ಚುನಾವಣೆವರೆಗೆ ಮಾತ್ರ ಪ್ರತ್ಯೇಕ ಧರ್ಮ ಹೋರಾಟ

Team Udayavani, Jan 28, 2018, 11:05 AM IST

ಕಲಬುರಗಿ: “ವೀರಶೈವ ಲಿಂಗಾಯತ ಎರಡೂ ಒಂದೇ. ಲಿಂಗಾಯತ ಸ್ವತಂತ್ರ ಧರ್ಮದ ಹೋರಾಟ ಚುನಾವಣೆವರೆಗೂ ಮಾತ್ರವಿರುತ್ತದೆ’ ಎಂದು ಅಖೀಲ ಭಾರತ ವೀರಶೈವ ಮಹಾಸಭಾದ ಅಧ್ಯಕ್ಷ, ಮಾಜಿ ಸಚಿವ ಶಾಮನೂರು ಶಿವಶಂಕರಪ್ಪ ಹೇಳಿದರು.

ಆಳಂದ ಪಟ್ಟಣದಲ್ಲಿ ಸುದ್ದಿಗಾರರೊಂದಿಗೆ ಮಾತನಾಡಿದ ಅವರು, ಕೆಲವು ಸಚಿವರು, ಶಾಸಕರು ಪ್ರತ್ಯೇಕ ಲಿಂಗಾಯತ ಧರ್ಮಕ್ಕಾಗಿ ಹೋರಾಟ ಮಾಡುತ್ತಿದ್ದಾರೆ. ಮಂತ್ರಿ ಸ್ಥಾನ ಹೋದ ಮೇಲೆ ಇವರನ್ನು ಯಾರೂ ಕೇಳುವುದಿಲ್ಲ. ಏನಿದ್ದರೂ ಚುನಾವಣೆವರೆಗೂ ಅವರ ಹೋರಾಟ. ನಂತರ ಅವರೆಲ್ಲರೂ ತಮ್ಮ ಬಳಿಯೇ ಬರ್ತಾರೆ. ಯಾರು ಪ್ರತ್ಯೇಕತೆ ಬಯಸುತ್ತಾರೆಯೋ ಅವರು ಹೋಗಲಿ. ಕುಳಿತು ಚರ್ಚಿಸಲು ಸಭೆ ಕರೆದರೂ ಬಾರದೇ ಹೊರಗಡೆ ಬಾಯಿಗೆ ಬಂದಂತೆ ಮಾತಾಡುತ್ತಾರೆ.

ಲಿಂಗಾಯತ ಸ್ವತಂತ್ರ ಧರ್ಮದ ಮಾನ್ಯತೆ ಸಲುವಾಗಿ ರಚಿಸಲಾಗಿರುವ ತಜ್ಞರ ಸಮಿತಿಗೆ ಮಹತ್ವ ಹಾಗೂ ಮಾನ್ಯತೆಯನ್ನು ಮಹಾಸಭಾ ನೀಡುವುದಿಲ್ಲ. ಸಮಿತಿ ಕೆಲಸಕ್ಕೆ ಬಾರದ್ದು ಎಂದು ಈಗಾಗಲೇ ಹೇಳಲಾಗಿದೆ.ಬರುವ ವಿಧಾನಸಭೆ ಚುನಾವಣೆಯಲ್ಲೂ ಸ್ಪರ್ಧಿಸುತ್ತೇನೆ. ಹಿಂದೆ ಸರಿಯುವ ಪ್ರಶ್ನೆಯೇ ಇಲ್ಲ. ಸ್ಪರ್ಧೆಯೂ ನಿಶ್ಚಿತ-ಗೆಲವೂ ಅಷ್ಟೇ ನಿಶ್ಚಿತ ಎಂದರು.