ಮೊದಲ ದಿನವೇ ವ್ಯಾಪಾರ-ವಹಿವಾಟು ಜೋರು

Team Udayavani, Jun 2, 2020, 12:35 PM IST

ಕಲಬುರಗಿ: ಕೋವಿಡ್ ಸೋಂಕಿನಿಂದಾಗಿ ಲಾಕ್‌ ಡೌನ್‌ ಜಾರಿದ ಬರೋಬ್ಬರಿ 80 ದಿನಗಳ ನಂತರ ನಗರದಲ್ಲಿ ಸೋಮವಾರ ವ್ಯಾಪಾರ-ವಹಿವಾಟು ಜೋರಾಗಿ ನಡೆಯಿತು.

ಲಾಕ್‌ಡೌನ್‌ ಸಡಿಲಿಕೆ ಮಾಡಿ ಅನುಮತಿ ನೀಡಿದ ಮೊದಲ ದಿನವೇ ಅಂಗಡಿಗಳ ಮುಂದೆ ಜನ ಗುಂಪು-ಗುಂಪಾಗಿ ಮುಗಿಬಿದ್ದರು. ಮಹಾಮಾರಿ ಕೋವಿಡ್ ಆತಂಕದ ನಡುವೆಯೂ ಜನತೆ ಭರ್ಜರಿ ವ್ಯಾಪಾರದಲ್ಲಿ ತೊಡಗಿದ್ದರು. ಸೂಪರ್‌ ಮಾರ್ಕೆಟ್‌ ತುಂಬಾ ಜನವೋ ಜನ ಸೇರಿದ್ದರು. ಸೂಪರ್‌ ಮಾರ್ಕೆಟ್‌ ಮಾತ್ರವಲ್ಲ ಸೇಷನ್‌ ಬಜಾರ್‌, ಕೇಂದ್ರ ಬಸ್‌ ನಿಲ್ದಾಣದ ರಸ್ತೆ, ಹಳೆ ಜೇವರ್ಗಿ ರಸ್ತೆ, ರಾಮಮಂದಿರ ವೃತ್ತದಲ್ಲೂ ಜನಸಂದಣಿ ಇತ್ತು. ಗ್ರಾಮೀಣ ಪ್ರದೇಶದಿಂದಲೂ ಜನರು ನಗರದತ್ತ ಧಾವಿಸಿ ಬಂದರು.

ತರಕಾರಿ ಮಾರುಕಟ್ಟೆ, ಬಟ್ಟೆ ಅಂಗಡಿಗಳು, ಎಲೆಕ್ಟ್ರಾನಿಕ್‌ ವಸ್ತುಗಳ ಶಾಪ್‌ಗ್ಳು, ಮೊಬೈಲ್‌ ಶಾಪ್‌ಗ್ಳು, ಗೃಹ ಬಳಕೆ ವಸ್ತುಗಳು, ಪುಸ್ತಕ ಮಳಿಗೆಗಳು, ಹಾರ್ಡ್‌ವೇರ್‌ ಶಾಪ್‌ಗ್ಳು, ಆಫ್‌ ಸೆಟ್‌ ಅಂಗಡಿಗಳು, ಪೇಂಟಿಂಗ್‌, ಆಟೊಮೊಬೈಲ್‌ ಸೇರಿದಂತೆ ಹಲವು ಅಂಗಡಿಗಳ ಮುಂದೆ ಜನರು ಕಂಡುಬಂದರು. ಸೂಪರ್‌ ಮಾರ್ಕೆಟ್‌ ಹಾಗೂ ಶಹಾಬಜಾರ್‌ನಲ್ಲಿ ರೈತರ ಸಂಖ್ಯೆ ಸಹ ಹೆಚ್ಚಾಗಿತ್ತು. ಕೃಷಿ ಉಪಕರಣ, ಹಗ್ಗ, ಬಾರಕೋಲು ಮುಂತಾದವುಗಳ ಖರೀದಿಯಲ್ಲಿ ಅಪಾರ ರೈತರು ಸೇರಿದ್ದರು.