ಪ್ರವಾಸಿಗರ ವಾಹನ ಪಲ್ಟಿ: ಬಾಲಕ ಸಾವು

Team Udayavani, Jun 4, 2019, 12:15 PM IST

ಸೋಮವಾರಪೇಟೆ: ಧಾರ್ಮಿಕ ಕ್ಷೇತ್ರ ದರ್ಶನಕ್ಕೆಂದು ಆಗಮಿಸಿದ್ದ ಭಕ್ತರ ವಾಹನವೊಂದು ಮಗುಚಿದ ಪರಿಣಾಮ ಬಾಲಕ ಮೃತಪಟ್ಟು, ಹದಿನೇಳು ಮಂದಿ ತೀವ್ರವಾಗಿ ಗಾಯಗೊಂಡಿರುವ ಘಟನೆ ಸೋಮವಾರಪೇಟೆ ಸಮೀಪದ ಕೊವರ್‌ಕೊಲ್ಲಿ ಜಂಕ್ಷನ್‌ನಲ್ಲಿ ರವಿವಾರ ರಾತ್ರಿ ಸಂಭವಿಸಿದೆ.

ಬೆಳಗಾವಿ ಹುಕ್ಕೇರಿ ತಾಲೂಕಿನ ಗೋಟೂರು ಗ್ರಾಮದ ಸೋಮಯ್ಯ ಅವರ ಪುತ್ರ ಗುರುಸಿದ್ದಪ್ಪ ಅಲಿಯಾಸ್‌ ಕಾರ್ತಿಕ್‌ (7) ಮೃತಪಟ್ಟವ.ಚಿಂತಾಜನಕ ಸ್ಥಿತಿಯಲ್ಲಿದ್ದ ಸಿದ್ದವ್ವ ಅವರನ್ನು ಮಂಗಳೂರಿನ ಆಸ್ಪತ್ರೆಗೆ ಸಾಗಿಸಲಾಗಿದೆ. ಇಬ್ಬರನ್ನು ಪುತ್ತೂರಿನ ಆಸ್ಪತ್ರೆಯಲ್ಲಿ ಹಾಗೂ ಇತರರನ್ನು ಮಡಿಕೇರಿ ಆಸ್ಪತ್ರೆಯಲ್ಲಿ ದಾಖಲಿಸಲಾಗಿದೆ.

ತೂಫಾನ್‌ ವಾಹನದಲ್ಲಿ ತಮಿಳುನಾಡು, ಆಂಧ್ರಪ್ರದೇಶದ ದೇವಾಲಯಗಳಿಗೆ ಭೇಟಿ ನೀಡಿದ್ದ ಬೆಳಗಾವಿಯ 9 ಮಕ್ಕಳು ಸಹಿತ ಒಟ್ಟು 18 ಮಂದಿಯಿದ್ದ ತಂಡ ಶನಿವಾರ ಮೈಸೂರಿನ ಸುತ್ತೂರುಮಠದಲ್ಲಿ ತಂಗಿತ್ತು. ಅಲ್ಲಿಂದ ರವಿವಾರ ರಾತ್ರಿ ಸುಬ್ರಮಣ್ಯ ದೇವಾಲಯಕ್ಕೆ ಬರುತ್ತಿದ್ದಾಗ ಅಪಘಾತ ಸಂಭವಿಸಿದೆ. ವಾಹನ ಮೂರ್‍ನಾಲ್ಕು ಪಲ್ಟಿ ಹೊಡೆದಿದೆ ಎಂದು ಠಾಣಾಧಿಕಾರಿ ಶಿವಶಂಕರ್‌ ತಿಳಿಸಿದ್ದಾರೆ. ಗಾಯಾಳುಗಳಿಗೆ ಪಟ್ಟಣದ ಆಸ್ಪತ್ರೆಯಲ್ಲಿ ಪ್ರಾಥಮಿಕ ಚಿಕಿತ್ಸೆ ನೀಡಲಾಗಿದೆ. ಚಾಲಕ ವಿರೂಪಾಕ್ಷ ಹಿರೇಮವಿರುದ್ಧ ಪ್ರಕರಣ ದಾಖಲಾಗಿದೆ.