ಮಹಿಳೆಯರಿಗೆ ಆರೋಗ್ಯದ ಜಾಗೃತಿ ಅಗತ್ಯ: ಅಜಯಸಿಂಗ್‌

Team Udayavani, Jun 19, 2017, 3:53 PM IST

ಜೇವರ್ಗಿ: ಮಹಿಳೆಯರು ತಮ್ಮ ಆರೋಗ್ಯದಲ್ಲಿ ಮುಂಜಾಗ್ರತೆ ವಹಿಸುವುದರ ಮೂಲಕ ಮುಂದಾಗುವ ಅನಾಹುತ ತಪ್ಪಿಸಬಹುದು ಎಂದು ಶಾಸಕ ಡಾ| ಅಜಯಸಿಂಗ್‌ ಹೇಳಿದರು. ತಾಲೂಕಿನ ಕೂಡಿ ದರ್ಗಾದ ಪ್ರಾಥಮಿಕ ಆರೋಗ್ಯ ಕೇಂದ್ರದ ಆವರಣದಲ್ಲಿ ಧರ್ಮಸಿಂಗ್‌ ಫೌಂಡೇಶನ್‌, ಕ್ಯಾನ್ಸರ್‌ ಕೇರ್‌ ಇಂಡಿಯಾ, ಎಚ್‌ಸಿಜಿ ಹಾಗೂ ತಾಲೂಕು ಆರೋಗ್ಯ ಇಲಾಖೆ ವತಿಯಿಂದ ರವಿವಾರ ಏರ್ಪಡಿಸಿದ್ದ ಉಚಿತ ಕ್ಯಾನ್ಸರ್‌ ತಪಾಸಣೆ ಶಿಬಿರ ಉದ್ಘಾಟಿಸಿ ಅವರು ಮಾತನಾಡಿದರು. 

ದೇಶದಲ್ಲಿ ಕ್ಯಾನ್ಸರ್‌ ರೋಗದಿಂದ ಪ್ರತಿ ಗಂಟೆಗೆ ಎಂಟು ಮಹಿಳೆಯರಂತೆ ದಿನಕ್ಕೆ 200 ಮಹಿಳೆಯರು ಸಾವನ್ನಪ್ಪುತ್ತಿದ್ದಾರೆ. ಪ್ರತಿ ವರ್ಷ ಕ್ಯಾನ್ಸರ್‌ ರೋಗದಿಂದ ಒಟ್ಟು 74 ಸಾವಿರ ಮಹಿಳೆಯರು ಸಾವನ್ನಪ್ಪುತ್ತಿದ್ದಾರೆ. ಇದು ಆಘಾತಕಾರಿ ವಿಷಯ ಎಂದರು. ಬಡವರಿಗೆ ಆರೋಗ್ಯ ತೀರಾ ದುಬಾರಿ. ಆದ್ದರಿಂದ ಉಚಿತ ತಪಾಸಣೆ ಲಾಭ ಪಡೆಯಬೇಕು. ತಾಲೂಕಿನ ಜನತೆಯ ಆರೋಗ್ಯಕ್ಕೆ ಹೆಚ್ಚಿನ ಒತ್ತು ನೀಡಲಾಗುತ್ತಿದ್ದು, ಪ್ರತಿಯೊಂದು ಹೋಬಳಿ ಮಟ್ಟದಲ್ಲಿ ಉಚಿತ ಕ್ಯಾನ್ಸರ್‌ ತಪಾಸಣೆ ಶಿಬಿರ ಆಯೋಜಿಸಲಾಗುತ್ತಿದೆ.

ಈಗಾಗಲೇ ತಾಲೂಕಿನ ನೆಲೋಗಿ, ಅರಳಗುಂಡಗಿ, ಯಡ್ರಾಮಿ, ಗಂವ್ಹಾರ, ಅಂಕಲಗಾ ಸೇರಿದಂತೆ ಅನೇಕ ಹೊಬಳಿ ಕೇಂದ್ರಗಳಲ್ಲಿ ಉಚಿತ ಆರೋಗ್ಯ ಶಿಬಿರ ಏರ್ಪಡಿಸಲಾಗಿದೆ ಎಂದು ಹೇಳಿದರು. ಇಲ್ಲಿಯವರೆಗೆ ತಾಲೂಕಿನಲ್ಲಿ 10 ಸಾವಿರ ಮಹಿಳೆಯರು ಶಿಬಿರದಲ್ಲಿ ಭಾಗವಹಿಸಿದ್ದಾರೆ. ಅದರಲ್ಲಿ 1600 ಮಹಿಳೆಯರಿಗೆ ಪ್ಯಾಪೋಸ್ಮಿಯರ ತಪಾಸಣೆ ಮಾಡಲಾಗಿದೆ. 167 ಮಹಿಳೆಯರಿಗೆ ಶಸ್ತ್ರಚಿಕಿತ್ಸೆಯ ಅಗತ್ಯವಿದೆ.

