕರ್ತೆಯರು ಪಾಲ್ಗೊಂಡಿದ್ದರು. 

ವಾಡಿ: ದೆಹಲಿಯ ಸಂತ ನಿರಂಕಾರಿ ಚಾರಿಟೇಬಲ್‌ ಫೌಂಡೇಶನ್‌ ಹಾಗೂ ಸಂತ ನಿರಂಕಾರಿ ಸೇವಾದಳ ವಾಡಿ ಶಾಖೆ ವತಿಯಿಂದ ಗುರುವಾರ ಪಟ್ಟಣದ ರೈಲು ನಿಲ್ದಾಣ ಸ್ವಚ್ಛತಾ ಕಾರ್ಯ ಶಿಸ್ತಿನಿಂದ ನಡೆಯಿತು. ಅಭಿಯಾನ ಉದ್ದೇಶಿಸಿ ಮಾತನಾಡಿದ ಸಂತ ನಿರಂಕಾರಿ ಮಂಡಲ ಸ್ಥಳೀಯ ಶಾಖೆ ಸಂಯೋಜಕ ಶಿವರಾಮ ಪವಾರ, ದೇಶಾದ್ಯಂತ ಹರಡಿಕೊಂಡಿರುವ ಅಸ್ವಚ್ಛತೆ ತೊಡೆದು ಹಾಕಲು ಕೇಂದ್ರ  ಸರಕಾರ ಸ್ವಚ್ಛ ಭಾರತ ಯೋಜನೆ ರೂಪಿಸಿದೆ.

ರೈಲ್ವೆ ಖಾತೆ ಸಚಿವ ಸುರೇಶ ಪ್ರಭು ಅವರು ಸಂತ ನಿರಂಕಾರಿ ಬಾಬಾ ಚಾರಿಟೇಬಲ್‌ ಫೌಂಡೇಶನ್‌ ಸಂಪರ್ಕಿಸಿ ಬ್ರ್ಯಾಂಡ್‌ ಅಂಬಾಸಿಡರನ್ನಾಗಿ ಘೋಷಿಸಿದ್ದಾರೆ. ಸರಕಾರದ ಕರೆಗೆ ಓಗೊಟ್ಟು ನಾವು ದೇಶದ ಒಟ್ಟು 263 ರೈಲು ನಿಲ್ದಾಣಗಳನ್ನು ಆಯ್ಕೆ ಮಾಡಿಕೊಂಡು ಏಕಕಾಲದಲ್ಲಿ ಸ್ವಚ್ಛತೆಗೆ ಮುಂದಾಗಿದ್ದೇವೆ ಎಂದು ಹೇಳಿದರು. ಸದ್ಗುರು ನಿರಂಕಾರಿ ಬಾಬಾ ಅವರು ಸ್ವಚ್ಛತೆಗೆ ಹೆಚ್ಚಿನ ಆದ್ಯತೆ ನೀಡಿದ್ದಾರೆ. ಆದರೆ ಅವರೀಗ ನಮ್ಮೊಂದಿಗಿಲ್ಲ.

ದೇಶದೆಲ್ಲೆಡೆ ನಿರಂತರವಾಗಿ ಸತ್ಸಂಗದ ಜಾಗೃತಿಯಲ್ಲಿ ತೊಡಗಿರುವ ಸಂತ ನಿರಂಕಾರಿ ಸೇವಾದಳದ ಲಕ್ಷಾಂತರ ಜನ ಕಾರ್ಯಕರ್ತರು ಅವರ ಚಿಂತನೆಗಳನ್ನು ಹೊತ್ತು ಸಾಗುತ್ತಿದ್ದಾರೆ. ಪರೋಪಕಾರಿ ಜೀವನ, ಶಾಂತಿಪ್ರೇರಿತ ಮನಸ್ಸು ಹಾಗೂ ಪ್ರಗತಿಯ ಲಕ್ಷಣದೊಂದಿಗೆ ಹಜ್ಜೆ ಹಾಕುತ್ತಿದ್ದೇವೆ. ಸ್ವಚ್ಛತೆ ಜಾಗೃತಿ ಜತೆಗೆ ಸಸಿಗಳನ್ನು ನೆಟ್ಟು ಪರಿಸರ ಸಂರಕ್ಷಿಸುವ ಕಾರ್ಯ ಮಾಡಲಾಗುತ್ತಿದೆ ಎಂದು ವಿವರಿಸಿದರು. 

ರೈಲ್ವೆ ಅಧಿಕಾರಿಗಳಾದ ಆರ್‌.ಎಸ್‌. ಶರ್ಮಾ, ಎನ್‌.ವಿ. ಮೋಹನರಾವ, ಜೆ.ಆರ್‌. ಅಂಬೇಕರ, ಎಸ್‌.ಎಸ್‌. ದೊಡ್ಡಮನಿ, ಆರ್‌ಪಿಎಫ್‌ ಸಿಪಿಐ ಅರ್‌.ಎಸ್‌. ಗುರ್ಜಾರ್‌, ಸಂತ ನಿರಂಕಾರಿ ಶಾಖೆ ಮುಖಂಡರಾದ ರಮೇಶ ಕಾರಬಾರಿ, ರೂಪಸಿಂಗ್‌ ರಾಠೊಡ, ಪ್ರಕಾಶ ಪವಾರ, ಮೋಹನ ಕಾರಬಾರಿ, ರಾಮಚಂದ್ರ ರಾಠೊಡ, ತುಕಾರಾಮ ರಾಠೊಡ, ಪಾಂಡು ರಾಠೊಡ, ಮನೋಜಕುಮಾರ ಸೇರಿದಂತೆ ನಿರಂಕಾರಿ ಬಾಬಾ ಸೇವಾದಳದ ನೂರಾರು ಜನ ಯುವಕ, ಯುವತಿಯರು ಸ್ವಚ್ಛತಾ ಅಭಿಯಾನದಲ್ಲಿ ಪಾಲ್ಗೊಂಡಿದ್ದರು. ಇದಕ್ಕೂ ಮೊದಲು ಪ್ರಭಾತಪೇರಿ ನಡೆದು  ಪ್ರತಿಜ್ಞಾವಿಧಿ ಬೋಧಿಸಲಾಯಿತು.