ಮುಲ್ಲಾಮಾರಿ ಜಲಾಶಯಕ್ಕೆ ಪುನಶ್ಚೇತನ ಭಾಗ್ಯ

Team Udayavani, Jun 27, 2017, 2:50 PM IST

ಚಿಂಚೋಳಿ: ತಾಲೂಕಿನ ಕೆಳದಂಡೆ ಮುಲ್ಲಾಮಾರಿ ನೀರಾವರಿ ಯೋಜನೆಯ ಅಣೆಕಟ್ಟನ್ನು ಪ್ರಸಕ್ತ ಸಾಲಿನ ಡಿಸೆಂಬರ್‌ ಅಂತ್ಯದೊಳಗೆ ರಾಷ್ಟ್ರಕ್ಕೆ ಸಮರ್ಪಣೆ ಮಾಡಬೇಕಾಗಿರುವುದರಿಂದ ಪುನಶ್ಚೇತನ (ಅಧುನೀಕರಣ) ಕಾಮಗಾರಿಗಳು ಭರದಿಂದ ನಡೆಯುತ್ತಿವೆ. 

ಆಗಿನ ಮುಖ್ಯಮಂತ್ರಿ ವೀರೇಂದ್ರ ಪಾಟೀಲ ಅವರು ಬರಗಾಲ ಪರಿಹಾರ ಯೋಜನೆ ಅಡಿ 1973-74ನೇ ಸಾಲಿನಲ್ಲಿ ಕೆಳದಂಡೆ ಮುಲ್ಲಾಮಾರಿ ನೀರಾವರಿ ಯೋಜನೆ ಮಂಜೂರಿಗೊಳಿಸಿದ್ದರು. ಆದರೆ ಯೋಜನೆಗೆ 250 ಕೋಟಿ ರೂ.ಗಿಂತ ಹೆಚ್ಚಿನ ಹಣ ಖರ್ಚು ಮಾಡಿದರು ಸಹ ರೈತರು ತಮ್ಮ ಜಮೀನುಗಳಿಗೆ ನೀರು ಪಡೆಯಲು ಆಗುತ್ತಿರಲಿಲ್ಲ.

ಇದಕ್ಕೆ ಮುಖ್ಯ ಕಾರಣ 80 ಕಿಮೀ ಉದ್ದದ ಎಡದಂಡೆ ಮುಖ್ಯಕಾಲುವೆ ಕಾಮಗಾರಿ ಸಂಪೂರ್ಣ ಕಳಪೆ ಮಟ್ಟದಿಂದ ಕೂಡಿತ್ತು. ಹೀಗಾಗಿ ನೀರು ಸೋರಿಕೆಯಾಗುತ್ತಿತ್ತು. 80 ಕಿಮೀ ಉದ್ದದ ಮುಖ್ಯ ಕಾಲುವೆ ನವೀಕರಣಗೊಳಿಸಲು ರಾಜ್ಯ ಸರಕಾರ ಕರ್ನಾಟಕ ನೀರಾವರಿ ನಿಗಮದ ಮೂಲಕ 117 ಕೋಟಿ ರೂ. ಬಿಡುಗಡೆ ಮಾಡಿದೆ.

ಯೋಜನೆ ಮುಖ್ಯ ಕಾಲುವೆಯನ್ನು ಸಂಪೂರ್ಣವಾಗಿ ಸಿಮೆಂಟ್‌ ಕಾಂಕ್ರಿಟ್‌ನಿಂದ ಮಾಡಲಾಗುತ್ತಿದೆ. ಕಾಲುವೆ ನವೀಕರಣವಾದ ಬಳಿಕ ಚಿಮ್ಮನಚೋಡ, ತಾಜಲಾಪುರ, ದೋಟಿಕೊಳ, ಖುದಾವಂದಪುರ, ಕನಕಪುರ, ಗಾರಂಪಳ್ಳಿ, ಗೌಡನಹಳ್ಳಿ, ನಿಮಾಹೊಸಳ್ಳಿ, ಚಿಂಚೋಳಿ, ಚಿಮ್ಮಾಇದಲಾಯಿ, ಬೊಮ್ಮನಳ್ಳಿ, ಅಣವಾರ, ಪರದಾರ ಮೋತಕಪಳ್ಳಿ, ಸುಲೇಪೇಟ, ಗರಗಪಳ್ಳಿ, ಇರಗಪಳ್ಳಿ, ಇಂದ್ರಪಾಡ ಹೊಸಳ್ಳಿ, ಯಾಕಾಪುರ, ರಾಮತೀರ್ಥ, ಪೆಂಚನಪಳ್ಳಿ, ಬೆಡಕಪಳ್ಳಿ, ಕೊಡಂಪಳ್ಳಿ, ಕೆರೋಳ್ಳಿ, ಖರ್ಚಖೇಡ ಗ್ರಾಮಗಳ ರೈತರು ಸಮರ್ಪಕವಾಗಿ ನೀರು ಪಡೆದುಕೊಳ್ಳಬಹುದಾಗಿದೆ.  

