ವಿರಾಜಪೇಟೆ: ಗಾಂಜಾ ಮಾರಾಟಕ್ಕೆ ಯತ್ನ ಮೂವರು ಆರೋಪಿಗಳ ಬಂಧನ

Team Udayavani, Jul 22, 2022, 7:34 PM IST

ಮಡಿಕೇರಿ: ಗಾಂಜಾ ಮಾರಾಟ ಮಾಡಲು ಯತ್ನಿಸುತ್ತಿದ್ದ ಮೂವರು ಆರೋಪಿಗಳನ್ನು ವಿರಾಜಪೇಟೆ ನಗರ ಪೊಲೀಸರು ಬಂಧಿಸಿದ್ದಾರೆ.

ಅಂಬಟ್ಟಿ ಗ್ರಾಮದ ನಿವಾಸಿ ಕೆ.ಹೆಚ್‌. ನಿಜಾಮುದ್ದೀನ್‌ (31), ಬಿಟ್ಟಂಗಾಲ ಗ್ರಾಮದ ನಿವಾಸಿ ಪಿ.ಡಿ.ಸೋಮಯ್ಯ (ರೋಷನ್‌-25), ಪಿ.ಸಿ.ಕವನ್‌ ಮಾದಯ್ಯ (22) ಬಂಧಿತ ಆರೋಪಿಗಳು.

ವಿರಾಜಪೇಟೆಯ ಪಂಜರು ಗಣಪತಿ ಬೀದಿ ಕಡೆಯಿಂದ ನಿಸರ್ಗ ಬಡಾವಣೆಗೆ ತೆರಳುವ ರಸ್ತೆ ಸಮೀಪದಲ್ಲಿ ಗಾಂಜಾ ಮಾರಾಟಕ್ಕೆ ಯತ್ನಿಸುತ್ತಿರುವ ಬಗ್ಗೆ ಖಚಿತ ಮಾಹಿತಿ ಆಧರಿಸಿ ದಾಳಿ ನಡೆಸಿದ ಪೊಲೀಸರು ಕಾರು, 1 ಕೆ.ಜಿ. 650 ಗ್ರಾಂ ಗಾಂಜಾ ಸಹಿತ ಆರೋಪಿಗಳನ್ನು ಬಂಧಿಸಿದ್ದಾರೆ.

ಬಂಧಿತರನ್ನು ನ್ಯಾಯಾಲಯಕ್ಕೆ ಹಾಜರುಪಡಿಸಿದ್ದು, ಮುಂದಿನ ಕ್ರಮ ಕೈಗೊಂಡಿದ್ದಾರೆ. ಕೊಡಗು ಪೊಲೀಸ್‌ ಅಧೀಕ್ಷಕ ಮತ್ತು ವಿರಾಜಪೇಟೆ ಉಪವಿಭಾಗ ಪೊಲೀಸ್‌ ಉಪಧೀಕ್ಷಕರ ಮಾರ್ಗದರ್ಶನದಲ್ಲಿ ವೃತ್ತ ನಿರೀಕ್ಷಕರಾದ ಶಿವರುದ್ರ ಅವರ ನಿರ್ದೇಶನದ ಮೇರೆಗೆ ವಿರಾಜಪೇಟೆ ನಗರ ಪೊಲೀಸ್‌ ಠಾಣೆಯ ಪಿ.ಎಸ್‌.ಐ ಸಿ.ವಿ.ಶ್ರೀಧರ್‌, ಸಿಬ್ಬಂದಿಗಳಾದ ಗಿರೀಶ್‌, ಮುಸ್ತಾಫ‌, ಧರ್ಮ, ರಜನ್‌ ಕುಮಾರ್‌ ಸುಬ್ರಮಣಿ, ಮಧು ಸತೀಶ, ಸಾಗರ್‌, ಶೆಟ್ಟಪ್ಪ ಗೀತಾ, ಗೋವಿಂದ ಲಮಾಣಿ ಕಾರ್ಯಾಚರಣೆ ನಡೆಸಿದರು.