ಮಹಾನಗರ ಪಾಲಿಕೆ ಚುನಾವಣೆಯಲ್ಲಿ ಯಾರ ಮೇಲುಗೈ?

Team Udayavani, Aug 31, 2021, 5:05 PM IST

ಕಲಬುರಗಿ:ಈ ಸಲ ಪಾಲಿಕೆಯಲ್ಲಿ ಹೇಗಾದರೂ ಮಾಡಿ ಆಡಳಿತ ಹಿಡಿಯಬೇಕೆಂದು ಬಿಜೆಪಿ ಕಾರ್ಯತಂತ್ರ ರೂಪಿಸುತ್ತಿರುವುದರಿಂದ ಹಾಗೂ ಪಾಲಿಕೆಯಲ್ಲಿ ಕೈ ಪ್ರಾಬಲ್ಯ ಮುಂದುವರೆಯಬೇಕೆಂದು ಕಾಂಗ್ರೆಸ್‌ ಸವಾಲಿನೊಂದಿಗೆ ಮುನ್ನೆಡೆಯುತ್ತಿರುವುದರಿಂದ ಮತ್ತು ಪಾಲಿಕೆಯಲ್ಲಿ ತಮ್ಮದ್ದೇ ಕಿಂಗ್‌ ಮೇಕರ್‌ ಪಾತ್ರ ಎಂಬುದಾಗಿ ಜೆಡಿಎಸ್‌ ಮುನ್ನುಗ್ಗುತ್ತಿರುವುದರಿಂದ ಕಲಬುರಗಿ ಮಹಾನಗರ ಪಾಲಿಕೆ ಚುನಾವಣಾ ಪ್ರಚಾರ ಮುಗಿಲು ಮುಟ್ಟಿರುವ ರೀತಿಯಲ್ಲಿ ಕಂಡು ಬರುತ್ತಿದೆ.

ಪಾಲಿಕೆ ಚುನಾವಣೆಗೆ ಕೇಂದ್ರದ ಹಾಗೂ ರಾಜ್ಯದ ಸಚಿವರಲ್ಲದೇ ಮಾಜಿ ಮುಖ್ಯಮಂತ್ರಿ ಆಗಮಿಸಿ ತಮ್ಮ ಅಭ್ಯರ್ಥಿಗಳ ಪರ ಮತ ಯಾಚಿಸುತ್ತಿರುವುದನ್ನು ನೋಡಿದರೆ ಚುನಾವಣೆ ಕಾವು ಯಾವ ಮಟ್ಟಿಗೆ ತಲುಪಿದೆ ಎಂಬುದು ನಿರೂಪಿಸುತ್ತದೆ.

ಬಿಜೆಪಿ ರಾಜ್ಯಾಧ್ಯಕ್ಷ ನಳೀನಕುಮಾರ ಕಟೀಲು, ಉಪಾಧ್ಯಕ್ಷ ಬಿ.ವೈ. ವಿಜಯೇಂದ್ರ, ಸಚಿವರಾದ ಮುರುಗೇಶ ನಿರಾಣಿ, ಭೈರತಿ ಬಸವರಾಜ, ಕೇಂದ್ರ ಸಚಿವ ಭಗವಂತ ಖೂಬಾ ಸೇರಿ ಹಲವರು ಬಿಜೆಪಿ ಪರ ಮತಯಾಚಿಸಿದ್ದರೆ ಕಾಂಗ್ರೆಸ್‌ನಿಂದ ವಿಪಕ್ಷ ನಾಯಕ ಎಸ್‌.ಆರ್‌. ಪಾಟೀಲ್‌, ಕಾರ್ಯಾಧ್ಯಕ್ಷರಾದ  ಸಲೀಮ ಅಹ್ಮದ , ಈಶ್ವರ ಖಂಡ್ರೆ ಇತರರು ಕಾಂಗ್ರೆಸ್‌ ಪರ ಮತಯಾಚಿಸಿದರೆ, ಮಾಜಿ ಮುಖ್ಯಮಂತ್ರಿ ಎಚ್‌.ಡಿ. ಕುಮಾರಸ್ವಾಮಿ ಜೆಡಿಎಸ್‌ ಪರವಾಗಿ ಮತಯಾಚಿಸಿದ್ದಾರೆ.