ಕೆಳದಂಡೆ ಮುಲ್ಲಾಮಾರಿ ನೀರಾವರಿ ಯೋಜನೆ ಬಂಡಿಂಗ್‌ ದುರಸ್ತಿಗೊಳಿಸಲು ಜಲ ಸಂಪನ್ಮೂಲ ಇಲಾಖೆಯಿಂದ ಒಟ್ಟು ಕೋಟಿ ರೂ. ಮಂಜೂರಾಗಿದ್ದು, 4.2 ಕಿಮೀ ಉದ್ದವುಳ್ಳ ಬಂಡಿಂಗ್‌ ಕೆಲಸ ಚುರುಕಿನಿಂದ ನಡೆಯುತ್ತಿದೆ. ಪಕ್ಕದಲ್ಲಿ ವಿದ್ಯುತ್‌ ದೀಪ ಆಳವಡಿಸಲಾಗುತ್ತಿದೆ. ಈಗಾಗಲೇ ಜಲಾಶಯದ ಕೆಳಭಾಗದಲ್ಲಿ 2 ಕಿಮೀ ರಸ್ತೆಯನ್ನು ಡಾಂಬರೀಕರಣಗೊಳಿಸಲಾಗಿದೆ.

ಕೆಳದಂಡೆ ಮುಲ್ಲಾಮಾರಿ ಜಲಾಶಯದಿಂದ ಕೋಡಿಗಳ ಮೂಲಕ ಹರಿದು ಬಿಡುವ ನೀರಿನ ರಭಸ ಕಡಿಮೆ ಮಾಡಲು ಕೋಡಿಗಳ ಹತ್ತಿರ 450 ಮೀಟರ್‌ ಸಿಮೆಂಟ್‌ ತಡೆಗೋಡೆ ನಿರ್ಮಿಸಲಾಗುತ್ತಿದೆ. ಎಡಕ್ಕೆ 1.2 ಮೀಟರ್‌ ಮತ್ತು ಬಲಕ್ಕೆ 6 ಮೀಟರ್‌ ತಡೆಗೋಡೆ ನಿರ್ಮಿಸುವ ಕೆಲಸ ಪ್ರಗತಿಯಲ್ಲಿದೆ. 

ತಾಲೂಕಿನ ಕೆಳದಂಡೆ ಮುಲ್ಲಾಮಾರಿ ನೀರಾವರಿ ಯೋಜನೆಯಿಂದ ರೈತರು ನೀರಿನ ಸದುಪಯೋಗಪಡೆದುಕೊಳ್ಳಬೇಕು ಹಾಗೂ ಅನಾವಶ್ಯಕವಾಗಿ ನೀರು ಹರಿದು ಹೋಗದಂತೆ 80 ಕಿಮೀ ಎಡದಂಡೆ ಮುಖ್ಯಕಾಲುವೆ ಮತ್ತು 64 ಉಪ ಕಾಲುವೆಗಳ ನವೀಕರಣಕ್ಕಾಗಿ ಜಲ ಸಂಪನ್ಮೂಲ ಖಾತೆ ಸಚಿವ ಎಂ.ಬಿ. ಪಾಟೀಲ ಹಾಗೂ ಜಿಲ್ಲಾ ಉಸ್ತುವಾಗಿ ಸಚಿವ ಡಾ| ಶರಣಪ್ರಕಾಶ ಪಾಟೀಲ ಅವರಿಗೆ ಮನವರಿಕೆ ಮಾಡಿಕೊಡಲಾಯಿತು. 

ನಮ್ಮ ಬೇಡಿಕೆಯಂತೆ ಸಚಿವರು ಕಳೆದ ಮಾಚ್‌ ìನಲ್ಲಿ ಜಲಾಶಯಕ್ಕೆ ಭೇಟಿ ನೀಡಿ ವಾಸ್ತವ ನೋಡಿ ಯೋಜನೆಗೆ 34.60 ಕೋಟಿ ರೂ. ಮಂಜೂರುಗೊಳಿಸಿದ್ದಾರೆ. ಅಲ್ಲದೇ ಪುರ್ನವಸತಿ ಕೇಂದ್ರಗಳಿಗೆ ಮೂಲ ಸೌಕರ್ಯ ಒದಗಿಸಲು 17 ಕೋಟಿ ರೂ. ನೀಡಲಾಗಿದೆ. ಯೋಜನೆಯನ್ನು ಸಂಪೂರ್ಣವಾಗಿ ಅಧುನೀಕರಣಗೊಳಿಸಲಾಗುತ್ತಿದೆ ಎಂದು ಸಂಸದೀಯ ಕಾರ್ಯದರ್ಶಿ ಡಾ| ಉಮೇಶ ಜಾಧವ ತಿಳಿಸಿದ್ದಾರೆ. 

*ಶಾಮರಾವ ಚಿಂಚೋಳ