ಗೋ ರಕ್ಷಣೆಗೆ ಶ್ರೀರಾಮಸೇನೆ ಆಗ್ರಹ

Team Udayavani, Jul 29, 2020, 2:21 PM IST

ಕಲಬುರಗಿ: ಬಕ್ರೀದ್‌ ಹಬ್ಬ ನಿಮಿತ್ತ ಗೋಹತ್ಯೆ ತಡೆಯಲು ಕಟ್ಟುನಿಟ್ಟಿನ ಕಾನೂನು ಕ್ರಮಗಳನ್ನು ಕೈಗೊಳ್ಳಬೇಕು ಮತ್ತು ಈಗಾಗಲೇ ಹಬ್ಬಕ್ಕೆಂದು ಸಂಗ್ರಹಿಸಲಾದ ಗೋಗಳನ್ನು ರಕ್ಷಿಸಬೇಕೆಂದು ಒತ್ತಾಯಿಸಿ ಶ್ರೀರಾಮ ಸೇನೆಯ ಕಾರ್ಯಕರ್ತರು ಮಂಗಳವಾರ ಜಿಲ್ಲಾಧಿಕಾರಿ ಕಚೇರಿ ಮುಂದೆ ಪ್ರತಿಭಟನೆ ನಡೆಸಿದರು.

ಬಕ್ರೀದ್‌ ಸಮೀಪಿಸುತ್ತಿರುವ ಹಿನ್ನೆಲೆಯಲ್ಲಿ ಗೋಗಳ ಅಕ್ರಮ ಸಾಗಣೆ, ಸಂಗ್ರಹ ನಡೆಯುತ್ತಿದೆ. ಕೆಲ ಕಡೆಗಳಲ್ಲಿ ಗೋವಧೆಗಾಗಿ ಗೋಗಳನ್ನು ಸಂಗ್ರಹಿಸಿರುವುದು ಶ್ರೀರಾಮಸೇನೆ ಗಮನಕ್ಕೆ ಬಂದಿದೆ. ಆದ್ದರಿಂದ ಅವುಗಳನ್ನು ರಕ್ಷಿಸಲು ಜಿಲ್ಲಾಡಳಿತ ಕ್ರಮಕೈಗೊಳ್ಳಬೇಕೆಂದು ಪ್ರತಿಭಟನಾಕಾರರು ಆಗ್ರಹಿಸಿದರು.

ಗೋಗಳ ರಕ್ಷಣೆಗಾಗಿ ಈಗಾಗಲೇ ಜಿಲ್ಲಾಡಳಿತ ಕೈಗೊಂಡಿರುವ ಕ್ರಮಗಳು ಶ್ಲಾಘನೀಯವಾಗಿದೆ. ಎಂಟು ತಂಡಗಳನ್ನು ರಚಿಸಿ ವಿಶೇಷ ನಿಗಾವಹಿಸಲು ಯೋಜಿಸಿರುವುದು ಸ್ವಾಗತಾರ್ಹ ಕ್ರಮವಾಗಿದೆ. ಆದರೂ, ಗೋವಧೆಗಾಗಿ ಗೋವುಗಳನ್ನು ಸಂಗ್ರಹಿಸಿರುವುದು ಗಮನಕ್ಕೆ ಬಂದಿದೆ. ಅದಕ್ಕೆ ಸಂಬಂಧಪಟ್ಟಂತೆ ಅಧಿಕಾರಿಗಳ ಸಭೆ ಮೂಲಕ ಸೂಕ್ತ ಕ್ರಮ ಕೈಗೊಳ್ಳಬೇಕು. ಇಲ್ಲವಾದಲ್ಲಿ ಸಂಗ್ರಹಿಸಿದ ಗೋವುಗಳ ಜಾಗ ಹಾಗೂ ಟೋಲ್‌ ನಾಕಾ ಮೂಲಕ ಸಾಗಿಸುತ್ತಿರುವ ಗೋವುಗಳ ರಕ್ಷಣೆಗೆ ನಾವೇ ಸ್ವತಃ ಕ್ರಮ ಕೈಗೊಳ್ಳಬೇಕಾಗುತ್ತದೆ ಎಂದು ಎಚ್ಚರಿಸಿದರು.

ಸಂಘಟನೆಯ ಜಿಲ್ಲಾಧ್ಯಕ್ಷ ಲಕ್ಷ್ಮೀಕಾಂತ್‌ ಸ್ವಾದಿ, ವಿದ್ಯಾರ್ಥಿ ಘಟಕದ ಜಿಲ್ಲಾಧ್ಯಕ್ಷ ಮಹೇಶ ಕೆಂಭಾವಿ, ನಗರ ಅಧ್ಯಕ್ಷ ದಶರಥ, ಉಪಾಧ್ಯಕ್ಷ ಮಲ್ಲು ದೊಟಗಿ, ಮುಖಂಡರಾದ ಅರುಣ ಸುಲ್ತಾನಪುರ, ನಾಗೇಶ್‌ ಅಡೆ, ಮಹಾದೇವ ಮ್ಯಾಡಿ ಪ್ರತಿಭಟನೆಯಲ್ಲಿ ಪಾಲ್ಗೊಂಡಿದ್ದರು.