ಅಂತಹ ಮಹಿಳೆಯರಿಗೆ ಧರ್ಮಸಿಂಗ್‌ ಫೌಂಡೇಶನ್‌ ವತಿಯಿಂದ ಉಚಿತ ಶಸ್ತ್ರಚಿಕಿತ್ಸೆ ಮಾಡಿಸಲಾಗುವುದು ಎಂದರು. ಈ ಭಾಗದ ಹತ್ತಾರು ಹಳ್ಳಿಗಳ ಜನರಿಗೆ ಅನುಕೂಲವಾಗುವಂತೆ ಕೋನಹಿಪ್ಪರಗಾ ಬ್ರಿàಜ್‌ ಕಂ ಬ್ಯಾರೇಜ್‌ ನಿರ್ಮಾಣ ಮಾಡಲಾಗುತ್ತಿದೆ. ತಾಲೂಕಿನಲ್ಲಿ ಕಟ್ಟಿ ಸಂಗಾವಿ ಬಳಿ ಸೇತುವೆ ಮತ್ತು ಬ್ಯಾರೇಜ್‌, ಚಾಮನೂರ-ನರಿಬೋಳ ಬ್ರಿಡ್ಜ್, ಹೊನ್ನಾಳ-ತುನ್ನುರ ಬ್ರಿಡ್ಜ್ ಗಳನ್ನು ನಿರ್ಮಿಸಲಾಗುತ್ತಿದೆ.

ಇನ್ನು ಹೆಚ್ಚಿನ ಅನುದಾನವನ್ನು ಈ ಭಾಗಕ್ಕೆ ತಂದು ಅಭಿವೃದ್ಧಿ ಮಾಡಲಾಗುವುದು ಎಂದರು. ಗ್ರಾಪಂ ಅಧ್ಯಕ್ಷ ಬಸವರಾಜ ಪೊಲೀಸ್‌ ಪಾಟೀಲ ಮಂದ್ರವಾಡ ಅಧ್ಯಕ್ಷತೆ ವಹಿಸಿದ್ದರು. ಮುಖಂಡರಾದ ಶಿವಣಗೌಡ ಮಂದ್ರವಾಡ, ರಾಜಶೇಖರ ಸೀರಿ, ವಸಂತ ನರಿಬೋಳ, ರುಕುಂ ಪಟೇಲ ಕೂಡಿ, ಶರಣಗೌಡ ಪಾಟೀಲ, ಮಹಿಬೂಬ ಪಟೇಲ ಕೋಬಾಳ, ಸಂಗಣ್ಣಗೌಡ ಗುಳಾಳ, ಶಿವಶರಣಪ್ಪ ಕೋಬಾಳ,

-ತಾಲೂಕು ಆರೋಗ್ಯಾಧಿಕಾರಿ ಡಾ| ಸಿದ್ದು ಪಾಟೀಲ, ಡಾ| ಕಾಮೇಶ್ವರಿ, ಡಾ| ಇಂದಿರಾ, ಮುಖಂಡರಾದ ಮೈಲಾರಿ ಬಣಮಿ, ಶಾಂತಲಿಂಗನಗೌಡ ಕೋಳಕೂರ, ನೀಲಕಂಠ ಅವಂಟಿ, ಸುಭಾಷ ಹೂಗಾರ, ಅನ್ವರ ಪಾಶಾ, ಮನೋಹರ ಕುಲಕರ್ಣಿ, ರಾಜಶೇಖರ ಖಣದಾಳ, ಗುರುಶಾಂತಪ್ಪ ಬಿರಾದಾರ, ವಿಜಯಕುಮಾರಗೌಡ ಪಾಟೀಲ, ಅಣವೀರ ಬಣಮಿ, ಬಸಣ್ಣ ಸರಕಾರ, ಪ್ರಕಾಶ ಪುಲಾರೆ, ಮಲ್ಲಿಕಾರ್ಜುನ ಕೂಡಿ, ಮರೆಪ್ಪ ಸರಡಗಿ ಇದ್ದರು.