ಇದನ್ನೂ ಓದಿ:ಕಾಂಗ್ರೆಸ್ ಸರಕಾರದ ಅವಧಿಯಲ್ಲಿ ಜನರು ಚಿರಂಜೀವಿಗಳಾಗಿದ್ದರಾ?|

ಇನ್ನೆರಡು ದಿನ ಯಾರ್ಯಾರು ಬರ್ತಾರೆಂಬುದು ಕಾದು ನೋಡಬೇಕಿದೆ. ಚುನಾವಣೆ ಘೋಷಣೆ ಹಿಡಿದು ನಾಮಪತ್ರ ಸಲ್ಲಿಕೆ ಹಾಗೂ ಪ್ರಚಾರಕ್ಕೆ
ಕಡಿಮೆ ದಿನಗಳಿದ್ದರೂ ಪಾಲಿಕೆ ಚುನಾವಣೆಗೆ ಹಿಂದೆಂದೂ ಕಾಣದ ರಂಗು ಕಂಡು ಬಂದಿದ್ದು, ಚುನಾವಣೆಗೆ ಈಗ ಕೇವಲ ಮೂರು ದಿನಗಳು ಮಾತ್ರ ಬಾಕಿ ಉಳಿದಿದ್ದರಿಂದ ಮತದಾರರನ ಮನ ಸೆಳೆಯಲು ಇನ್ನಿಲ್ಲದ ಕಸರತ್ತುಗಳು ನಡೆದಿವೆ.

ಬಿಜೆಪಿ ಜಪ ಕಾರ್ಯರೂಪಕ್ಕೆ ಬರುವುದೇ?:
ಪಾಲಿಕೆ ಇತಿಹಾಸದಲ್ಲಿ ಬಿಜೆಪಿ ಒಮ್ಮೆಯೂ ಬಹುಮತದ ಆಧಾರದ ಮೇಲೆ ಅಧಿಕಾರಕ್ಕೆ ಬಂದಿಲ್ಲ. 2009ರಲ್ಲಿ ಮಾತ್ರ ಬಿಜೆಪಿ ಒಂದು ವರ್ಷ
ಇತರ ಸದಸ್ಯರ ಬೆಂಬಲದೊಂದಿಗೆ ಮೇಯರ್‌ ಸ್ಥಾನ ಪಡೆದುಕೊಂಡಿತ್ತು. ಆದರೆ ಈಗ ರಾಜ್ಯ ಹಾಗೂ ಕೇಂದ್ರದಲ್ಲಿ ಅಧಿಕಾರದಲ್ಲಿರುವುದರಿಂದ ಪಾಲಿಕೆಗೆ ಅಧಿಕಾರಕ್ಕೆ ಬರುವುದು ಸವಾಲಿನ ಪ್ರಶ್ನೆಯಾಗಿದೆ. ಹೀಗಾಗಿ ಬಿಜೆಪಿ ಸ್ಮಾರ್ಟ್‌ ಸೇರಿದಂತೆ ಇತರ ವಿಷಯಗಳನ್ನು
ಮುಂದಿಟ್ಟುಕೊಂಡು ಜಪ ಮಾಡುತ್ತಿದೆ.

ಕಾಂಗ್ರೆಸ್‌ ರಣತಂತ್ರ: ಈತ್ತ ಕಾಂಗ್ರೆಸ್‌ ಕೂಡಾ ರಣತಂತ್ರ ರೂಪಿಸುತ್ತಿದೆ. ಬಂಡಾಯ ಅಭ್ಯರ್ಥಿಗಳ ಮನವೋಲಿಸುವುದರ ಜತೆಗೆ
ಮತದಾರರ ಮನ ಗೆಲ್ಲಲು ಅವಿರತವಾಗಿ ಶ್ರಮಿಸಲಾಗುತ್ತಿದೆ. ತನ್ನದೇಯಾದ ಓಟ ಬ್ಯಾಂಕ್‌ನ ಜತೆಗೆ ಇತರ ಸಮುದಾಯಗಳ ಮತ
ಸೆಳೆಯುವತ್ತ ನೋಟ ಬಬೀರಲಾಗುತ್ತಿದೆ.

ಜೆಡಿಎಸ್‌ ಕಿಂಗ್‌ ಮೇಕರ್‌ ಕನಸು: ಪಾಲಿಕೆಯಲ್ಲಿ ಯಾವುದೇ ಪಕ್ಷಕ್ಕೆ ಸ್ಪಷ್ಠ ಬಹುಮತ ಬಾರದು ಎನ್ನಲಾಗುತ್ತಿದೆ. ಹೀಗಾಗಿ ಜೆಡಿಎಸ್‌ ಕಿಂಗ್‌
ಮೇಕರ್‌ ಆಗುವ ಸಾಧ್ಯತೆಗಳೇ ಹೆಚ್ಚು ಎಂದು ವಿಶ್ಲೇಷಿಸಲಾಗುತ್ತಿದೆ.

