ವಾರದ ನಂತರ ಶುರುವಾದ ಶಾಲೆಗಳು

Team Udayavani, Aug 24, 2018, 6:00 AM IST

ಮಡಿಕೇರಿ: ನಿರಂತರ ಮಳೆಯಿಂದಾಗಿ ಜಿಲ್ಲೆಯ ಎಲ್ಲ ಶಾಲೆಗಳಿಗೆ ಒಂದು ವಾರದ ರಜೆ ಘೋಷಿಸಿಲಾಗಿತ್ತು. ಜಿಲ್ಲಾಡಳಿತ ಸೂಚನೆಯಂತೆ ಗುರುವಾರ ಬಹುತೇಕ ಎಲ್ಲ ಶಾಲೆಗಳು ಪುನರ್‌ ಆರಂಭವಾಗಿದೆ.

ಕಳೆದ ಬುಧವಾರದಿಂದ ಶಾಲಾ ಮಕ್ಕಳಿಗೆ ರಜೆ ಘೋಷಣೆ ಮಾಡಲಾಗಿತ್ತು. ಜಿಲ್ಲೆಯ ಸರ್ಕಾರಿ, ಅನುದಾನಿತ ಹಾಗೂ ಅನುದಾನ ರಹಿತ ಶಾಲೆಗಳು ಸೇರಿ 718 ಶಾಲೆಗಳಲ್ಲಿ ಗುರುವಾರ 657 ಶಾಲೆಗಳಲ್ಲಿ ಪಠ್ಯ ಹಾಗೂ ಪಠ್ಯೇತರ ಚಟುವಟಿಕೆ ನಡೆದಿದೆ. ಮಡಿಕೇರಿ-ಸಂಪಾಜೆ ರಸ್ತೆ, ಮಾದಪುರ, ಹಟ್ಟಿಹೊಳೆ, ಮಕ್ಕಂದೂರು ಮೊದಲಾದ ಪ್ರದೇಶದಲ್ಲಿ ರಸ್ತೆ ಸಂಪರ್ಕ ಇಲ್ಲದ ಶಾಲೆಗಳು ಮತ್ತು ನಿರಾಶ್ರಿತರ ಶಿಬಿರ ನಡೆಯುತ್ತಿರುವ 61 ಶಾಲೆಗೆ ಗುರುವಾರವೂ ರಜೆ ನೀಡಲಾಗಿತ್ತು.

ಜಿಲ್ಲೆಯಾದ್ಯಂತರ ಎಲ್ಲ ಶಾಲೆಗಳಲ್ಲಿ ಶೇ.60ರಿಂದ 70 ಸರಸಾರಿಯಲ್ಲಿ ವಿದ್ಯಾರ್ಥಿಗಳು ಹಾಜರಾಗಿದ್ದಾರೆ. ಶಿಕ್ಷಕರ ಹಾಜರಾತಿಯು ಶೇ.95ಕ್ಕಿಂತ ಹೆಚ್ಚಿತ್ತು. ಮಕ್ಕಳಿಗೆ ಬಿಸಿಯೂಟ ಸೇರಿದಂತೆ ಸರ್ಕಾರದ ಎಲ್ಲ ಸೌಲಭ್ಯ ಎಂದಿನಂತೆ ಒದಗಿಸಲಾಗಿದೆ. ಮಡಿಕೇರಿ ನಗರದಲ್ಲಿರುವ ಕೆಲವು ಶಾಲೆಗಳಿಗೆ ಒಂದೆರೆಡು ದಿನದ ವಿನಾಯ್ತಿ ನೀಡಲಾಗಿದೆ ಎಂದು ಜಿಲ್ಲಾ ಉಪನಿರ್ದೇಶಕ ವಾಲ್ಟರ್‌ ಡೆಮೆಲ್ಲೊ ಮಾಹಿತಿ ನೀಡಿದರು.