ಯಾನಾಗುಂದಿ ಮಾಣಿಕ್ಯಗಿರಿಗೆ ಇಂದು ಅಮಿತ್‌ ಶಾ ಭೇಟಿ

Team Udayavani, Feb 25, 2018, 10:27 AM IST

ಸೇಡಂ: ಬಿಜೆಪಿ ರಾಷ್ಟ್ರೀಯ ಅಧ್ಯಕ್ಷ ಅಮಿತ್‌ ಶಾ ಅವರು ಯಾನಾಗುಂದಿಯ ಮಾಣಿಕ್ಯಗಿರಿಗೆ ಫೆ.25ರಂದು ಭೇಟಿ ನೀಡಲಿದ್ದಾರೆ.

ಮಾಣಿಕೇಶ್ವರಿ ಅಮ್ಮನವರ ದರ್ಶನ ಪಡೆಯುವ ಮುನ್ನ ಮಧ್ಯಾಹ್ನ 3:15ಕ್ಕೆ ಮಾಣಿಕ್ಯಗಿರಿ ಬೆಟ್ಟದ ಕೆಳಗಿರುವ ಕಲ್ಯಾಣ ಮಂಟಪದಲ್ಲಿ 800 ಜನ ಕೋಲಿ ಸಮಾಜದ ಪ್ರಮುಖರೊಂದಿಗೆ ಸಂವಾದ ನಡೆಸಲಿದ್ದಾರೆ. ಟಿಕೆಟ್‌ ಆಕಾಂಕ್ಷಿಗಳಾದ ರಾಜಗೋಪಾಲರೆಡ್ಡಿ ಮತ್ತು ಸಾಯಬಣ್ಣ ಬೋರಬಂಡ ಸಂವಾದದ ಸಂಪೂರ್ಣ ಉಸ್ತುವಾರಿ ವಹಿಸಿಕೊಂಡಿದ್ದಾರೆ.

ಅಮಿತ್‌ ಆಗಮನದ ಹಿನ್ನೆಲೆಯಲ್ಲಿ ಸಿದ್ಧತೆಗಳು ಬಹುತೇಕ ಪೂರ್ಣಗೊಂಡಿದ್ದು, ಅವರಿಗಾಗಿಯೇ ವಿಶೇಷ ಹೆಲಿಪ್ಯಾಡ್‌ ನಿರ್ಮಿಸಲಾಗಿದೆ. ಅಮ್ಮನವರು ಅಮಿತ್‌ ಶಾ ಮೂಲಕ ಪ್ರಧಾನಿ ಮೋದಿ ಅವರಿಗೆ ಸಂದೇಶ ರವಾನಿಸುವ ಸಾಧ್ಯತೆಗಳಿವೆ ಎಂದು ಹೇಳಲಾಗುತ್ತಿದೆ.

ಗಣ್ಯ ನಾಯಕರ ಭೇಟಿ 
ಇಲ್ಲಿಯವರೆಗೂ ರಾಜ್ಯ ಮತ್ತು ರಾಷ್ಟ್ರೀಯ ನಾಯಕರು ಯಾನಾಗುಂದಿಗೆ ಭೇಟಿ ನೀಡಿ ಅಮ್ಮನವರ ದರ್ಶನಾಶೀರ್ವಾದ ಪಡೆದಿದ್ದಾರೆ. ಅವರಲ್ಲಿ ಆಂಧ್ರಪ್ರದೇಶದ ಮಾಜಿ ಸಿಎಂ ಟಿ.ರಂಗಯ್ಯ, ಕರ್ನಾಟಕದ ಮಾಜಿ ಮುಖ್ಯಮಂತ್ರಿಗಳಾದ ಬಿ.ಡಿ. ಜತ್ತಿ, ಗುಂಡೂರಾವ್‌, ವೀರೇಂದ್ರ ಪಾಟೀಲ, ಧರಂಸಿಂಗ್‌, ಯಡಿಯೂರಪ್ಪ, ವಿಎಚ್‌ಪಿ ಮುಖಂಡ ಅಶೋಕ ಸಿಂಘಾಲ್‌, ರಾಷ್ಟ್ರಪತಿ ರಾಮನಾಥ ಕೋವಿಂದ (ರಾಷ್ಟ್ರಪತಿಯಾಗುವ ಮುಂಚೆಯೇ), ಕೇಂದ್ರ ಸಚಿವ ಅನಂತಕುಮಾರ, ಮಾಜಿ ಸಚಿವರಾದ ಜನಾರ್ಧನರೆಡ್ಡಿ, ಶ್ರೀರಾಮುಲು ಒಳಗೊಂಡಂತೆ ಅನೇಕರು ಭೇಟಿ ನೀಡಿ ಅಮ್ಮನವರ ದರ್ಶನ ಪಡೆದಿದ್ದಾರೆ.