ಕೋವಿಡ್‌ ನಿಯಮಗಳು ಗಾಳಿಗೆ: ಚುನಾವಣೆಯಲ್ಲಿ ಬಹಿರಂಗ ಪ್ರಚಾರಕ್ಕೆ ಅವಕಾಶ ಇಲ್ಲ ಎಂಬುದಾಗಿ ಹೇಳಿದ್ದರೂ ಬಹಿರಂಗ ಸಭೆಗಳು ನಡೆದಿವೆ. ರೋಡ್‌ ಶೋಗಂತು ನೂರಾರು ಜನ ಪಾಲ್ಗೊಂಡಿರುವುದೇ ಇದಕ್ಕೆ ಸಾಕ್ಷಿ. ಮಾಸ್ಕ್ವೂ ಇಲ್ಲ. ಸಾಮಾಜಿಕ ಅಂತರವೂ ಇಲ್ಲ. ಎಲ್ಲ ನಿಯಮಗಳು ಪಕ್ಷೇತರ ಅಭ್ಯರ್ಥಿಗಳಿಗೆ ಎನ್ನುವಂತಾಗಿದೆ. ರೋಡ ಶೋ, ಜನಜಂಗುಳಿಗೆ ಜನ ಬೇಸರ ವ್ಯಕ್ತಪಡಿಸುತ್ತಿದ್ದಾರೆ.

ಸಾಮಾನ್ಯ ಸ್ಥಾನಗಳಲ್ಲೂ ಮೀಸಲು ಅಭ್ಯರ್ಥಿ!
ಪ್ರಸಕ್ತವಾಗಿ ಪಾಲಿಕೆ ಚುನಾವಣೆಯಲ್ಲಿ ಸಾಮಾನ್ಯ ಸ್ಥಾನದ ಮೀಸಲು ವಾರ್ಡ್‌ಗಳಲ್ಲಿ ಪರಿಶಿಷ್ಟ ಜಾತಿಹಾಗೂ ಇತರ ಪ್ರವರ್ಗದವರಿಗೆ ಟಿಕೆಟ್‌ ನೀಡಿರುವುದು ತೀವ್ರ ಚರ್ಚೆಗೆ ಗ್ರಾಸವಾಗಿದೆ.ಕಲಬುರಗಿ ಉತ್ತರ ಕ್ಷೇತ್ರದ ಸಾಮಾನ್ಯ ಮೀಸಲು ವಾರ್ಡ್‌ಗಳಲ್ಲಿ ಸೂಕ್ತ ಅಭ್ಯರ್ಥಿ ಸಿಗದೇ ಇರುವ ಸಂದರ್ಭದಲ್ಲಿ ಅಲ್ಪಸಂಖ್ಯಾತರ ವರ್ಗದವರಿಗೆ ಟಿಕೆಟ್‌ ನೀಡಲಾಗಿದೆ ಯಾದರೂ ಕಲಬುರಗಿ ದಕ್ಷಿಣ ಕ್ಷೇತ್ರದ ಸಾಮಾನ್ಯ ಸ್ಥಾನ ವಾರ್ಡ್‌ಗಳಲ್ಲೂ
ಬಿಜೆಪಿ ಪರಿಶಿಷ್ಟ ಜಾತಿ ವರ್ಗದವರಿಗೆ ಮಣೆ ಹಾಕಿರುವುದು ಎಷ್ಟರ ಮಟ್ಟಿಗೆ ಸರಿ ಎಂಬುದು ಮತದಾರರಲ್ಲಿ ಚರ್ಚೆ ನಡೆದಿದೆ. ಇದು ಪಕ್ಷಕ್ಕೆ ಮುಳುವಾದರೂ ಆಶ್ಚರ್ಯಪಡುವಂತಿಲ್ಲ.ಕಲಬುರಗಿ ಉತ್ತರಕ್ಷೇತ್ರದಲ್ಲಿ 30 ವಾರ್ಡ್‌ಗಳು ಬಂದರೆ ದಕ್ಷಿಣದಲ್ಲಿ 25 ವಾರ್ಡ್‌ಗಳು ಬರುತ್ತವೆ. ಯಾರುಹೆಚ್ಚು ಸ್ಥಾನಗಳನ್ನು ಗೆಲ್ಲಿಸಿಕೊಂಡು ಬರ್ತಾರೆ ಎಂಬುದೇ ಕೆಕೆಆರ್‌ಡಿಬಿ ಅಧ್ಯಕ್ಷ ದತ್ತಾತ್ರೇಯ ಪಾಟೀಲ್‌ ಹಾಗೂ ಕ್ರೆಡೆಲ್‌ ಅಧ್ಯಕ್ಷ ಚಂದು ಪಾಟೀಲ್‌ ನಡುವೆಯೇ ಸ್ಪರ್ಧೆ ಏರ್ಪಟ್ಟಿರುವುದು ಚುನಾವಣೆಯ ಹೈಲೆಟ್‌ ಎನ್ನಬಹುದಾಗಿದೆ.