ಜನಪ್ರತಿನಿಧಿಗಳೇ ನೋಡಿ ಸ್ವಚ್ಛತೆಯಿಲ್ಲದ ಶಹಾಬಾದ

Team Udayavani, May 7, 2017, 3:50 PM IST

ಶಹಾಬಾದ: ನಗರದ ರಸ್ತೆಯ ಪಕ್ಕದಲ್ಲೆಡೆ ಕಸದ ರಾಶಿ, ಆ ಕಸದಲ್ಲಿಯೇ ಓಡಾಡುವ ಹಂದಿ, ನಾಯಿ, ದನಗಳ ದಂಡು. ಕಸದಿಂದ ತುಂಬಿಕೊಂಡಿರುವ ಚರಂಡಿ. ಸ್ವಚ್ಛತೆಯಿಲ್ಲದೇ ದಿನನಿತ್ಯ ಸಾರ್ವಜನಿಕರ ಶಾಪಕ್ಕೆ ಗುರಿಯಾಗುವ ನಗರಸಭೆ ಅಧಿಕಾರಿಗಳು.

ಇದು ಶಹಾಬಾದ ನಗರಸಭೆ ವ್ಯಾಪ್ತಿಯಲ್ಲಿ ಕಂಡು ಬರುವ ದೃಶ್ಯ. ನಗರದ ಬಹುತೇಕ ಬಡಾವಣೆಗಳಲ್ಲಿ ಎಲ್ಲೆಂದರಲ್ಲಿ ಕಸ ಚೆಲ್ಲಾಪಿಲ್ಲಿಯಾಗಿ ಬಿದ್ದಿದ್ದರೂ ಕೇಳುವರು ಇಲ್ಲದಂತಾಗಿದೆ. ಬೀದಿ ವ್ಯಾಪಾರಿಗಳು, ಹೋಟೆಲ್‌,ಲಾಡ್ಜ್ ಹಾಗೂ ಕಲ್ಯಾಣಮಂಟಪದವರು ಕಸವನ್ನು ಮನಬಂದಂತೆ ರಸ್ತೆ ಮೇಲೆ ಎಸೆಯುತ್ತಿದ್ದಾರೆ. 

ಕಸ ಸಂಗ್ರಹಣ ತೊಟ್ಟಿ ಸುತ್ತಮುತ್ತ ಸಾಕಷ್ಟು ಕಸ ಜಮಾವಣೆಗೊಂಡಿದ್ದರೂ ಕಸ ವಿಲೇವಾರಿ ಮಾಡುವಲ್ಲಿ ನಗರಸಭೆ ಮುಂದಾಗುತ್ತಿಲ್ಲ. ಎರಡು ದಿನಗಳ ಹಿಂದಷ್ಟೇ ಸುರಿದ ಮಳೆ ನೀರಿನಿಂದ ಕಸ ಕೊಳೆತು ದುರ್ನಾತ ಬೀರುತ್ತಿದ್ದು, ರೋಗಗಳಿಗೆ ಆಹ್ವಾನ ನೀಡಿದಂತಾಗಿದೆ.

ಸಾರ್ವಜನಿಕರು, ಪ್ರಯಾಣಿಕರು ನಿತ್ಯ ಮೂಗು ಮುಚ್ಚಿಕೊಂಡು ಓಡಾಡುವ ಪರಿಸ್ಥಿತಿ ನಿರ್ಮಾಣವಾದರೂ ಅಧಿಕಾರಿಗಳು ಮಾತ್ರ ಕಸದ ವಿಲೇವಾರಿ ಸಮರ್ಪಕ ರೀತಿಯಲ್ಲಿ ಮಾಡುತ್ತಿಲ್ಲ. ಇದರಿಂದ ನಗರದ ಅಂದ ಹಾಳಾಗುತ್ತಿದೆ. ಸ್ವಚ್ಛತೆ ಎಂಬುದು ಮಾಯವಾಗುತ್ತಿದೆ. 

ಒಮ್ಮೆ ನಗರದ ಚಿತ್ರಣ ನೋಡಿದರೆ ಇದು ಅನೈರ್ಮಲ್ಯದಿಂದ ಕೂಡಿದ ನಗರ ಎಂದು ನಂ.1 ಸ್ಥಾನ ಸಿಗುವ ದಿನಗಳು ದೂರವಿಲ್ಲವೆಂದೇ ಹೇಳಬಹುದು. ಹಂದಿಗಳು ಎಲ್ಲೆಂದರಲ್ಲಿ ಸ್ವೆಚ್ಛಾನುಸಾರ ಓಡಾಡಿಕೊಂಡಿವೆ. ಬೀಡಾಡಿ ದನಗಳು ಕಸದ ತೊಟ್ಟಿಯಲ್ಲಿ ಕಂಡ ಆಹಾರಕ್ಕಾಗಿ ಹಂದಿಗಳೊಂದಿಗೆ ಪೈಪೋಟಿಗಿಳಿದಿವೆ. 

ಇದರಿಂದ ನಗರದ ತುಂಬೆಲ್ಲಾ ಕಸ ಹರಡಿ ನಗರದ ಅಂದಕ್ಕೆ ಮಸಿ ಬಳಿಯುತ್ತಿದೆ. ಅಲ್ಲದೇ ಕಸದ ತೊಟ್ಟಿ ತುಂಬಿ ತುಳುಕಿ ಹೆಚ್ಚಾದ ಕಸ ಚರಂಡಿಯಲ್ಲಿ ಹೋಗಿ ಬೀಳುತ್ತಿದೆ. ಪ್ಲಾಸ್ಟಿಕ್‌ ತ್ಯಾಜ್ಯ ವಸ್ತುಗಳು ಸಂಗ್ರಹವಾಗಿ ಚರಂಡಿ ನೀರು ಸರಾಗವಾಗಿ ಹರಿಯದೇ ಜಮಾವಣೆಗೊಂಡು ದುರ್ವಾಸನೆ ಬೀರುತ್ತಿದೆ.

ಸೊಳ್ಳೆಗಳ ಸಂಖ್ಯೆ ಹೆಚ್ಚಾಗಿ ಮಲೇರಿಯಾ ರೋಗ ಕಾಣಿಸಿಕೊಳ್ಳುತ್ತಿದೆ. ಜಮಾವಣೆಗೊಂಡ ಕೊಳಚೆ ನೀರಿನಿಂದ ಇಲ್ಲಿನ ಜನರು ನಿತ್ಯ ನರಕಯಾತನೆ ಪಡುವಂಥಾಗಿದೆ.

* ಮಲ್ಲಿನಾಥ ಜಿ.ಪಾಟೀಲ